သုးခိၣ်ကျၢၢ်ဖိစီၤနၢၤဒါမၠးတီခိၣ်ရိၣ်မဲဒုးအိၣ်ထီၣ် ကီၢ်သူလ့ၤသုးမုၢ်ဒိၣ်

လါယူၤလံ ၂၀ သီႇ ၂၀၂၂ နံၣ်ႇ ခ့ၣ်အဲးစံၣ်

တၢ်ဒုးအိၣ်ထီၣ်ကီၢ်သူလ့ၤသုးမုၢ်ဒိၣ်(Kaw Thoo Lei Army)လံအဂ့ၢ်န့ၣ် ကညီဒီကလုာ်ဂၢၤသးကရၢ(KNDO)သုးရိၣ်မဲခိၣ်ကျၢၢ်လီၢ်လံၤသုးခိၣ်ကျၢၢ်ဖိစီၤနၢၤဒါမၠးထုးထီၣ်ဘိးဘၣ်ရၤလီၤ၀ဲဖဲမဟါလါယူၤလံ ၁၉ သီအနံၤန့ၣ်လီၤႉ

မ့ၢ်လၢ(KNDO)အံၤကဆဲးမၤတၢ်ခါဆူမဲာ်ညါအဂီၢ်တၢ်ကီတၢ်ခဲအိၣ်ဒီးတၢ်တိာ်ပာ်အိၣ်လၢကဒုးလီၤၦီၢ်ကွံာ်သုးမီၤစိရိၤအံၤအဃိလါယူၤလံ ၁၇ သီအနံၤန့ၣ်ဘၣ်တၢ်ဆီတလဲဒုးအိၣ်ထီၣ်က့ၤ၀ဲ(Kaw Thoo Lei Army)အံၤလီၤအဂ့ၢ်န့ၣ် သုးခိၣ်ကျၢၢ်ဖိစီၤနၢၤဒါမၠး စံးဘၣ်ခ့ၣ်အဲးစံၣ်ဒ်အံၤန့ၣ်လီၤႉ

အ၀ဲစံး၀ဲလၢ“ပထံၣ်ဘၣ်လၢခိၣ်နၢ်အတၢ်လဲၤထံရူၢ်ကီၢ်သဲးအတၢ်လဲၤကျဲန့ၣ်လဲၤဒ်အံၤတညီလၢၤဘၣ်အဃိန့ၣ်အတကပၤခီဒၢးပဘၣ်ဒုးအိၣ်ထီၣ်၀ဲ(ကီၢ်သူလ့ၤသုးမုၢ်ဒိၣ်)လၢပကဘၣ်လဲၤခါဆူညါအဂီၢ်လီၤႉမ့ၢ်ဒၣ်တၢ်တခါလၢကကဲဘျုးကဲဖှိၣ်အါထီၣ်ဒီးထံရူၢ်ကီၢ်သဲးအတၢ်ဂ့ၢ်ကီသ့ၣ်တဖၣ်န့ၣ်ကဘှါရှဲခါဆူမဲာ်ညါကသ့အဂီၢ်လီၤႉမ့တမ့ၢ်ဘၣ်န့ၣ်ပထံရူၢ်ကီၢ်သဲးတၢ်အိၣ်သးခဲအံၤန့ၣ်ပကလဲၤဆူညါန့ၣ်တမ့ၢ်တၢ်ညီဘၣ်ႉပထံၣ်ဘၣ်လၢသုးရ့ၣ်တနီၤနီၤဒုးတၢ်ႇသုးက့တနီၤနီၤဒုးတၢ်ႇလၢတၢ်တခါအံၤအဖီခိၣ်န့ၣ်တၢ်တဃူတဖိးအိၣ်မီၤနီၤႉပဒုးအိၣ်ထီၣ်၀ဲကီၢ်သူလ့ၤသုးမုၢ်ဒိၣ်အံၤအိၣ်ဒၣ်လၢပကမၤလီၤၦီၢ်၀ဲဒၣ်သုးမီၤစိရိၤအံၤအဂီၢ်လီၤ”အဂ့ၢ်န့ၣ်စံး၀ဲန့ၣ်လီၤႉ

တၢ်ဒုးအိၣ်ထီၣ်(ကီၢ်သူလ့ၤသုးမုၢ်ဒိၣ်)အံၤတမ့ၢ်လၢကကဲထီၣ်၀ဲတၢ်လီၤမုၢ်လီၤဖးလၢတၢ်ကရၢကရိအပူၤဘၣ်ဒီးတမ့ၢ်လၢကမၤဆါမၤထီဒါကရၢမိၢ်ၦၢ်ႇၦၤကလုာ်ဘၣ်ဒီးတၢ်နာ်အီၣ်တအိၣ်လၢၤလၢခိၣ်နၢ်လၢအဘှါရှဲထံရူၢ်ကီၢ်သဲးတဖၣ်အံၤအဖီခိၣ်လၢၤဘၣ်အဃိပဒုးအိၣ်ထီၣ်တၢ်အံၤလၢပကဘၣ်မၤဖျါထီၣ်တၢ်အမိၢ်လံၤမိၢ်ၦၢ်အဂီၢ်လီၤအဂ့ၢ်န့ၣ်သုးခိၣ်ကျၢၢ်ဖိစီၤနၢၤဒါမၠးစံးအါထီၣ်၀ဲန့ၣ်လီၤႉ

လၢန့ၣ်အမဲာ်ညါဒ်သိးခိၣ်နၢ်လၢအဟူးဂဲၤထံရူၢ်ကီၢ်သဲးတဖၣ်မ့လဲၤကမၣ်ကျဲဒၣ်လဲာ်တၢ်အုၣ်ကီၤသးအိၣ်လံလၢတၢ်တခါအံၤအဖီခိၣ်သုတလီၤၦီၢ်ဟးဂီၤတသ့၀ဲဘၣ်အဂီၢ်န့ၣ်မ့ၢ်တၢ်တခါလၢအဖီၣ်ဂၢၢ်ဖီၣ်ကျၢၤက့ၤ၀ဲဒီးတၢ်ကဒုးလီၤၦီၢ်သုးမီၤစိရိၤခါဆူညါအဂီၢ်ၦၤလၢအသးအိၣ်ဒုးဒုၣ်ဒါတဖၣ်န့ၢ်မၤသကိးတၢ်သ့၀ဲလီၤအဂ့ၢ် အ၀ဲစံးအါထီၣ်၀ဲန့ၣ်လီၤႉ

ဖဲအပူၤကွံာ်လါယူၤလံ ၁၆ သီလၢအလီၤဘၣ်၀ဲကညီဒီကလုာ်ဂၢၤသးကရၢ(KNDO)နံၣ်ၦဲၤထီၣ် ၇၅ ၀ီတ၀ီအနံၤန့ၣ် ခ့ၣ်အဲၣ်ယူၣ်–ကညီဒီကလုာ်ထုးထီၣ်ပာ်ဖျါ၀ဲလၢ သုးခိၣ်ကျၢၢ်ဖိစီၤဆှံလ့ၢ်မ့ၢ်၀ဲ(KNDO)သုးရိၣ်မဲခိၣ်ကျၢၢ်၀ံၤအလီၢ်ခံ သၢသီတသီအနံၤန့ၣ်တၢ်ထုးထီၣ်ဘိးဘၣ်ရၤလီၤ၀ဲလၢတၢ်ဒုးအိၣ်ထီၣ်က့ၤကီၢ်သူလ့ၤသုးမုၢ်ဒိၣ်အံၤန့ၣ်လီၤႉ

ဘၣ်ထွဲတၢ်ဒုးအိၣ်ထီၣ်(Kaw Thoo Lei Army)အံၤန့ၣ် ခ့ၣ်အဲၣ်ယူၣ်လီၢ်ခၢၣ်သးဒီး ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)လီၢ်ခၢၣ်သး၀ဲၤလီၢ်ခိၣ်သ့ၣ်တသ့ၣ်ညါထွဲတၢ်နီတမံၤဘၣ်ဒီးတမ့ၢ်တၢ်ဒုးအိၣ်ထီၣ်၀ဲလၢခ့ၣ်အဲၣ်ယူၣ်တၢ်မၤအကျိၤအကျဲဘၣ်အဂ့ၢ်န့ၣ် (KNLA)ခိၣ်နၢ်တဂၤပဲာ်ထံနီၤဖးစံး၀ဲန့ၣ်လီၤႉ

သုးခိၣ်ကျၢၢ်ဖိစီၤနၢၤဒါမၠးလၢအဒုးအိၣ်ထီၣ်၀ဲ(ကီၢ်သူလ့ၤသုးမုၢ်ဒိၣ်)အံၤန့ၣ် ဖဲအပူၤကွံာ်(၂၀၂၁)နံၣ်အခါဘၣ်ဃးတၢ်မၤသံပယီၤသုးမီၤစိရိၤအၦၤ(၁၂)ဂၤဖဲဂီၤလ့ၤလီၢ်က၀ီၤပူၤကဲထီၣ်သး၀ံၤအလီၢ်ခံဖဲတနံၣ်အံၤလါယနူၤအါရံၤန့ၣ်(ခ့ၣ်အဲၣ်ယူၣ်)တၢ်ဒီသဒၢ၀ဲၤကျိၤထုးထီၣ်ပာ်ဖျါ၀ဲလၢဘၣ်တၢ်ဒုးအိၣ်ဘှံးအီၤလၢလီၢ်လးဒီးမူဒါခံခါလၢာ်အပူၤလံန့ၣ်လီၤႉ

ဘၣ်ထွဲသုးမုၢ်ဒိၣ်တၢ်ကရၢကရိဟဲအိၣ်ထီၣ်လၢအသီဒ်အံၤအဖီခိၣ် တၢ်ဘၣ်ယိၣ်ဘၣ်ဘှီဟဲအိၣ်ထီၣ်၀ဲလၢ တၢ်လီၤမုၢ်လီၤဖးကဟဲအိၣ်ထီၣ်လၢကညီကမျၢၢ်ဒီးတၢ်ပၢၢ်ဆၢတၢ်ကရၢကရိလၢအိၣ်ဟီၣ်က၀ီၤတဖၣ်အပူၤအိၣ်၀ဲအသိးၦၤလၢအဟ့ၣ်ဂံၢ်ဟ့ၣ်ဘါကရူၢ်လၢအသီအံၤဒီးၦၤလၢတတူၢ်လိာ်ဆီၣ်ထွဲ၀ဲတဖၣ်အံၤအတၢ်ပဲာ်ထံနီၤဖးဟဲအိၣ်ထီၣ်၀ဲအကလုာ်ကလုာ်ဘၣ်ဆၣ်ႇဘၣ်ဃးတၢ်ဒုးအိၣ်ထီၣ်ကီၢ်သူလ့ၤသုးမုၢ်ဒိၣ်တၢ်ဂ့ၢ်အံၤန့ၣ်(ခ့ၣ်အဲၣ်ယူၣ်)လီၢ်ခၢၣ်သးထုးထီၣ်ပာ်ဖျါ၀ဲတအိၣ်နီတမံၤဒံးဘၣ်န့ၣ်လီၤႉ