ပယီၤသုးနုာ်လီၤအိၣ်လၢတန့ဆါႇနီၤနဲသီခါဖၠၣ်ကရၢၢ်ပူၤအဃိလီၢ်က၀ီၤဖိဘၣ်ယိၣ်လၢတၢ်ဒုးကကဲထီၣ်

လါစဲးပထ့ဘၢၣ် ၁ သီႇ ၂၀၂၂ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဖၣ်အၣ်ကီၢ်ရ့ၣ်(သုးက့ ၇)ဟီၣ်က၀ီၤအပူၤ ခီဖျိပယီၤသုးနုာ်လီၤအိၣ်လၢတန့ဆါကီၢ်ဆၣ်(နီၤနဲ)သ၀ီသီခါဖၠၣ်ကရၢၢ်ပူၤအဃိလီၢ်က၀ီၤသ၀ီဖိလၢ အိၣ်ဘူးဖဲန့ၣ်သ့ၣ်တဖၣ်ဘၣ်ယိၣ်လၢတၢ်ဒုးကကဲထီၣ်အဂ့ၢ်န့ၣ်သ့ၣ်ညါဘၣ်န့ၣ်လီၤႉ

ပယီၤသုးကျိၤတဖၣ်အံၤဖဲလါအီကူး ၃၁ သီအနံၤန့ၣ် ဟဲနုာ်လီၤ၀ဲဒၣ်လၢနီၤနဲသ၀ီပူၤ အဂၤ(၄၀)ဃၣ်ဃၣ်၀ံၤအလီၢ်ခံ နုာ်လီၤအိၣ်၀ဲဒၣ်လၢသီခါဖၠၣ်ကရၢၢ်ပူၤလီၤအဂ့ၢ်န့ၣ် တန့ဆါလီၢ်က၀ီၤဖိတဂၤစံး၀ဲဒ်အံၤန့ၣ်လီၤႉ

“ပယီၤသုးနုာ်လီၤအိၣ်လၢသ၀ီပူၤႇခီဖျိသ၀ီဖိတဖၣ်ပျံၤတၢ်ဖုးတၢ်အဃိကညီတၢ်မုာ်တၢ်ခုၣ်ကီၣ်ကး (KNU/KNLA-PC) အံၤလဲၤပာ်က့ၤအ၀ဲသ့ၣ်လၢသီခါဖၠၣ်မီၤနီၤႉခဲအံၤကမျၢၢ်တဖၣ်ဘၣ်ယိၣ်လၢတၢ်ဒုးကကဲထီၣ်မီၤနီၤႉ မ့ၢ်တၢ်ကကဲထီၣ်သးအခါဖဲလဲၣ်န့ၣ်သူၣ်တနီးသးတနီးဒိၣ်မး” အဂ့ၢ်န့ၣ်တန့ဆါလီၢ်က၀ီၤဖိတဂၤဃီ၀ဲန့ၣ် စ့းအါထီၣ်၀ဲန့ၣ်လီၤႉ

ဘၣ်ဃးပယီၤသုးနုာ်လီၤအိၣ်လၢသီခါဖၠၣ်ကရၢၢ်ပူၤတၢ်ဂ့ၢ်အံၤလီၢ်က၀ီၤကမျၢၢ်တဖၣ်တလိၣ်သူၣ်ကိၢ်သးဂီၤဘၣ်ဒီးပယီၤသုးတမၤရှဲလဲတၢ်လၢတန့ဆါကီၢ်ဆၣ်ပူၤဘၣ်အဂ့ၢ်ဒီးပယီၤသုးကျိၤလၢအဟဲခဲအံၤတဖၣ်လၢဟီၣ်က၀ီၤတၢ်ဘံၣ်တၢ်ဘၢအဂီၢ်လီၤအဂ့ၢ်န့ၣ်(KNU/KNLA-PC)အနဲၣ်ရွဲၣ် သုးခိၣ်ဒိၣ်စိ စီၤကၠီၤညိၣ် စံးဘၣ်ခ့ၣ်အဲးစံၣ်ဒ်အံၤန့ၣ်လီၤႉ

“ပယီၤသုးကမၤရှဲလဲတၢ်ဖဲအံၤဒုပတနၢ်ဟူဒံးဘၣ်ႉအ၀ဲသ့ၣ်ဟဲတုၤခဲအံၤန့ၣ်လၢတၢ်ဘံၣ်တၢ်ဘၢအဂီၢ်လီၤႉပကရူၢ်နါက့ပလဲၤဟံးန့ၢ်စၢၤကီးတရံး၀့ၢ်ခိၣ်၀့ၢ်ဃၢၤ တၢ်ဘံၣ်တၢ်ဘၢစ့ၢ်ကီးအိၣ်မီၤနီၤ” အဂ့ၢ်န့ၣ်စံး၀ဲန့ၣ်လီၤႉ

ဘၣ်ဃးပယီၤသုးကျိၤနုာ်လီၤအိၣ်လၢ(နီၤနဲ)သ၀ီသီခါဖၠၣ်ကရၢၢ်ပူၤအံၤအဖီခိၣ်ခ့ၣ်အဲၣ်ယူၣ်တကပၤအိၣ်ခိးကွၢ်၀ဲအတၢ်ဟူးတၢ်ဂဲၤအဂ့ၢ်န့ၣ်ခ့ၣ်အဲၣ်ယူၣ်တန့ဆါကီၢ်ဆၣ်ခိၣ် ပဒိၣ်သးစီစံး၀ဲန့ၣ်လီၤႉ

“ပယီၤသုးကျိၤဟဲနုာ်လီၤတၢ်ဂ့ၢ်အံၤလၢပ၀ဲဒၣ်တကပၤပအိၣ်ခိးကွၢ်မီၤနီၤႉတုၤလၢခဲအံၤပတနၢ်ဟူတၢ်နီတမံၤဒံးဘၣ်ႉမ့ဃုကမျၢၢ်ထံဖိကီၢ်ဖိတၢ်ဂ့ၢ်ကီဒု၀ဲဒၣ်နါက့ပတဲတဘၣ်ဘၣ်” အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤ
ႉ
ပယီၤသုးကျိၤလၢအနီၣ်ဂံၢ်ကအိၣ်အဂၤ(၄၀)ဃၣ်ဃၣ်အံၤမ့ၢ်မနုၤသုးရ့ၣ်လဲၣ်န့ၣ်တုၤလၢခဲအံၤတၢ်တသ့ၣ်ညါ၀ဲဒံးဘၣ်န့ၣ််လီၤႉသုးကျိၤ၀ဲအံၤဟးထီၣ်က့ၤလီၤဟူးဂဲၤလၢကီးတရံး၀့ၢ်ပူၤဃုာ်ဒီး(KNU/KNLA-PC)ဒီးသုးခိးကီၢ်ဆၢ(BGF)သုးအဂ့ၢ်န့ၣ်လီၢ်က၀ီၤဖိတဖၣ်စံးဘၣ်ခ့ၣ်အဲးစံၣ်န့ၣ်လီၤႉ