လါအီးကထိဘၢၣ် ၅ သီႇ ၂၀၂၂ နံၣ်ႇ ခ့ၣ်အဲးစံၣ်
လၢကညီကီၢ်စဲၣ် ကၠၤအ့စ့ၣ်ကၠံ၀့ၢ်ပူၤ ဖဲမဟါလါအီးကထိဘၢၣ် ၄ သီ ႇဂီၤခီ ၁၀ နၣ်ရံၣ်ဒီး မုၢ်ထူၣ် ၁၂ နၣ်ရံၣ်အဆၢကတီၢ်န့ၣ် ပယီၤသုးဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)အဘၢၣ်စၢၤ တၢ်ဘၣ်သဂၢၢ်ခးလိာ်သးကဲထီၣ်၀ဲ(၂)ဘျီအဂ့ၢ်န့ၣ်လီၢ်က၀ီၤဖိတဖၣ်စံး၀ဲန့ၣ်လီၤႉ
ပယီၤသုးခီၣ်သုးရ့ၣ်(ခလရ–၃၂)ႇ(ခလရ–၂၈၄)ႇ(ခလရ–၂၈၃)သုးရ့ၣ်တဖၣ်အံၤ ဖဲအဟဲထီၣ်မၤၦဲၤသုးဂံၢ်ဘါလၢကၠၤအ့စ့ၣ်ကၠံ(ကျိဖးဒိၣ်လူၢ်)အံၤဒီး KNLA သုးရ့ၣ်(၁၇)တဖၣ်အဘၢၣ်စၢၤ တၢ်ခးလိာ်သးကဲထီၣ်၀ဲ(၂)ဘျီဖဲသူလ့ၤလူၢ်သ၀ီချၢဒီးတၢ်သံတၢ်ဘၣ်ဒိဘၣ်ထံးခီန့ၣ်တသ့ၣ်ညါဒံးဘၣ်အဂ့ၢ်န့ၣ် လီၢ်က၀ီၤဖိတဂၤစံး၀ဲဒ်အံၤန့ၣ်လီၤႉ
“တဂီၤအံၤတၢ်ခးလိာ်သးကဲထီၣ် (၂) ဘျီညါမီၤနီၤႉဖဲ ၁၀း၃၀ တုၤလၢ ၁၁း၀၀ န့ၣ်တဘျီဒီးမ့၀ံၤဖဲ ၁၂း၀၀ နၣ်ရံၣ်ဘျဲၣ်န့ၣ်ကဲထီၣ်တဘျီမီၤနီၤႉဖဲမဂီၤန့ၣ်ကဲထီၣ်ဖဲကၠၤအ့–သူလ့ၤလူၢ်သ၀ီတဘျီမီၤနီၤႉမ့မ၀ံၤဖဲ ၁၂ နၣ်ရံၣ်န့ၣ်ကဲထီၣ်ကဒီးဖဲသ၀ီချၢတဘျီမီၤနီၤႉကဲထီၣ်ဒီးပယီၤသုးရ့ၣ် (၃၂)ႇ (၂၈၄)ႇ (၂၈၃) တဖၣ်မီၤနီၤႉမ့မ့ၢ်ဘၣ်ဒိဘၣ်ထံးခီန့ၣ်တသ့ၣ်ညါဒံးဘၣ်” အဂ့ၢ်န့ၣ်စံးဘၣ် ကညီတၢ်ကစီၣ်ဖဲမဟါလါအီးကထိဘၢၣ် ၄ သီအနံၤန့ၣ်လီၤႉ
တၢ်ဒုးကဲထီၣ်၀ံၤအလီၢ်ခံပယီၤသုးကျိဖးဒိၣ်လူၢ်လၢအိၣ်ဆီလီၤသးဖဲကၠၤအ့စ့ၣ်ကၠံ၀့ၢ်အံၤခးလီၤကျိဖးဒိၣ်အဖျၢၣ်(၁၀)ဃၣ်ဃၣ်ဆူ(ကၠၣ်ခၣ်ခၠီ)သ၀ီပူၤဒံးအဂ့ၢ်န့ၣ်လီၢ်က၀ီၤဖိတဖၣ်စံး၀ဲန့ၣ်လီၤႉ
ကတီၢ်ခဲအံၤလၢခ့ၣ်အဲၣ်ယူၣ်(သုးက့ ၆)ဟီၣ်က၀ီၤအပူၤပယီၤသုးဒီးဖီၣ်စုက၀ဲၤကရူၢ်သုးပာ်ဖှိၣ်တဖၣ်အဘၢၣ်စၢၤ တၢ်ဒုးကဲထီၣ်၀ဲကိးမုၢ်နံၤဒဲးဒီးခီဖျိပယီၤသုးအံၤမၤအါထီၣ်အသုးဂံၢ်ဘါကွ့ၢ်ကွ့ၢ်အဃိတၢ်ဒုးဘၣ်ဆူၣ်ထီၣ်၀ဲလီၤအဂ့ၢ်န့ၣ် တၢ်ပၢၢ်ဆၢဖီၣ်စုက၀ဲၤကရူၢ်တဖၣ်စံး၀ဲန့ၣ်လီၤႉ
