လါဖ့ၤဘြူၤအါရံၤ ၁၁ သီႇ ၂၀၂၂ နံၣ်ႇ ခ့ၣ်အဲးစံၣ်
မ်ပကဖီၣ်လိာ်သကိးစုဒီးၦၤကိးကလုာ်ဒဲးဒီးတၢ်ကရၢကရိကိးဖုဒဲးလၢတၢ်ဂဲၤလိာ်သူၣ်ထီၣ်ဖဲၣ်ဒရၢၣ်ဒံၣ်မိၣ်ခြ့ၣ်စံၣ်ကီၢ်စၢဖှိၣ်အဂီၢ်အဂ့ၢ်န့ၣ် ဖဲတနံၤအံၤလါဖ့ၤဘြူၤအါရံၤ ၁၁ သီ လၢအလီၤဘၣ်၀ဲ(၇၄)၀ီတ၀ီကညီဒီကလုာ်မုၢ်နံၤအပူၤ ကညီဒီကလုာ်စၢဖှိၣ်ကရၢ-KNU ကရၢခိၣ် သုးခိၣ်ကျၢၢ်စိ စီၤမူးတူစ့ဖိဟ့ၣ်ဂံၢ်ဟ့ၣ်ဘါ၀ဲန့ၣ်လီၤႉ
ပကဖီၣ်လိာ်သကိးပစုဒီးၦၤကိးကလုာ်ဒဲးဒီးတၢ်ကရၢကရိကိးဖုဒဲးလၢတၢ်ဂဲၤလိာ်သူၣ်ထီၣ်ဖဲၣ်ဒရၢၣ်ဒံၣ်မိၣ်ခြ့ၣ်စံၣ်ကီၢ်စၢဖှိၣ်လၢထံဖိကီၢ်ဖိခဲလၢာ်မုၢ်လၢ်ဆၢထံၣ်တ့ၢ်၀ဲလၢၦၤကိးကလုာ်ဒဲးဒီးတၢ်ဘူၣ်တၢ်ဘါခဲလၢာ်ကအိၣ်၀ဲဒီးခွဲးယာ်တၢ်ထဲသိးတုၤသိးႇခွဲးယာ်တၢ်သဘျ့ဒီးတၢ်စံၣ်ညီၣ်ပၢလီၤသးအလၢအၦဲၤအဂ့ၢ်န့ၣ် လံာ်ဟ့ၣ်ယုၢ်လၢကညီဒီကလုာ်မုၢ်နံၤအဂီၢ်အပူၤ စံး၀ဲန့ၣ်လီၤႉ
ဒ်န့ၣ်အသိးမ်ပကဟံးဃာ်ဒီးပာ်ဖျါထီၣ်ပၦၤကလုာ်ကညီဖိအတၢ်စံၣ်စိၤတဲစိၤႇကလုာ်အက့ၢ်အဂီၤႇအသူးသ့ၣ်လၤကပီၤဒီးပတၢ်မ့ၢ်တၢ်နီၢ်နီၢ်တဖၣ်ဃူဃူဖိးဖိးဒ်လၢ(၁၉၄၈)နံၣ် လါဖ့ၤဘြူၤအါရံၤ ၁၁ သီအနံၤအသိးန့ၣ်ဒီး ပကဂဲၤလိာ်သကိးပ၀ဲလၢၦၤကလုာ်အတၢ်ခွဲးတၢ်ယာ်ႇတၢ်ထဲသိးတုၤသိးဒီးတၢ်စံၣ်ညီၣ်ပၢလီၤသးခွဲးယာ်လၢတၢ်ဃူတၢ်ဖိးအပူၤအဂ့ၢ်န့ၣ် ဟ့ၣ်ဂံၢ်ဟ့ၣ်ဘါအါထီၣ်၀ဲကညီဖိတဖၣ်န့ၣ်လီၤႉ
ဖဲ(၁၉၄၈)နံၣ် လါဖ့ၤဘြူၤအါရံၤ ၅ သီအနံၤ တၢ်ကရၢကရိထီၣ်ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ၀ံၤအလီၢ်ခံ ကညီကမျၢၢ်(၄)ကလီၢ်ဘျဲၣ်လဲၤပာ်ဖျါထီၣ်၀ဲကညီဒီကလုာ်အတၢ်ပညိၣ်ကွၢ်စိခီဖျိတၢ်ကိးသတြီ(၄)ထံၣ်လၢအမ့ၢ်၀ဲဟ့ၣ်ကညီကီၢ်တဘျီဃီႇပညီတဘးပယီၤတဘးဒုးနဲၣ်ခဲအံၤႇထံလီၢ်ကီၢ်ပူၤတၢ်ဒုးတၢ်ယၤပတသးလီဘၣ်ဒီးကလုာ်တၢ်သဘံၣ်သဘုၣ်ပတသးလီဘၣ်သ့ၣ်တဖၣ်န့ၣ်လီၤႉ
လၢန့ၣ်အမဲာ်ညါတၢ်ပာ်ဒ့ၣ်ပာ်ကမၣ်လိာ််သးကဒဲကဒဲန့ၣ်တမ့ၢ်တၢ်မၤထီၣ်မၤထီလိာ်ပသးဘၣ်ဒီးတၢ်မၤလၢၦဲၤကညီကလုာ်အတၢ်မိၣ်န့ၢ်သးလီနီၢ်နီၢ်န့ၣ်ပၦၤကလုာ်ကညီဖိတဖၣ်ပကဘၣ်ကွဲးသကိးပတၢ်စံၣ်စိၤတဲစိၤလီၤအဂ့ၢ်န့ၣ် ခ့ၣ်အဲၣ်ယူၣ်ကရၢခိၣ်ဟ့ၣ်ဂံၢ်ဟ့ၣ်ဘါအါထီၣ်၀ဲန့ၣ်လီၤႉ
ဖဲ(၁၉၄၈)နံၣ် လါဖ့ၤဘြူၤအါရံၤ ၁၁ သီအနံၤန့ၣ် ခ့ၣ်အဲၣ်ယူၣ်တီခိၣ်ရိၣ်မဲ ကညီကလုာ်လၢအအိၣ်ဖဲထံထၣ်စွ့ဟီၣ်က၀ီၤဒီးကစၢၢၢ်ခိၣ်ကလိကျါကညီကမျၢၢ်(၄)ကလီၢ်ဘျဲၣ် လဲၤပာ်ဖျါဃ့ထီၣ်၀ဲကညီဒီကလုာ်အတၢ်ပညိၣ်ကွၢ်လၢတၢ်ကိးသတြီ(၄)ထံၣ်န့ၣ်လီၤႉ
ဖဲ(၁၉၅၃)နံၣ် လါနိၣ်၀့ဘၢၣ် ၂၃ သီ တုၤလၢ ၂၅ သီအနံၤ တၢ်မၤ၀ဲကီၢ်သူလ့ၤခီကရဲးအဆိကတၢၢ်တဘျီအပူၤန့ၣ် တၢ်ပာ်ပနီၣ်က့ၤလါဖ့ၤဘြူၤအါရံၤ ၁၁ သီဒ်အမ့ၢ်ကညီဒီကလုာ်အမုၢ်နံၤဒီး ကိးနံၣ်ဒဲးမ့တုၤဃီၤဖဲလါဖ့ၤဘြူၤအါရံၤ ၁၁ သီအနံၤန့ၣ် တၢ်မၤလၤကပီၤ၀ဲကညီဒီကလုာ်မုၢ်နံၤအံၤန့ၣ်လီၤႉ
