လါအီးကထိဘၢၣ် ၅ သီႇ ၂၀၂၂ နံၣ်ႇ ခ့ၣ်အဲးစံၣ်
ပယီၤသုးတြိၤ(၄၄)အသုးတြိၤခိၣ် သုးခိၣ်ကျၢၢ်ဖိ တ့ၤမိနဲၤ လၢအဟံဒုးယၤဂ့ၢ်၀ီမူဒါဖဲကညီကီၢ်စဲၣ် မၠၣ်၀တံၣ်ကီၢ်ဆၣ်အပူၤအံၤ စးထီၣ်လါအီးကထိဘၢၣ် ၂ သီအနံၤန့ၣ် တၢ်ပာ်အိၣ်ဘှံးအီၤလၢအမူဒါလီၢ်လၤပူၤလံအဂ့ၢ်န့ၣ် သ့ၣ်ညါဘၣ်န့ၣ်လီၤႉ
သုးခိၣ်ကျၢၢ်ဖိ တ့ၤမိနဲၤလၢအဟံဒုးယၤဂ့ၢ်၀ီမူဒါဖဲမၠၣ်၀တံၣ် ဖလူ–ဂီၤလ့ၤဟီၣ်က၀ီၤအပူၤအံၤ ခီဖျိအ၀ဲဒုးဟံးထီၣ်ဖီၣ်ထီၣ်ဒုးယၤဂ့ၢ်၀ီမူဒါတလၢၦဲၤဘၣ်ႇသုးဖိနုာ်လီၤမၤ(CDM)ဟဲအါထီၣ်ဒီး(KNU)မၤန့ၢ်ကျိချံၦာ်သၣ်အါအဃိ ဖဲအပူၤကွံာ်လါစဲးပထ့ဘၢၣ်အခါန့ၣ် တၢ်ကိးထံၣ်သမံသမိးအီၤလၢ(န့ၣ်ပၠံၣ်တီၣ်)န့ၣ်လီၤႉ
ဖဲအပူၤကွံာ်လါစဲးပထ့ဘၢၣ် ၉ သီအခါ လၢမၠၣ်၀တံၣ်–ဂီၤလ့ၤကျဲ သဲဖၠူၤခၠီတၢ်လီၢ်န့ၣ် (KNLA) သုးပာ်ဖှိၣ် Cobra သုးကျိၤ ဖီၣ်ချုး၀ဲ သုးတြိၤ(၄၄)စုတီၤအဖီလာ်(ခမရ–၁၀၂)သုးခိၣ်ဒိၣ်ဖိ(၁)ဂၤဃုာ်ဒီးသုးဖိ(၅)ဂၤ ဒီးမၤန့ၢ်စ့ၢ်ကီး၀ဲကျိချံၦာ်သၣ်အါအါဂီၢ်ဂီၢ်ဒံးန့ၣ်လီၤႉ
ဖဲတၢ်ကိးထံၣ်သမံသမိးသုးခိၣ်ကျၢၢ်ဖိ တ့ၤမိနဲၤအကတီၢ်န့ၣ် ဘၣ်ထွဲမၠၣ်၀တံၣ်ဒီးကီးတရံးကီၢ်ဆၣ်ပူၤဒုးယၤဂ့ၢ်၀ီမူဒါတဖၣ်အံၤ မုၢ်ထီၣ်ကလံၤထံးသုး၀ဲၤလီၢ်ခိၣ်သ့ၣ် သုးကီၢ်ခီခိၣ်–၂ ဟဲပၢဆှၢရဲၣ်ကျဲၤ၀ဲတၢ်တစိၢ်တလီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
