ကီးတရံးကမျၢၢ်ၦၤဃ့ၢ်တၢ်ဒုးဖိတကထိၣ်ဘျဲၣ်အဂီၢ်တၢ်လဲၤဆီၣ်ထွဲမၤစၢၤ၀ဲဂ့ၢ်ဂီၢ်အူတၢ်အီၣ်တၢ်အီတဖၣ်

လါနိၣ်၀့ဘၢၣ် ၄ သီႇ ၂၀၂၂ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဖၣ်အၣ်ကီၢ်ရ့ၣ်အပူၤ ဖဲလါနိၣ်၀့ဘၢၣ် ၂ သီအနံၤန့ၣ် ကီးတရံးကီၢ်ဆၣ်လီၢ်က၀ီၤကမျၢၢ်တကထိဘျဲၣ်လၢအဟဲစံၣ်အိၣ်(နဘူကီၢ်ဆၣ်)ပူၤတဖၣ်အံၤအဂီၢ် ကညီပိာ်မုၣ်ကရၢ(KWO)ဒီးလီၢ်က၀ီၤခိၣ်နၢ်တဖၣ်ပာ်ဖှိၣ်ထီၣ်သးလဲၤဆီၣ်ထွဲမၤစၢၤ၀ဲဂ့ၢ်ဂီၢ်အူတၢ်အီၣ်တၢ်အီတဖၣ်န့ၣ်လီၤႉ

စးထီၣ်ဖဲလါအီးကထိဘၢၣ်လၢာ်န့ၣ်ခီဖျိပယီၤသုးခးလီၤကျိဖးဒိၣ်ဒီးကဘီယူၤဟဲတ့ၢ်လီၤမ့ၣ်ပိၢ်လၢသ၀ီပူၤအဃိကီးတရံးကီၢ်ဆၣ်လီၢ်က၀ီၤကမျၢၢ်တဖၣ်လဲၤစံၣ်အိၣ်၀ဲလၢ(နဘူကီၢ်ဆၣ်)အဘူးအတံၢ်သ၀ီဒီးခီဖျိတၢ်လိၣ်တၢ်လဲးအိၣ်ထီၣ်အဃိဘၣ်လဲၤမၤစၢၤ၀ဲဂ့ၢ်ဂီၢ်အူတၢ်အီၣ်တၢ်အီဒ်အံၤလီၤအဂ့ၢ်န့ၣ် ခ့ၣ်အဲၣ်ယူၣ်(နဘူကီၢ်ဆၣ်) ကညီဒီကလုာ်ပၢၤကီၢ်သုး စီၤညၤစ့ၤ စံး၀ဲဒ်အံၤန့ၣ်လီၤႉ

“ပယီၤသုးခးလီၤကျိဖးဒိၣ်လၢသ၀ီပူၤဒီးကဘီယူၤဟဲခးလီၤတၢ်အဃိၦၤဟဲဃ့ၢ်ထီၣ်လၢအံၤဟံၣ်ခိၣ်ခဲလၢာ်ကအိၣ်လၢအကယၤညါဒီးၦၤနီၣ်ဂံၢ်ကအိၣ်လၢအကထိညါမီၤနီၤႉအ၀ဲသ့ၣ်ဟဲစံၣ်အခါန့ၣ်နီၢ်တဂၤဆ့တဘ့ၣ်လီၤအဃိလိၣ်ဘၣ်၀ဲဂ့ၢ်ဂီၢ်အူတၢ်အီၣ်တၢ်အီတဖၣ်မီၤနီၤႉအဃိန့ၣ်ပတီၣ်ဖျါထီၣ်လၢတၢ်ဖီခိၣ်ဒီးပဟဲမၤစၢၤ၀ဲဒ်အံၤလီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ

ခီဖျိတၢ်ဒုးကဲထီၣ်အဃိၦၤလၢအဟဲစံၣ်ထီၣ်လၢ(နဘူကီၢ်ဆၣ်)ပူၤတဖၣ်ဟံၣ်ခိၣ်ခဲလၢာ်အိၣ်၀ဲ(၁၉၃)ဖျၢၣ်ႇၦၤနီၣ်ဂံၢ်အိၣ်၀ဲ(၁၀၈၁)ဒီးဖဲန့ၣ်အကျါပၣ်ဃုာ်၀ဲၦၤသးနံၣ်(၁၈)ဆူဖီလာ်(၅၂၉)ဂၤန့ၣ်လီၤႉကတီၢ်ခဲအံၤခီဖျိတၢ်ဒုးကဲထီၣ်ဒံးအဃိတုၤလၢခဲအံၤအ၀ဲသ့ၣ်က့ၤလၢအဒူသ၀ီတဘူၣ်ဒံးဘၣ်ဒီးၦၤစံၣ်ထီၣ်တဖၣ်အကျါပၣ်ဃုာ်ဖိဒံဖိသၣ်ႇသူၣ်က့သးၦၢ်တဖၣ်အဃိလိၣ်ဘၣ်ဒံး၀ဲကသံၣ်ကသီႇတၢ်အီၣ်တၢ်အီတဖၣ်အဂ့ၢ်န့ၣ် စီၤညၤစ့ၤစံးအါထီၣ်၀ဲန့ၣ်လီၤႉ

ကတီၢ်ခဲအံၤလၢကီးတရံးကီၢ်ဆၣ်အပူၤန့ၣ်တၢ်ဒုးကဲထီၣ်ဒံး၀ဲဒီးဖဲအပူၤကွံာ်စှၤသီအခါစ့ၢ်ကီး ခီဖျိပယီၤသုးခးလီၤကျိဖးဒိၣ်လၢသ၀ီပူၤအဃိကျိဖးဒိၣ်အက့အခီဘၣ်၀ဲ(ယီၣ်ကိာ်)သ၀ီဖံသးၦၢ်အနံၣ်(၆၀)ဘျဲၣ်တဂၤအခီၣ်အဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံး၀ဲအသိးသ့ၣ်ညါဘၣ်န့ၣ်လီၤႉ

ဒ်န့ၣ်အသိးခီဖျိတၢ်ဒုးကဲထီၣ်အဃိလီၢ်က၀ီၤကမျၢၢ်တဖၣ်အိၣ်လၢအဟံၣ်တဘူၣ်လၢၤဘၣ်အသိး တၢ်ဆၢကတီၢ်စ့ၢ်ကီးဘၣ်လၢကဘၣ်ထုးဖှိၣ်ပာ်ဖှိၣ်ဘုလံဘၣ်ဆၣ်ခီဖျိအ၀ဲသ့ၣ်တကူးဘၣ်ဘုဒံးဘၣ်အဃိ ကျီၢ်ပနၢ်နုာ်လီၤအီၣ်အ၀ဲသ့ၣ်တၢ်မုၢ်တၢ်ဘိတၢ်ချံတၢ်သၣ်ဟးဂီၤ၀ဲအိၣ်အဂ့ၢ်န့ၣ် ကမျၢၢ်လၢအဃ့ၢ်တၢ်ဒုးတဖၣ်စံး၀ဲန့ၣ်လီၤႉ