ခီဖျိပယီၤသုးနုာ်လီၤလၢကတၢၢ်တံာ်သ၀ီပူၤအဃိလီၢ်က၀ီၤကမျၢၢ်ဘၣ်ဃ့ၢ်ထီၣ်

လါနိၣ်၀့ဘၢၣ် ၈ သီႇ ၂၀၂၂ နံၣ်ႇ ခ့ၣ်အဲးစံၣ်

လၢကညီကီၢ်စဲၣ် ကတၢၢ်တံာ်သ၀ီအပူၤ ဖဲလါနိၣ်၀့ဘၢၣ် ၆ သီအနံၤန့ၣ် တၢ်ဒုးကဲထီၣ်လၢခံခီခံကပၤအဘၢၣ်စၢၤ၀ံၤအလီၢ်ခံခီဖျိပယီၤသုးနုာ်လီၤလၢသ၀ီပူၤအဃိ လီၢ်က၀ီၤကမျၢၢ်တဖၣ်ဘၣ်ဃ့ၢ်ထီၣ်၀ဲအဂ့ၢ်န့ၣ်သ့ၣ်ညါဘၣ်န့ၣ်လီၤႉ

လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)ဟီၣ်က၀ီၤအပူၤ ဖဲလါနိၣ်၀့ဘၢၣ် ၆ သီ ဟါခီအဆၢကတီၢ်န့ၣ်ပယီၤသုးနုာ်လီၤလၢကတၢၢ်တံာ်သ၀ီပူၤအဂၤ(၄၀)ဃၣ်ဃၣ်ဒီးကဘီယူၤစ့ၢ်ကီးဟဲတ့ၢ်လီၤမ့ၣ်ပိၢ်အဃိလီၢ်က၀ီၤကမျၢၢ်ဘၣ်ဃ့ၢ်ထီၣ်၀ဲအဂ့ၢ်န့ၣ်လီၢ်က၀ီၤဖိတဂၤစံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“ဖဲမုၢ်ဟါလီၤ ၄ နၣ်ရံၣ်အခါန့ၣ် ပယီၤသုးကဘီယူၤ(၂)ဘ့ၣ်ဒီးဒုးသုးကဘီယူၤတဘ့ၣ် ဟဲခးလီၤတၢ်ႉခဲအံၤပယီၤသုးနါက့ဟဲနုာ်လီၤလၢကတၢၢ်တံာ်သ၀ီပူၤလံႉသ၀ီဖိတဖၣ်ဘၣ်အိၣ်၀ဲလၢဖၣ်ပူၣ်–ကမၤမိၣ်ကျဲကပၤၦၢ်ပူၤဒ်န့ၣ်လီၤမီၤနီၤႉပယီၤသုးကအိၣ်လၢအဂၤ(၄၀)ညါႉခဲအံၤၦၤလၢအိၣ်တ့ၢ်လၢသ၀ီပူၤညါအိၣ်တ့ၢ်ႉလၢသ၀ီပူၤန့ၣ်ၦၤခူၣ်မၤဂ့ၤထီၣ်တၢ်ပူၤလံမီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲမဟါန့ၣ်လီၤႉ

ပယီၤသုးလၢအနုာ်လီၤလၢဖၣ်ပူၣ်–ကမၤမိၢ်ကျဲ စ့ၤစွဲၤသ၀ီဒီးတီၤသူၤသ၀ီအဘၢၣ်စၢၤတဖၣ်အံၤ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)အိၣ်ခိးခးအ၀ဲသ့ၣ်လၢတၢ်ဘၢၣ်စၢၤတၢ်ဒုးကဲထီၣ်အဃိ ကတၢၢ်တံာ်သုးခိးကီၢ်ဆၢ(BGF)စ့ၢ်ကီးခးလီၤစၢၤကျိဖးဒိၣ်ဆူတၢ်ဒုးကဲထီၣ်အလီၢ်ကအိၣ်အဘျီ(၂၀)ဃၣ်ဃၣ်ညါအဂ့ၢ်န့ၣ် လီၢ်က၀ီၤကမျၢၢ်တဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ

ဒ်န့ၣ်အသိးဖဲစှၤသီအတီၢ်ပူၤအံၤပယီၤသုးမၤအါထီၣ်အသုးဂံၢ်ဘါလၢဖၣ်ပူၣ်–ကမၤမိၢ်သ၀ီတဖၣ်အပူၤ ဟဲအါထီၣ်၀ဲဒီးဒိးလီၤစ့ၢ်ကီးဟီၣ်လာ်မ့ၣ်ပိၢ်လၢကျဲမုၢ်ဒီတဘိအဂ့ၢ်န့ၣ် လီၢ်က၀ီၤကမျၢၢ်တဖၣ်စံး၀ဲန့ၣ်လီၤႉ

တၢ်ဒုးကဲထီၣ်ဖဲလါနိၣ်၀့ဘၢၣ် ၆ သီဘျီ၀ဲန့ၣ်အပူၤပယီၤသုးသံ၀ဲ(၂)ဂၤဒီးဘၣ်ဒိ၀ဲ(၈)ဂၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ

ဖဲအပူၤကွံာ်လါအီကူး ၂၁ သီအနံၤစ့ၢ်ကီး (KNLA)ထီၣ်မၤန့ၢ်၀ဲကတၢၢ်တံာ်သ၀ီကရူၢ်(BGF)သုးကလၢၤဖိ တဖျၢၣ်ဒီးမၤန့ၢ်ဃုာ်စ့ၢ်ကီး၀ဲကျိချံၦာ်သၣ်တနီၤအဂ့ၢ်န့ၣ် ခ့ၣ်အဲၣ်ယူၣ်(သုးက့ ၅)ထုးထီၣ်ပာ်ဖျါ၀ဲန့ၣ်လီၤႉ