တၢ်ဒုးကဲထီၣ်လၢဖလူ၀ံၤအလီၢ်ခံပယီၤသုးကဘီယူၤဟဲခးလီၤကဒါတၢ်လၢမုၢ်နၤခီတပယူာ်ဃီ

လါအ့ဖြ့ၣ် ၂၂ သီႇ ၂၀၂၂ နံၣ်ႇ ခ့ၣ်အဲးစံၣ်

ပယီၤသုးကျိၤလၢအဟဲထီၣ်ဆူခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ(သုးက့ ၆)ဟီၣ်က၀ီၤ လ့က့ၣ်ကိာ် ဖလူဟီၣ်က၀ီၤပူၤဒီး(KNLA)သုးပာ်ဖှိၣ်တဖၣ်အဘၢၣ်စၢၤတၢ်ခးလိာ်သးကဲထီၣ်၀ံၤအလီၢ်ခံ ပယီၤသုးကဘီယူၤဟဲက့ၤခးလီၤကျိဖးဒိၣ်လၢမုၢ်နၤခီတပယူာ်ဃီအဂ့ၢ်န့ၣ် လီၢ်က၀ီၤဂံၢ်ခီၣ်ထံးတၢ်ကစီၣ်စံး၀ဲန့ၣ််လီၤႉ

စးထီၣ်ဖဲမဟါလါအ့ဖြ့ၣ် ၂၁ သီ ဟါခီ ၆ နၣ်ရံၣ်အဆၢကတီၢ် တၢ်ခးလိာ်သးကဲထီၣ်၀ဲလၢဟီၣ်က၀ီၤ(KNLA)သုးပာ်ဖှိၣ်ဒီးပယီၤသုးတြိၤ(၄၄)စုတီၤအဖီလာ်(ခမရ-၁)သုးကျိၤလၢအဟဲနုာ်လီၤဆူဖလူသ၀ီတကပၤအံၤ၀ံၤအလီၢ်ခံ ဖဲဟါခီ ၇ နၣ်ရံၣ်တုၤလၢ ၁၁ နၣ်ရံၣ်ဃၣ်ဃၣ်န့ၣ် ခီဖျိပယီၤသုးကဘီယူၤဟဲခးလီၤကျိဖးဒိၣ်ဆူ(KNLA)သုးပာ်ဖှိၣ်အိၣ်အလီၢ်တဖၣ်အဃိ ကညီသုးပာ်ဖှိၣ်သုးဖိဘၣ်ဒိ၀ဲ(၂)ဂၤအဂ့ၢ်န့ၣ် (KNLA)သုးပာ်ဖှိၣ်ၦၤဟ့ၣ်တၢ်ကစီၣ်ဖိစံး၀ဲဒ်အံၤန့ၣ်လီၤႉ

“ဖဲမဟါဟါခီန့ၣ်ဟဲထီၣ်၀ဲဒၣ်လၢဖလူသ၀ီတကပၤႇအ၀ဲသ့ၣ်ဒီးပၦၤကညီသုးဖိကရူၢ်တဖၣ်ထံၣ်လိာ်သးဒီးတၢ်ခးလိာ်သးကဲထီၣ်ႉအ၀ဲသ့ၣ်တကပၤသံ(၁)ဂၤႇဘၣ်ဒိ(၂)ဂၤလီၤႉတယံၤတမီၢ်ဖဲဟါခီ ၇ နၣ်ရံၣ်ဘျဲၣ်န့ၣ် စွဲၣ်ဒီၣ်တၢ်လူၢ်ႇလဲၣ်ခၣ်တီၤတၢ်လူၢ်တဖၣ်ခးလီၤကျိဖးဒိၣ်ဆူပကညီသုးအိၣ်တၢ်လီၢ် ခး၀ဲတုၤလၢမုၢ်နၤခီ ၁၁ နၣ်ရံၣ်ညါမီၤနီၤႉပၦၤဖိသၣ်ဘၣ်ဒိ(၂)ဂၤႇတၢ်ဘၣ်ယိၣ်တအိၣ်ဘၣ်”အဂ့ၢ်န့ၣ် ဂံၢ်ခီၣ်ထံးတၢ်ကစီၣ်၀ဲန့ၣ်စံး၀ဲန့ၣ်လီၤႉ

တလါအံၤလါအ့ဖြ့ၣ်အတီၢ်ပူၤ မ့ၢ်လၢပယီၤသုးဟဲထီၣ်မၤဒုးယၤတၢ်ဟူးတၢ်ဂဲၤလၢ လ့က့ၣ်ကိာ်ႇ သ့ၣ်ဘီဘိႇဂီၤလ့ၤႇကနဲလ့ႇမီခံႇထံသၢပျၢၤလီၢ်က၀ီၤတဖၣ်အပူၤအဃိ အ၀ဲသ့ၣ်တကပၤသံ၀ဲအါမးအဂ့ၢ်န့ၣ် (KNLA)သုးပာ်ဖှိၣ်စံး၀ဲန့ၣ်လီၤႉ

လၢအ၀ဲသ့ၣ်ကဆဲးဟဲထီၣ်မၤ၀ဲတၢ်ထီၣ်ဒုးအဂီၢ်န့ၣ်ဆှၢအါထီၣ်အသုးဂံၢ်ဘါႇတၢ်စုက၀ဲၤကျိချံၦာ်သၣ်ဒီး ခီဖျိမၤ၀ဲတၢ်ထီၣ်ဒုးလၢပျီပူၤကိးမုၢ်နံၤဒဲးအဃိ လီၢ်က၀ီၤ(KNLA)သုးပာ်ဖှိၣ်တဖၣ်လဲၤခးစဲးပြဲး၀ဲပယီၤသုးကလၢၤႇကျိဖးဒိၣ်လူၢ်ႇသုးကျိၤလၢအိၣ်ဆီလီၤသးဖဲဟီၣ်က၀ီၤအပူၤတဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ