ခီဖျိတၢ်ဒုးကဲထီၣ်လၢပလီဟီၣ်က၀ီၤပူၤ(၄)သီတပယူာ်ဃီအဃိသ၀ီ(၅)ဖျၢၣ်ဘၣ်ဃ့ၢ်ထီၣ်

လါယူၤလံ ၁ သီႇ ၂၀၂၂ နံၣ်ႇ ခ့ၣ်အဲးစံၣ်

လၢတနီသရံၣ်ကီၢ်ခီဒိၣ် ဘျံးဒ၀ဲၢ်ကီၢ်ရ့ၣ် ပလီဟီၣ်က၀ီၤအပူၤ စးထီၣ်လါယူၤ ၂၇ သီတုၤလၢလါလၢာ်န့ၣ် ခီဖျိတၢ်ဒုးကဲထီၣ်လၢပယီၤသုးဒီးလီၢ်က၀ီၤတၢ်ဒီသဒၢကမျၢၢ်သုး(PDF)သုးပာ်ဖှိၣ်တဖၣ်အဘၢၣ်စၢၤ(၄)သီတပယူာ်ဃီအဃိသ၀ီ(၅)ဖျၢၣ်လီၢ်က၀ီၤဖိဘၣ်ဃ့ၢ်ထီၣ်၀ဲသ၀ီဒီတဖျၢၣ်ညါအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ

ၦၤလၢအဘူးဒီးဟီၣ်က၀ီၤတၢ်ဒီသဒၢကမျၢၢ်သုး(PDF)တဂၤစံး၀ဲ“တၢ်ဒုးစးထီၣ်ကဲထီၣ်ဖဲလါယူၤ ၂၇ သီ ဟါခီ ၇ နၣ်ရံၣ်ဒီးကဲထီၣ်တုၤလၢခဲအံၤလီၤႉ ဒ်သိးဒီးယမၤနီၣ်ဃာ်န့ၣ်တၢ်ဒုးကဲထီၣ်အိၣ်အဘျီ(၂၀)ဘျဲၣ်လံႉ ပနၢ်ဟူလၢပယီၤသုးသံ(၃)ဂၤမီၤနီၤႉမ့မ့ၢ်လၢအံၤတကပၤခီန့ၣ်ဘၣ်ဒိ(၂)ဂၤႉခဲအံၤနါက့ပယီၤသုးဟဲထီၣ်တပယူာ်ဃီလီၤႉကဘီယူၤနါက့ဟဲဆှၣ်တၢ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

လၢန့ၣ်အမဲာ်ညါကတီၢ်ခဲအံၤလၢပလီဟီၣ်က၀ီၤအပူၤမကၠံၤကိသ၀ီႇကၠီန့ၣ်ႇနါတီၤႇမီၤမံၣ်ဒီးကၠ့ၣ်ကၤသ၀ီ(၅)ဖျၢၣ်လီၢ်က၀ီၤဖိခဲလၢာ်ဃၣ်ဃၣ်ဘၣ်ဃ့ၢ်ထီၣ်၀ဲအသိးတၢ်သမံသမိးတၢ်လၢလၢၢ်မုၢ်လါကီၢ်ဆၣ်ပူၤဟဲအါထီၣ်၀ဲအဂ့ၢ်န့ၣ် လီၢ်က၀ီၤဖိတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ

ကတီၢ်ခဲအံၤလီၢ်က၀ီၤဖိလၢအဘၣ်ဃ့ၢ်တၢ်ဒုးတဖၣ်အံၤပိာ်မုၣ်ႇဖိဒံဖိသၣ်ႇသူၣ်က့သးၦၢ်တဖၣ်ဃုာ်ဒီးသ၀ီ(၅)ဖျၢၣ်အံၤၦၤနီၣ်ဂံၢ်ကအိၣ်၀ဲ(၂ႇ၀၀၀)ဃၣ်ဃၣ်ညါဒီးလၢၦၤသ့ၣ်တဖၣ်အံၤအဂီၢ်လိၣ်ဘၣ်၀ဲဂ့ၢ်ဂီၢ်အူတၢ်အီၣ်တၢ်အီဒီးတၢ်ခိၣ်ဒုး(မိကၤ)အိၣ်ဆိးလီၢ်ကျဲတဖၣ်အဂ့ၢ်န့ၣ် လီၢ်က၀ီၤဖိတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ

ဒ်န့ၣ်အသိးလၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤ လၢၢ်မုၢ်လါကီၢ်ဆၣ်တကပၤစ့ၢ်ကီး စးထီၣ်လၢ(၂၀၂၁)လါယူၤထီၣ်သီန့ၣ်လီၢ်က၀ီၤဖိလၢအဘၣ်ဃ့ၢ်ထီၣ်(၁ႇ၄၀၀)ဘျဲၣ်အံၤစ့ၢ်ကီး ကတီၢ်ခဲအံၤလိၣ်ဘၣ်၀ဲဂ့ၢ်ဂီၢ်အူတၢ်အီၣ်တၢ်အီဒီးကသံၣ်ကသီတဖၣ်အဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ

လၢန့ၣ်အမဲာ်ညါဖဲအပူၤကွံာ်လါယူၤထီၣ် ၁၀ သီအနံၤစ့ၢ်ကီး လၢပလီဟီၣ်က၀ီၤအပူၤ ခီဖျိပယီၤသုးကျိၤအနီၣ်ဂံၢ်ကအိၣ်လၢအကယၤဟဲထီၣ်၀ဲလၢပလီကိသ၀ီႇနၣ်အ့ၤတီၤဒီးရှါဒိၣ်သ၀ီတကပၤအဃိ လီၢ်က၀ီၤကမျၢၢ်တဖၣ်ဘၣ်ဃ့ၢ်ထီၣ်၀ဲအသိး ပယီၤသုးဒွဲၣ်အူအီၣ်ကွံာ်ကၠီန့ၣ်သ၀ီပူၤဟံၣ်ဃီတနီၤဒံးအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ