လါစဲးပထ့ဘၢၣ် ၆ သီႇ ၂၀၂၂ နံၣ်ႇ ခ့ၣ်အဲးစံၣ်
ဖဲမဟါလါစဲးပထ့ဘၢၣ် ၅ သီ ဟါခီ ၆း၁၅ မံးနံးအဆၢကတီၢ်န့ၣ် လၢကီးတရံး၀့ၢ် အ့ရှါကျဲမုၢ်ဖီခိၣ် သုးခိးကီၢ်ဆၢ(BGF)ဒီးပယီၤသုးခးကမၣ်လိာ်သးကဲထီၣ်အဃိ ကီးနွဲၢ်သ၀ီပူၤဟံၣ်ဃီဟးဂီၤဒီးကျီၢ် တဖၣ်သံဘၣ်ဒိဘၣ်ထံး၀ဲအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ
ပယီၤသုးလၢအိၣ်ဆီလီၤသးဖဲ(ဒီနၣ်လ့)ဒီးကီးနွဲၢ်တိၤတၢ်လီၢ်ခံတီၤအံၤတဖၣ် ခးကမၣ်၀ဲသုးခိးကီၢ်ဆၢ(BGF)သုးလၢအိၣ်ကီးတရံး၀့ၢ်ကက့ၤထီၣ်ဆူ(တတါကူ)အံၤဒီး ခီဖျိပယီၤသုးခးကျိဖးဒိၣ်အဃိကီးနွဲၢ်သ၀ီဟံၣ်ဟးဂီၤ၀ဲတဖျၢၣ်ဒီးကျီၢ်ဘၣ်ဒိဘၣ်ထံးသံ၀ဲ(၈)ဒုအဂ့ၢ်န့ၣ်သ့ၣ်ညါဘၣ်န့ၣ်လီၤႉ
“ကျီၢ်လၢအဘၣ်(၈)ဒုန့ၣ်ဆါကွံာ်၀ဲခဲလၢာ်လံႉကျီၢ်(၈)ဒုမးန့ၢ်၀ဲ(၁၃)ကလီၢ်ကၠးလီၤႉကျီၢ်မ့တဘၣ်နီတမံၤဘၣ်န့ၣ်(၈)ဒုန့ၣ်ကန့ၢ်အကလီၢ်(၄၀)ဘျဲၣ်ညါႉခဲအံၤဖဲကန့ၢ်န့ၣ်ဆါကွံာ်၀ဲလံ”အဂ့ၢ်န့ၣ်ၦၤလၢအသ့ၣ်ညါလိာ်သးဒီးကျီၢ်ကစၢ်တဂၤစံးဘၣ်ခ့ၣ်အဲးစံၣ်န့ၣ်လီၤႉ
ခီဖျိကျိဖးဒိၣ်အဃိလီၢ်က၀ီၤကမျၢၢ်ဟံၣ်လၢအဟးဂီၤတဖျၢၣ်အံၤအကစၢ်လဲၤမၤတၢ်လၢကီၢ်ကၠီၣ်တဲၣ်ပူၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ဖဲမဟါတချုးလၢတၢ်ခးလိာ်သးကဲထီၣ်ဒံးဘၣ်န့ၣ်သုးခိးကီၢ်ဆၢ(BGF)သုးကက့ၤနုာ်လီၤ၀ဲဒီးသိလ့ၣ်လၢကီးတရံး၀့ၢ်ပူၤဒီးဖဲန့ၣ်ခီဖျိပယီၤသုးကးတံၢ်ဃာ်၀့ၢ်ပူၤကျဲနုာ်လီၤဟးထီၣ်အဃိက့ၤနုာ်လီၤလၢ၀့ၢ်ပူၤတန့ၢ်ဘၣ်ဒီးနီထီၣ်သိလ့ၣ်က့ၤ၀ဲကျဲအဂၤဒီးဖဲန့ၣ်တၢ်ခးလိာ်သးကဲထီၣ်၀ဲလီၤအဂ့ၢ်န့ၣ်ၦၤလၢထံၣ်၀ဲဒီးအမဲာ်တဖၣ်စံး၀ဲန့ၣ်လီၤႉ
“(BGF)ကနုာ်လီၤလၢ၀့ၢ်ပူၤအဂီၢ်န့ၣ်မၢတၢ်အိးထီၣ်န့ၢ်၀ဲကျဲမီၤနီၤႉပယီၤသုးခီတအိးထီၣ်န့ၢ်၀ဲဘၣ်ႉ၀ံၤဘျီပနၢ်ဟူလၢအတဲအါလိာ်သးႉမ့၀ံၤ(BGF)နီထီၣ်သိလ့ၣ်ဆူအ့ရှါကျဲ(တတါကူ)ဒီးခးပိၢ်ထီၣ်ကျိ၀ံၤဟဲက့ၤကဒါမီၤနီၤႉပယီၤသုးလၢအိၣ်ခိးတၢ်ဖဲန့ၣ်တဖၣ်အိၣ်ခိးခး၀ဲ(BGF)သိလ့ၣ်”အဂ့ၢ်န့ၣ်လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤစံး၀ဲန့ၣ်လီၤႉ
ဘၣ်ဃးပယီၤသုးဒီးသုးခိးကီၢ်ဆၢ(BGF)အဘၢၣ်စၢၤတၢ်ခးကမၣ်လိာ်သးကဲထီၣ်သးအံၤဖဲတနံၣ်အံၤအတီၢ်ပူၤမ့ၢ်၀ဲအဆိကတၢၢ်တဘျီလီၤဒီးခီဖျိတၢ်ခးလိာ်သးဘျီ၀ဲအံၤအဃိသုးခိးကီၢ်ဆၢ(BGF)သုးဖိခံဂၤအခီၣ်ဒီးအစုဘၣ်ဒိဘၣ်ထံးတဆံးတက့ၢ်အဂ့ၢ်န့ၣ် သ့ၣ်ညါဘၣ်လၢၦၤလၢဘူးဒီးသုးခိးကီၢ်ဆၢအအိၣ်န့ၣ်လီၤႉ
