Home တၢ်ကစီၣ် KNU ဟီၣ်က၀ီၤအလါ (၂၀) အတီၢ်ပူၤကမျၢၢ်သံ (၁၀၀) ဘျဲၣ်ႇဘၣ်ဃ့ၢ်မှံဟးဖျိး (၃) ကလီၢ်ဘျဲၣ်

KNU ဟီၣ်က၀ီၤအလါ (၂၀) အတီၢ်ပူၤကမျၢၢ်သံ (၁၀၀) ဘျဲၣ်ႇဘၣ်ဃ့ၢ်မှံဟးဖျိး (၃) ကလီၢ်ဘျဲၣ်

702
0

လါစဲးပထ့ဘၢၣ် ၁၄ သီႇ ၂၀၂၂ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤတဖၣ်အပူၤ စးထီၣ်ဖဲအပူၤကွံာ်(၂၀၂၁) လါယနူၤအါရံၤတုၤလၢတနံၣ်အံၤလါအီကူးအလါ(၂၀)အတီၢ်ပူၤ ပယီၤသုးႇသုးခိးကီၢ်ဆၢ(BGF)ဒီး ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်တဖၣ်အဘၢၣ်စၢၤတၢ်ဒုးကဲထီၣ်အဃိကမျၢၢ်ဘၣ်သံ၀ဲ(၁၀၀)ဘျဲၣ်ဒီးဘၣ်ဃ့ၢ်မှံဟးဖျိးအဂၤ(၃)ကလီၢ်ဘျဲၣ်အဂ့ၢ်န့ၣ်ခ့ၣ်အဲၣ်ယူၣ်ထုးထီၣ်ပာ်ဖျါ၀ဲဖဲမဟါလါစဲးပထ့ဘၢၣ် ၁၃ သီအနံၤန့ၣ်လီၤႉ

တချုးဒံးလၢသုးဟံးန့ၢ်ဆူၣ်တၢ်စိတၢ်ကမီၤ(၂၀၂၁)လါယနူၤအါရံၤတုၤလၢသုးဟံးန့ၢ်တၢ်စိတၢ်ကမီၤ၀ံၤအလီၢ်ခံတနံၣ်အံၤလါအီကူးအတီၢ်ပူၤန့ၣ်ခ့ၣ်အဲၣ်ယူၣ်စုတီၤအဖီလာ်သုးကရူၢ်ဒီးပယီၤသုးႇ(BGF)တဖၣ်အဘၢၣ်စၢၤတၢ်ဘၣ်သဂၢၢ်ခးလိာ်သးကဲထီၣ်၀ဲ(၆ႇ၃၅၆)ဘျီအပူၤန့ၣ်ကမျၢၢ်ဘၣ်သံ၀ဲ(၁၃၁)ဂၤႇဘၣ်ဒိ၀ဲ(၂၉၄)ဂၤဒီးဘၣ်ဃ့ၢ်မှံဟးဖျိး၀ဲခဲလၢာ်(၃၇၁၉၅၈)ဂၤအဂ့ၢ်န့ၣ်ခ့ၣ်အဲၣ်ယူၣ်ပာ်ဖျါ၀ဲန့ၣ်လီၤႉ

လၢန့ၣ်အမဲာ်ညါခံခီခံကပၤတၢ်ဒုးကဲထီၣ်အဘျီ(၆)ကထိဘျဲၣ်အပူၤန့ၣ်ပယီၤသုးဒီး(BGF)တကပၤသံ၀ဲ(၅၁၂၅)ဂၤဒီးဘၣ်ဒိ၀ဲ(၄၁၄၇)ဂၤန့ၣ်လီၤႉဒ်န့ၣ်အသိးမ့မ့ၢ်(KNLA)သုးပာ်ဖှိၣ်တကပၤဘၣ်ဟ့ၣ်လီၤကွံာ်အသးသမူလၢထံကီၢ်ဒီးၦၤကလုာ်အဂီၢ်(၁၃၇)ဂၤဒီးဘၣ်ဒိ၀ဲ(၃၅၂)ဂၤအဂ့ၢ်န့ၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ

တၢ်ဒုးကဲထီၣ်လၢအလါ(၂၀)အတီၢ်ပူၤန့ၣ်ပယီၤသုးဒီး(BGF)ခးလီၤ၀ဲကျိဖးဒိၣ်ဆူကမျၢၢ်ဒူသ၀ီတၢ်ဖံးအီၣ်မၤအီၣ်လီၢ်ကျဲခဲလၢာ်(၄ႇ၄၅၆)ဖျၢၣ်ဒီးသုးမီၤစိရိၤကဘီယူၤဟဲခးလီၤတၢ်လၢ(KNLA)ႇ(KNDO)တၢ်လီၢ်ဒီးလၢကမျၢၢ်ဒူသ၀ီတၢ်ဖံးအီၣ်မၤအီၣ်လီၢ်ကျဲခဲလၢာ်(၁၁၇)ဘျီအသိးဖီၣ်၀ဲကမျၢၢ်လၢအတၢ်ကမၣ်တအိၣ်ဘၣ်ခဲလၢာ်(၄၁၂)ဂၤအဂ့ၢ်န့ၣ်ခ့ၣ်အဲၣ်ယူၣ်စံး၀ဲန့ၣ်လီၤႉ

သုးဟံးန့ၢ်တၢ်စိတၢ်ကမီၤ၀ံၤအလီၢ်ခံတၢ်ဒုးဆူၣ်ထီၣ်၀ဲလၢခ့ၣ်အဲၣ်ယူၣ်တၢ်ပၢဟီၣ်က၀ီၤသုးက့(၆)ဘ့ၣ်အပူၤဒီး လၢခ့ၣ်အဲၣ်ယူၣ်(သုးက့ ၁)ႇ(သုးက့ ၃)ႇ(သုးက့ ၅)ဒီး(သုးက့ ၆)ဟီၣ်က၀ီၤအပူၤန့ၣ် တၢ်ဒုးကဲထီၣ်အါကတၢၢ်လီၤဒီး(KNLA)ႇ(KNDO)ထီၣ်ဒုးဖျိးကွံာ်၀ဲသုးမီၤစိရိၤအသုးကလၢၤခဲလၢာ်(၉)ဖျၢၣ်အဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ