ခီဖျိပယီၤသုးခးလီၤကျိဖးဒိၣ်အဃိကီးတရံးကလံၤထံးသ၀ီဖိတဖၣ်ဘၣ်ဃ့ၢ်ထီၣ်ကဒီး

လါယူၤလံ ၂၆ သီႇ ၂၀၂၂ နံၣ်ႇ ခ့ၣ်အဲးစံၣ်

ခီဖျိပယီၤသုးလၢအိၣ်ကီးတရံး၀့ၢ်ပူၤအံၤတဖၣ်ခးလီၤကျိဖးဒိၣ်ကိးမုၢ်နံၤဒဲးဃၣ်ဃၣ်အဃိ ကီးတရံးကလံၤထံးသ၀ီတနီၤ လီၢ်က၀ီၤသ၀ီဖိတဖၣ်ဘၣ်ဃ့ၢ်ထီၣ်ကဒီး၀ဲအဂ့ၢ်န့ၣ်သ့ၣ်ညါဘၣ်န့ၣ်လီၤႉ

စးထီၣ်ဖဲလါယူၤလံ ၁၃ သီတုၤလၢလါယူၤလံ ၂၄ သီအနံၤန့ၣ် ခီဖျိပယီၤသုးခးလီၤကျိဖိးဒိၣ်ကိးမုၢ်နံၤဒဲးအဃိ ကီးတရံးကလံၤထံးသ၀ီတဖၣ်လၢအမ့ၢ်ကီးနွဲၢ်သ၀ီႇယွၤသ့ၣ်ကိႇအၤကလီၤဒီးမီမၣ်သ၀ီသီႇကမဲၤကိႇသၤယၤကိဒီးကၠီၤစှၤကိသ၀ီ လီၢ်က၀ီၤသ၀ီဖိခဲလၢာ်ဃၣ်ဃၣ်ဘၣ်ဃ့ၢ်ထီၣ်ကဒီး၀ဲအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ

ကီးနွဲၢ်လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤစံး၀ဲ“ပယီၤသုးခးလီၤကျိဖးဒိၣ်လၢသ၀ီပူၤကိးမုၢ်နံၤဒဲးလီၤႉနအိၣ်ကဘူၣ်ဒ်လဲၣ်”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ

လီၢ်က၀ီၤသ၀ီဖိတနီၤန့ၣ်လဲၤစံၣ်အိၣ်၀ဲလၢသ၀ီအဂၤလၢအဘူးအတံၢ်အဟံၣ်ဒီးတနီၤန့ၣ်လဲၤစံၣ်အိၣ်လၢၦၢ်ပူၤကစၢၢ်ကလိကျါဒီးကတီၢ်ခဲအံၤလိၣ်ဘၣ်၀ဲအိၣ်ဆိးလီၢ်ကျဲႇတၢ်အီၣ်တၢ်အီဒီးကသံၣ်ကသီတဖၣ်အဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ

လၢန့ၣ်အမဲာ်ညါဖဲလါယူၤလံ ၂၃ သီအနံၤန့ၣ် တၢ်ခး၀ဲသိလ့ၣ်လၢအတီၣ်သိလၢအိၣ်ဟဲက့ၤလီၤလၢမၠၣ်၀တံၣ်တကပၤကဲထီၣ်သး၀ံၤအလီၢ်ခံ ခီဖျိပယီၤသုးနုာ်လီၤမၤသုးတၢ်ဟူးတၢ်ဂဲၤလၢကီးတရံးကလံၤထံးကီးနွဲၢ်သ၀ီကရူၢ်တကပၤအဃိ လီၢ်က၀ီၤဖိတဖၣ်ဘၣ်ယိၣ်လၢတၢ်ဒုးကကဲထီၣ်ကဒါန့ၣ်လီၤႉ

“ခဲအံၤ(BGF)လၢအိၣ်သ၀ီပူၤတဖၣ်နါက့တအိၣ်လၢသုးကလၢၤပူၤလၢၤဘၣ်ႉအ၀ဲသ့ၣ်မ့အိၣ်န့ၣ်ကညီဖိကဒဲကဒဲအဃိကိညၢ်တစဲးဒံးမီၤနီၤႉပယီၤသုးမ့ဟဲအိၣ်န့ၣ်လ့ၤတက့ၤတမ့ၢ်လၢအိၣ်သ၀ီပူၤတသ့လၢၤဘၣ်”အဂ့ၢ်န့ၣ် ကီးနွဲၢ်လီၢ်က၀ီၤဖိတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ

ဖဲအပူၤကွံာ်လါမးရှးအခါစ့ၢ်ကီးခီဖျိပယီၤသုးလၢအနုာ်လီၤမၤဒုးယၤတၢ်ဟူးတၢ်ဂဲၤလၢကီးတရံးကလံၤထံးအံၤဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်တဖၣ်အဘၢၣ်စၢၤတၢ်ဒုးကဲထီၣ်အဃိဒူသ၀ီလီၢ်က၀ီၤဖိတဖၣ်အံၤဘၣ်ဃ့ၢ်ထီၣ်ဒံး၀ဲသ၀ီဒီတဖျၢၣ်ညါဒီးဘၣ်ဖဲအ၀ဲသ့ၣ်ဟဲက့ၤအိၣ်လၢသ၀ီပူၤန့ၢ်လၢအလါအံၤအကတီၢ်ဘၣ်ဃ့ၢ်ထီၣ်ကဒီး၀ဲဒ်အံၤန့ၣ်လီၤႉ