ပယီၤသုးဖီၣ်တီၢ်မၤဒၢၣ်၀ီၢ်ရီလီၢ်က၀ီၤဖိဘၣ်ဒိနးနးကျံၤကျံၤ

လါမ့ၤ ၄ သီႇ ၂၀၂၂ နံၣ်ႇ ခ့ၣ်အဲးစံၣ်

ကညီကီၢ်စဲၣ် ဒူပျာ်ယာ်ကီၢ်ရ့ၣ်, ၀ီၢ်ရီဟီၣ်က၀ီၤအပူၤ ပယီၤသုးဖီၣ်တီၢ်မၤဒၢၣ်မၤလီၤ၀ဲလီၢ်က၀ီၤကမျၢၢ်လၢအဃ့ၢ်တၢ်ဒုးတဖၣ်အံၤအဃိ ချၢၣ်သ၀ီကရူၢ်လီၢ်က၀ီၤဖိအဂၤ (၁၀)ဃၣ်ဃၣ်အခိၣ်သၣ်ဃံဒီးဘၣ်ဒိဘၣ်ထံးနးနးကျံၤကျံၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဖဲအပူၤကွံာ်လါအ့ဖြ့ၣ် ၂၃ သီတုၤလၢလါမ့ၤထီၣ် ၅ သီအနံၤ ပယီၤသုး(ခလရ–၂၈၃ႇ၃၂)သုးပာ်ဖှိၣ်လၢအအိၣ်ဆီလီၤသးဖဲကၠၤအ့စ့ၣ်ကၠံကီၢ်ဆၣ် တကူၣ်တၢၣ်ပၢၤကီၢ်၀ဲၤလီၢ်ကရၢၢ်ပူၤအံၤဒီး ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)တဖၣ်အဘၢၣ်စၢၤတၢ်ဒုးကဲထီၣ်၀ဲဒီး ခီဖျိပယီၤသုးခးလီၤကျိဖးဒိၣ်ဆူဒူသ၀ီပူၤအဃိ ဟံၣ်ဃီတၢ်သူၣ်ထီၣ်ဟးဂီၤႇသ၀ီဖိသံဘၣ်ဒိဘၣ်ထံးအိၣ်တ့ၢ်၀ဲဒီး လီၢ်က၀ီၤသ၀ီဖိတဖၣ်အါဒၣ်တက့ၢ်န့ၣ်ဘၣ်တၢ်ဖီၣ်မၤဒၢၣ်မၤလီၤ၀ဲအဂ့ၢ်န့ၣ် သ့ၣ်ညါဘၣ်လၢ၀ီၢ်ရီလီၢ်က၀ီၤဖိအအိၣ်န့ၣ်လီၤႉ

“ဖဲပစံၣ်လီၤအိၣ်ခူသူၣ်လၢဟံၣ်လီၢ်ခံတၢ်ပူၤအကတီၢ်ပယီၤသုးကိးထီၣ်ၦၤဒီးခးပုာ်ၦၤဒီးအခီၣ်ႉမ့မ့ၢ်ပိာ်ခွါန့ၣ်စၢတံၢ်ဃာ်၀ဲအစုဒီးမၤဒၢၣ်၀ဲလီၤႉတီၢ်၀ဲဒီးကျိအဃိတထံၣ်ဃီန့ၣ်သးပ့ၤနီၣ်သးလီၤႉခိၣ်သၣ်ဃံတဲာ်ႇအ၀ဲသ့ၣ်ဟံ၀ဲတၢ်ဖိတၢ်လံၤလၢအိၣ်ပူၤတနီၤႉသ၀ီဖိတဖၣ်ပယီၤသုးဖီၣ်အီၤဒီးတီၢ်၀ဲအခိၣ်သၣ်ဃံအဃိအါဒၣ်တက့ၢ်န့ၣ်ဘၣ်ကူစါယါက့ၤအသးလီၤ”လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤစံး၀ဲန့ၣ်လီၤႉ

လီၢ်က၀ီၤသ၀ီဖိလၢပယီၤသုးဖီၣ်မၤဒၢၣ်၀ဲတဖၣ်အါဒၣ်တက့ၢ်န့ၣ်မ့ၢ်လၢအခိၣ်သၣ်ဃံဘၣ်ဒိနးနးကျံၤကျံၤအဃိ ဘၣ်ကူစါယါဘျါအသးဒီးလၢန့ၣ်အမဲာ်ညါခီဖျိပယီၤသုးအံၤဖီၣ်ဒီးသူကမျၢၢ်ဒ်တၢ်ဒီသဒၢစုက၀ဲၤတခါအသိးႇတီၢ်မၤဒၢၣ်မၤလီၤ၀ဲတကးဒံးဘၣ်ခီဖျိခးလီၤကျိဖးဒိၣ်ဆူဒူသ၀ီပူၤအဃိ တၢ်သူၣ်တၢ်ဖျးကရၢၢ်ႇဟံၣ်ဃီတၢ်သူၣ်ထီၣ်ဟးဂီၤ၀ဲဒီးနုာ်လီၤမၤဟးဂီၤလီၢ်က၀ီၤဖိအဟံၣ်စ့ၢ်ကီးအိၣ်၀ဲအါမးအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ပယီၤသုးလၢအအိၣ်တကူၣ်တၢၣ်ပၢၤကီၢ်၀ဲၤလီၢ်သ့ၣ်တဖၣ်အံၤ ခးစိ၀ဲလီၢ်က၀ီၤသ၀ီဖိလၢအဟးထီၣ်က့ၤလီၤဖဲအ၀ဲသ့ၣ်၀ဲၤလီၢ်အမဲာ်ညါႇနုာ်လီၤဖီၣ်သ၀ီဖိလၢအိၣ်ခူသူၣ်ဖဲဟံၣ်ပူၤႇဖီၣ်က့ၤကိး၀ဲသ၀ီဖိတဖၣ်ဒီးမၢ၀ံန့ၢ်အကျိခံၦာ်သၣ်ဒီးတၢ်ဘိၣ်သ့ၣ်တဖၣ်န့ၣ်လီၤႉ

ခီဖျိပယီၤသုးနုာ်လီၤမၤဒုးယၤတၢ်ဟူးတၢ်ဂဲၤလၢ(ခ့ၣ်အဲၣ်ယူၣ်)၀ီၢရ့ၣ်ကီၢ်ဆၣ်တၢ်ပၢဟီၣ်က၀ီၤပူၤအဃိ ချၢၣ်ႇတကူၣ်တၢၣ်ႇပူၤလံႇချၢၣ်သ၀ီဖိသ၀ီႇမၠိၣ်ဟီႇဃိၣ်ယဲၢ်ဖျၢၣ်ႇနီဒ့ၣ်ႇချၢၣ်မိၤစူၣ်ႇဒဲၤလိၣ်ႇကမီၣ်၀ါႇနါသဲထိၤႇတကူၣ်သ၀ီလီၢ်က၀ီၤဖိအဂၤ(၃၀၀၀)ဃၣ်ဃၣ်ဘၣ်ဃ့ၢ်ပူၤဖျဲးသးအဂ့ၢ်န့ၣ် သ့ၣ်ညါဘၣ်လၢကရူၢ်လၢမၤစၢၤၦၤဃ့ၢ်အိၣ်ကမှံတဖၣ်အအိၣ်န့ၣ်လီၤႉ

ဖဲတနံၤအံၤလါမ့ၤ ၄ သီအနံၤစ့ၢ်ကီး လၢချၢၣ်–တကူၣ်တၢၣ်သ၀ီအခိၣ်အဃၢၤန့ၣ် မုၢ်ဃ့ၢ်လီၤ ၁ နၣ်ရံၣ်တုၤလၢ ၃ နၣ်ရံၣ်ဘျဲၣ်န့ၣ် တၢ်ဒုးကဲထီၣ်ဒံး၀ဲလၢ(KNLA)ဒီးပယီၤသုးလၢအိၣ်တကူၣ်တၢၣ်သ၀ီပၢၤကီၢ်၀ဲၤလီၢ်တဖၣ်အံၤ အဘၢၣ်စၢၤဒံးန့ၣ်လီၤႉ

ဒ်န့ၣ်အသိးလၢတလၢၤကီၢ်စဲၣ် ခီဖျိပယီၤသုးလၢအိၣ်ဆီလီၤသးဖဲအဘ့ၣ်သ၀ီပူၤတဖၣ်ခးလီၤကျိဖးဒိၣ်ဆူ ချၢၣ်ႇတကူၣ်တၢၣ်သ၀ီကရူၢ် သ၀ီလၢအိၣ်ဘူးဖဲန့ၣ်သ့ၣ်တဖၣ်အပူၤအဃိ လီၢ်က၀ီၤသ၀ီဖိတဖၣ်ဘၣ်ဃ့ၢ်ထီၣ်ကဒီး၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ