ကညီသးစၢ်လၢအိၣ်ဒူသ၀ီပူၤတဖၣ်တဆဲးထီၣ်ကၠိလၢၤဘၣ်ဒီးလဲၤထီၣ်ဃုဖံးဃုမၤတၢ်လၢကီၢ်ကၠီၣ်တဲၣ်ပူၤဟဲအါထီၣ်

လါအီးကထိဘၢၣ် ၁၁ သီႇ ၂၀၂၂ နံၣ်ႇ ခ့ၣ်အဲးစံၣ်

သူၣ်ဘီၣ်သးစၢ်လၢအိၣ်ကညီကီၢ်စဲၣ်ပူၤတဖၣ်အါတက့ၢ်န့ၣ်တဆဲးထီၣ်ကၠိလၢၤဘၣ်ဒီးလဲၤထီၣ်ဃုဖံးဃုမၤက့ၤတၢ်လၢကီၢ်ကၠီၣ်တဲၣ်ပူၤဟဲအါထီၣ်၀ဲအဃိသ၀ီပူၤသးစၢ်တ၀ာ်ဘျဲၣ်န့ၣ်ကဲထီၣ်ခီကီၢ်ၦၤမၤတၢ်ဖိဟဲအါထီၣ်၀ဲအဂ့ၢ်န့ၣ် သ၀ီၦၤဘၣ်မူဘၣ်ဒါတဖၣ်စံး၀ဲအသိးသ့ၣ်ညါဘၣ်န့ၣ်လီၤႉ

သုးဟံးန့ၢ်ဆူၣ်တၢ်စိတၢ်ကမီၤယံၤတနံၣ်ဘျဲၣ်အတီၢ်ပူၤခီဖျိတၢ်ဒုးကဲထီၣ်ႇတၢ်ထၢသုးသီႇတၢ်ဖံးတၢ်မၤကၤထီၣ်ဒီးပယီၤသုးဖီၣ်သမံသမိးလီၢ်က၀ီၤပူၤသူၣ်ဘီၣ်သးစၢ်တဖၣ်ဟဲအါထီၣ်အဃိမိၢ်ပၢ်တဖၣ်ဆှၢထီၣ်အဒံၣ်အဖိဆူကီၢ်ကၠီၣ်တဲၣ်ပူၤဟဲအါထီၣ်၀ဲဒီးသ၀ီပူၤန့ၣ်သးစၢ်အ၀ာ်ဘျဲၣ်ကဲထီၣ်ခီကီၢ်ၦၤမၤတၢ်ဖိဟဲအါထီၣ်၀ဲအဂ့ၢ်န့ၣ် ဖၣ်အၣ်ဟီၣ်က၀ီၤပူၤ သ၀ီၦၤဘၣ်မူဘၣ်ဒါတဂၤစံး၀ဲန့ၣ်လီၤႉ

အ၀ဲစံး၀ဲလၢ“ဖဲပသ၀ီပူၤအံၤသးစၢ်လၢအထီၣ်(ဖၠၣ်စိမိၤ)ကၠိတဖၣ်အါဒၣ်တက့ၢ်န့ၣ်တဆဲးထီၣ်ကၠိလၢၤဘၣ်ႉအ၀ဲသ့ၣ်လဲၤထီၣ်က့ၤလၢယိၤကီၢ်မီၤနီၤႉသုးဟံးန့ၢ်တၢ်စိတၢ်ကမီၤယံၤ(၂)နံၣ်ဃၣ်ဃၣ်အတီၢ်ပူၤအံၤသူဘီၣ်သးစၢ်ပိာ်မုၣ်ပိာ်ခွါတဖၣ်န့ၣ်အမိအပါတဒုးအိၣ်အ၀ဲသ့ၣ်လၢသ၀ီပူၤလၢၤဘၣ်ႉပျံၤ၀ဲလၢ(BGF)ကထၢသုးမီၤနီၤႉသ၀ီပူၤနါက့တၢ်ဖံးတၢ်မၤတအိၣ်ဘၣ်ႉကလဲၤထီၣ်မၤတၢ်လၢ၀့ၢ်ပူၤခီဒၢးပယီၤသုးဖီၣ်သမံသမိးတၢ်ဃ့အီၣ်စ့တလီၢ်လီၢ်အဃိသးစၢ်တဖၣ်လဲၤထီၣ်မၤက့ၤတၢ်လၢယိၤကီၢ်လီၤ”အဂ့ၢ်န့ၣ်စံး၀ဲန့ၣ်လီၤႉ

ကတီၢ်ခဲအံၤလၢသုးမီၤစိရိၤတၢ်ပၢဟီၣ်က၀ီၤအပူၤန့ၣ်ခီဖျိသူၣ်ဘီၣ်သးစၢ်တဖၣ်ဟးထီၣ်က့ၤလီၤတၢ်ဘံၣ်တၢ်ဘၢတအိၣ်လၢၤဘၣ်အဃိဘၣ်လဲၤထီၣ်ဃုဖံးဃုမၤက့ၤတၢ်လၢကီၢ်ကၠီၣ်တဲၣ်ပူၤဒ်ခီကီၢ်ၦၤမၤတၢ်ဖိတဖၣ်အသိးအဂ့ၢ်န့ၣ် သးစၢ်လၢအိၣ်ဖၣ်အၣ်၀့ၢ်ပူၤလၢအလဲၤထီၣ်မၤတၢ်လၢယိၤကီၢ်တဂၤစံး၀ဲဒ်အံၤန့ၣ်လီၤႉ

“ၦၤသူၣ်ဘီၣ်သးစၢ်တဖၣ်န့ၣ်ပယီၤသုးအိၣ်ခိးကွၢ်၀ဲမ့ၢ်အကဲ(PDF)ဧါႇမ့ၢ်အပာ်ဖျါထီၣ်သးဧါႇတၢ်တဂၤအံၤမ့ၢ်အကလဲၤဖဲလဲၣ်ႇမ့ၢ်အမၤမနုၤလဲၣ်ခိးကွၢ်၀ဲဒ်န့ၣ်မီၤနီၤႉလၢထံချီဆၢကျးစဲၢ်ပူၤႇတၢ်အီၣ်ကျးစဲၢ်ပူၤန့ၣ်ပယီၤသုးတၢ်မဲာ်ချံႇဘၠူၣ်စီထံအိၣ်ခိးကွၢ်ဟုၣ်တၢ်ထီဘိလီၤႉနမ့ကလဲၤဖဲအံၤနါက့ပယီၤသုးအိၣ်ခိးသမံသမိးတၢ်ဒီယုၢ်လီၤႉနကဟးအီၣ်တၢ်ဒီးနသကိးဒီဒူၣ်နါက့တန့ၢ်လၢၤဘၣ်ႉတၢ်အဃိန့ၣ်ယဆိမိၣ်မ့လဲၤထီၣ်မၤတၢ်လၢယိၤကီၢ်မးကဂ့ၤဒိၣ်လီၤအဃိယဆဲးကျိးယသကိးလၢအဟဲမၤတၢ်လၢယိၤကီၢ်တဖၣ်ဒီးယဟဲထီၣ်မၤတၢ်လီၤ”အဂ့ၢ်န့ၣ်သးစၢ်လၢအိၣ်ဖၣ်အၣ်၀့ၢ်ပူၤတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ

သုးဟံးန့ၢ်ထံကီၢ်တၢ်စိတၢ်ကမီၤကဲထီၣ်သး၀ံၤအလီၢ်ခံလၢကညီကီၢ်စဲၣ်အပူၤသူၣ်ဘီၣ်သးစၢ်လၢအပၣ်ဃုာ်လၢတၢ်ထီဒါသုးမီၤစိရိၤတၢ်ရဲၣ်တၢ်ကျဲၤအပူၤတဖၣ်အဒၣ်တက့ၢ်န့ၣ်အ၀ဲသ့ၣ်လဲၤအိၣ်ကဒုသးလၢခ့ၣ်အဲၣ်ယူၣ်တၢ်ပၢဟီၣ်က၀ီၤအပူၤဒီးတကးဒံးဘၣ်ပဒိၣ်ၦၤမၤတၢ်ဖိလၢအနုာ်လီၤမၤ(CDM)တဖၣ်စ့ၢ်ကီးလဲၤအိၣ်ကဒုသးလၢတၢ်ပၢၢ်ဆၢအဟီၣ်က၀ီၤပူၤအိၣ်၀ဲန့ၣ်လီၤႉ

ၦၤသ့ၣ်တဖၣ်အံၤဖဲအ၀ဲသ့ၣ်လဲၤအိၣ်ကဒုသးလၢတၢ်ပၢၢ်ဆၢဟီၣ်က၀ီၤပူၤအခါန့ၣ်နုာ်လီၤမၤစၢၤ၀ဲတၢ်ဘၣ်ဃးဟီၣ်က၀ီၤတၢ်ဂုၤထီၣ်ပသီထီၣ်တၢ်ဖံးတၢ်မၤႇဆူၣ်ချ့ႇကူၣ်သ့တၢ်ဖံးတၢ်မၤတဖၣ်ဒီးတနီၤန့ၣ်ဘၣ်အိၣ်ဒံး၀ဲလၢဃိာ်ပူၤအိၣ်၀ဲအဂ့ၢ်န့ၣ် ကညီကီၢ်စဲၣ်ပူၤၦၤဟူးဂဲၤထံရူၢ်ကီၢ်သဲးဖိတဖၣ်စံး၀ဲန့ၣ်လီၤႉ