လါအီကူး ၂၄ သီႇ ၂၀၂၂ နံၣ်ႇ ခ့ၣ်အဲးစံၣ်
ဖဲမဟါဂီၤခီ ၈ နၣ်ရံၣ်ဃၣ်ဃၣ်အဆၢကတီၢ်န့ၣ် ပယီၤသုးမီၤစိရိၤကဘီယူၤဟဲခးလီၤတၢ်လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ်(သုးက့ ၃)ဟီၣ်က၀ီၤ မိကီၢ်ဆၣ်ပူၤခံဘျီညါအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ
ဖဲတနံၤအံၤဂီၤခီအဆၢကတီၢ် လၢမိကီၢ်ဆၣ် မီကဲသၣ်ပၢၤခိၣ်သ၀ီပူၤန့ၣ် တၢ်ခးလိာ်သးကဲထီၣ်၀ဲလၢ ဟီၣ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးရ့ၣ်(၈)ဒီးပယီၤသုးတဖၣ်အဘၢၣ်စၢၤ၀ံၤအလီၢ်ခံပယီၤသုးမီၤစိရိၤကဘီယူၤဟဲခးလီၤစၢၤတၢ်လၢတၢ်ဒုးကဲထီၣ််လီၢ်အခိၣ်အဃၢၤတဖၣ်အဂ့ၢ်န့ၣ်လီၢ်က၀ီၤကမျၢၢ်စံးဘၣ်ခ့ၣ်အဲးစံၣ်ဖဲမဟါလါအီကူး ၂၃ သီအနံၤန့ၣ်လီၤႉ
လီၢ်က၀ီၤဖိတဂၤစံး၀ဲ“ဖဲတဂီၤညါအံၤန့ၣ်ကဘီယူၤဟဲဆှၣ်တၢ်လၢတၢ်ဖီခိၣ်တလီၢ်လီၢ်လီၤႉကဘီယူၤလဲၤခးလီၤတၢ်လၢ(သုးရ့ၣ်–၈)တကပၤန့ၣ်ႉလၢအံၤတကပၤလီၢ်က၀ီၤဖိတဖၣ်နါက့စံၣ်ထီၣ်လံအဃိ တၢ်ဘၣ်ဒိဘၣ်ထံးတၢ်အိၣ်သးဒုတသ့ၣ်ညါဒံးဘၣ်”အဂ့ၢ်န့ၣ်စံး၀ဲဖဲမဟါန့ၣ်လီၤႉ
ဖဲလါအီကူး ၂၃ သီ ဂီၤခီအဆၢကတီၢ်လၢမီကဲသၣ်ပၢၤခိၣ်သ၀ီပူၤန့ၣ် တၢ်ဒုးကဲထီၣ်၀ဲလၢ ဟီၣ်က၀ီၤ(KNLA)ဒီး ပယီၤသုးတဖၣ်အဘၢၣ်စၢၤယံၤ၀ဲ(၄၀)မံးနံး၀ံၤအလီၢ်ခံ ခီဖျိပယီၤသုးမီၤစိရိၤကဘီယူၤဟဲခးလီၤတၢ်အဃိ မီကဲသၣ်ပၢၤခိၣ်သ၀ီလီၢ်က၀ီၤကမျၢၢ်တဖၣ် ဘၣ်ဃ့ၢ်ထီၣ်၀ဲအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲဖဲမဟါန့ၣ်လီၤႉ
ပယီၤသုးမီၤစိရိၤအသုးကလၢၤလၢအိၣ်ဆီလီၤသးဖဲ(ခ့ၣ်အဲၣ်ယူၣ်)မိကီၢ်ဆၣ်ပူၤအံၤတဖၣ်ခီဖျိအ၀ဲသ့ၣ်ခးလီၤကျိဖးဒိၣ်ဆူကမျၢၢ်ဒူသ၀ီပူၤတလီၢ်လီၢ်အဃိသ၀ီအဖျၢၣ်(၂၀)ဘျဲၣ်လီၢ်က၀ီၤကမျၢၢ်အဂၤ(၅၀ႇ၀၀၀)ဘျဲၣ်ဘၣ်ဃ့ၢ်ထီၣ်၀ဲဒီးတုၤလၢခဲအံၤက့ၤလၢအဒူသ၀ီတဘူၣ်ဒံးဘၣ်အဂ့ၢ်န့ၣ်သ့ၣ်ညါဘၣ်န့ၣ်လီၤႉ
လၢန့ၣ်အမဲာ်ညါလီၢ်က၀ီၤကမျၢၢ်လၢမိကီၢ်ဆၣ်အပူၤတဖၣ်ဘၣ်တၢ်ဖီၣ်အီၤလၢပယီၤသုးတလီၢ်လီၢ်ဒီး တနီၤန့ၣ်ဟဲက့ၤထူၣ်ဖျဲးထီၣ်ကဒါအိၣ်အသိးတနီၤန့ၣ်ပယီၤသုးမၤသံကွံာ်၀ဲစ့ၢ်ကီးအိၣ်၀ဲအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ
ကတီၢ်ခဲအံၤလၢချၢၣ်လွံၢ်ထူၣ်ကီၢ်ရ့ၣ်အပူၤန့ၣ်လီၢ်က၀ီၤကမျၢၢ်ၦၤဃ့ၢ်မှံဟးဖျိးအိၣ်၀ဲ(တကလီၢ်)ခိၣ်ဃၢၤဒီး အါဒၣ်တက့ၢ်န့ၣ်မ့ၢ်၀ဲမိကီၢ်ဆၣ်လီၢ်က၀ီၤကမျၢၢ်ဒီးလၢၢ်ဒိၣ်ကီၢ်ဆၣ်လီၢ်က၀ီၤကမျၢၢ်တဖၣ်န့ၣ်လီၤႉဖဲအပူၤကွံာ်လါယူၤလံ ၂၉ သီဒီး လါအီကူး ၈ သီအနံၤစ့ၢ်ကီးပယီၤသုးမီၤစိရိၤကဘီယူူၤဟဲခးလီၤတၢ်လၢ လၢၢ်ဒိၣ်ကီၢ်ဆၣ်ဟီၣ်က၀ီၤပူၤဒံးန့ၣ်လီၤႉ
လၢန့ၣ်အမဲာ်ညါပယီၤသုးမီၤစိရိၤအံၤသူ၀ဲကဘီယူၤ(drone)ဟဲဃုသ့ၣ်ညါတၢ်လၢ(ခ့ၣ်အဲၣ်ယူၣ်)ချၢၣ်လွံၢ်ထူၣ်ကီၢ်ပူၤတကးဒံးဘၣ်အမဲာ်ညါဟဲဃုသ့ၣ်ညါတၢ်ဒီးကဘီယူၤလၢမုၢ်ဆါမုၢ်နၤအဂ့ၢ်န့ၣ်လီၢ်က၀ီၤဖိတဖၣ်စံး၀ဲန့ၣ်လီၤႉ
ဖဲမဟါလါအီကူး ၂၃ သီအနံၤန့ၣ် ပယီၤသုးမီၤစိရိၤဟဲခးလီၤတၢ်လၢခ့ၣ်အဲၣ်ယူၣ်(သုးက့ ၃)ဟီၣ်က၀ီၤပူၤအသိး ဖဲမဟါစးထီၣ်ဂီၤခီတုၤလၢမုၢ်ဟါလီၤန့ၣ်သုးမီၤစိရိၤကဘီယူၤဟဲတ့ၢ်လီၤစ့ၢ်ကီးမ့ၣ်ပိၢ်လၢခ့ၣ်အဲၣ်ယူၣ်(သုးက့့ ၆)ဟီၣ်က၀ီၤ မၠၣ်၀တံၣ်ကလံၤထံး ဖလူ–ဂီၤလ့ၤ(သိထၣ်ကွ့ၣ်)တၢ်လီၢ်ဒံးအဂ့ၢ်န့ၣ်သ့ၣ်ညါဘၣ်န့ၣ်လီၤႉ
