လါစဲးပထ့ဘၢၣ် ၂၈ သီႇ ၂၀၂၂ နံၣ်ႇ ခ့ၣ်အဲးစံၣ်
ဖဲတနံၤအံၤလါစဲးပထ့ဘၢၣ် ၂၈ သီ ဂီၤခီ ၆ နၣ်ရံၣ်အဆၢကတီၢ်န့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA)ထီၣ်မၤန့ၢ်၀ဲဃိၣ်လူၢ်(ဖယါတီၤ)ပယီၤသုးကလၢၤလၢအိၣ်ဃိၣ်သၢဖျၢၣ်၀့ၢ်ပူၤအံၤလံဒီးဖဲန့ၣ်ပယီၤသုးတကပၤသံ၀ဲ(၁၃)ဂၤအကျါပၣ်ဃုာ်၀ဲသုးရ့ၣ်ခိၣ်–၂(၁)ဂၤအဂ့ၢ်န့ၣ် (KNLA)တကပၤစံး၀ဲန့ၣ်လီၤႉ
ပယီၤသုးခီၣ်သုးရ့ၣ်(ခလရ–၂၈၃)လၢအအိၣ်ဆီလီၤသးဖဲဃိၣ်သၢဖျၢၣ်၀့ၢ်(ဖယါတီၤ)သုးကလၢၤအံၤန့ၣ် ခီဖျိကဲထီၣ်တၢ်တံာ်တာ်လၢကမျၢၢ်ထံဖိကီၢ်ဖိတဖၣ်အဂီၢ်ဟးထီၣ်က့ၤလီၤကီခဲအဃိ KNLA သုးရ့ၣ်(၁၆) သုးဒ့(၂)အံၤ လဲၤထီၣ်မၤန့ၢ်၀ဲသုးကလၢၤအံၤယံၤ၀ဲတနၣ်ရံၣ်ဃၣ်ဃၣ်ဒီးဖဲန့ၣ်ပယီၤသုးလၢအိၣ်သုးကလၢၤပူၤတဖၣ်သံ(၁၃)ဂၤ အကျါပၣ်ဃုာ်၀ဲသုးရ့ၣ်ခိၣ်–၂(၁)ဂၤဒီးတၢ်မၤန့ၢ်ဃုာ်၀ဲကျိ(၇)ခိၣ်ဃုာ်ဒီး ကျိချံၦာ်သၣ်တဖၣ်အဂ့ၢ်န့ၣ် KNLA သုးရ့ၣ်(၁၆) သုးဒ့ အသုးဆှ့ၣ်ခိၣ် စီၤကရံၣ် စံးဘၣ်ခ့ၣ်အဲးစံၣ်န့ၣ်လီၤႉ
“ဖဲတဂီၤအံၤ ၆ နၣ်ရံၣ်န့ၣ် တၢ်ထီၣ်မၤန့ၢ်၀ဲ(ဖယါတီၤ)ပယီၤသုး(ခလရ–၂၈၃) သုးကလၢၤလံမီၤနီၤႉ သုးကလၢၤပူၤန့ၣ်ပယီၤသုးအိၣ်၀ဲ (၁၃) ဂၤလီၤႉပယီၤသုးသံခဲလၢာ်သံဃုာ်ဒီးသုးရ့ၣ်ခိၣ်မီၤနီၤႉ KNLA သုးရ့ၣ် (၁၆) သုးဒ့ (၂) ထီၣ်မၤန့ၢ်၀ဲမီၤနီၤႉ မၤန့ၢ်၀ဲဒၣ်ကျိ (၇) ခိၣ်ႇကျိချံနါက့မၤန့ၢ်၀ဲစ့ၢ်မီၤနီၤႉဘၣ်မနုၤဘၣ်ထီၣ်ဒုးဖျိးကွံာ်၀ဲလဲၣ်န့ၣ် သုးကလၢၤ၀ဲအံၤကဲထီၣ်တၢ်ကီတၢ်ခဲလၢလီၢ်က၀ီၤကမျၢၢ်ကဟးထီၣ်က့ၤလီၤအဂီၢ်မီၤနီၤႉထီၣ်သုးကလၢၤအံၤတံာ်တာ်၀ဲတနၣ်ရံၣ်ဘျဲၣ်လီၤ” အဂ့ၢ်န့ၣ်စံး၀ဲန့ၣ်လီၤႉ
လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ်(သုးက့ ၆)တၢ်ပၢဟီၣ်က၀ီၤ ဃိၣ်သၢဖျၢၣ်၀့ၢ်ဒီးနိၣ်တကီကီၢ်ဆၣ်တဖၣ်အပူၤန့ၣ်တၢ်ဒုးကဲထီၣ်၀ဲလၢပယီၤသုးဒီး(KNLA)တဖၣ်အဘၢၣ်စၢၤအိၣ် ၀ဲတလီၢ်လီၢ်န့ၣ်လီၤႉ
ဖဲတၢ်လဲၤထီၣ်ခးပယီၤသုးကလၢၤအံၤအခါန့ၣ်ဂုၢ်ပူ(နကါတီၤ)ကျိဖးဒိၣ်လူၢ်လၢအိၣ်ဆီလီၤသးဖဲဃိၣ်သၢဖျၢၣ်၀့ၢ်အံၤ ခးလီၤစၢၤ၀ဲကျိဖးဒိၣ်တဖၣ်အဂ့ၢ်န့ၣ်လီၢ်က၀ီၤဖိတဖၣ်စံး၀ဲန့ၣ်လီၤႉ
