လါနိၣ်၀့ဘၢၣ် ၈ သီႇ ၂၀၂၂ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ကီၢ်သလ့ၤတၢ်ပၢဟီၣ်က၀ီၤအပူၤ ဖဲအပူၤကွံာ်လါအီးကထိဘၢၣ်တလါအတီၢ်ပူၤခီဖျိပယီၤသုးပာ်ဖှိၣ်ခးလီၤကျိဖးဒိၣ်အဃိကမျၢၢ်ဘၣ်သံ(၁၃)ဂၤ အဂ့ၢ်န့ၣ်ခ့ၣ်အဲၣ်ယူၣ်ထုးထီၣ်ပာ်ဖျါ၀ဲဖဲလါနိၣ်၀့ဘၢၣ် ၆ သီအနံၤန့ၣ်လီၤႉ
လၢခ့ၣ်အဲၣ်ယူၣ်တၢ်ပၢဟီၣ်က၀ီၤအပူၤ ပယီၤသုးႇသုးခိးကီၢ်ဆၢ(BGF)ဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA)ႇကညီဒီကလုာ်ဂၢၤသးကရၢ(KNDO)သုးပာ်ဖှိၣ်အဘၢၣ်စၢၤတၢ်ဒုးကဲထီၣ်၀ံၤအလီၢ်ခံ ခီဖျိပယီၤသုးတကပၤခးလီၤကျိဖးဒိၣ်ဆူသ၀ီတဖၣ်အပူၤတကးဒံးဘၣ်အမဲာ်ညါခီဖျိကဘီယူၤစ့ၢ်ကီး ဟဲခးလီၤတၢ်အဃိကမျၢၢ်တၢ်သံတၢ်ဘၣ်ဒိဘၣ်ထံးဘၣ်အါ၀ဲဒ်အံၤလီၤအဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ
ကမျၢၢ်သံတဖၣ်အကျါတနီၤန့ၣ်ဘၣ်၀ဲဒီးပယီၤသုးအကျိဖးဒိၣ်အိၣ်၀ဲအသိးတနီၤန့ၣ်ဘၣ်တၢ်မၤသံအီၤဆှူၣ်မဲာ်ကဲာ်မဲာ်လၢတၢ်ဂ့ၢ်တအိၣ်နီတမံၤဘၣ်ဒီးကမျၢၢ်ဘၣ်ဒိဘၣ်ထံး၀ဲ(၄၆)ဂၤအဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါပူၤအသိးသ့ၣ် ညါဘၣ်န့ၣ်လီၤႉ
ခီဖျိပယီၤသုးခးလီၤကျိဖးဒိၣ်ဆူဒူသ၀ီတၢ်ဖံးအီၣ်မၤအီၣ်လီၢ်ကျဲအဃိဘၣ်ဟးဂီၤ၀ဲကမျၢၢ်အဟံၣ်အဃီတနီၤအသိးလၢခ့ၣ်အဲၣ်ယူၣ်(သုးက့ ၁)ဟီၣ်က၀ီၤပူၤစ့ၢ်ကီးပယီၤသုးဒီး(BGF)ဒွဲၣ်အူအီၣ်၀ဲကမျၢၢ်အဟံၣ်(၁၈)ဖျၢၣ်ဒီး လၢချၢၣ်လွံၢ်ထူၣ်ကီၢ်ရ့ၣ်ပူၤစ့ၢ်ကီးဒွဲၣ်အူအီၣ်၀ဲကမျၢၢ်အဟံၣ်(၆)ဖျၢၣ်အဂ့ၢ်န့ၣ် ခ့ၣ်အဲၣ်ယူၣ်စံး၀ဲန့ၣ်လီၤႉ
ကတီၢ်ခဲအံၤတၢ်ဆၢကတီၢ်တုၤဃီၤလၢလီၢ်က၀ီၤကမျၢၢ်ကဘၣ်ကူးဘုပာ်ဖှိၣ်ဘုလံဘၣ်ဆၣ် လၢခ့ၣ်အဲၣ်ယူၣ်ချၢၣ်လွံၢ်ထူၣ်ကီၢ်ရ့ၣ်(မိကီၢ်ဆၣ်)ပူၤန့ၣ် ခီဖျိပယီၤသုးတပျဲကမျၢၢ်လၢကကူးဘုဘၣ်အဃိ ကမျၢၢ်တဖၣ်ထံၣ်ဘၣ်၀ဲတၢ်လုၢ်အီၣ်နီၢ်ခိသးသမူတၢ်ကီတၢ်ခဲတဖၣ်အဂ့ၢ်န့ၣ်လီၢ်က၀ီၤကမျၢၢ်တဖၣ်စံး၀ဲန့ၣ်လီၤႉ
ဖဲအပူၤကွံာ်လါစဲးပထ့ဘၢၣ်အခါစ့ၢ်ကီးလၢခ့ၣ်အဲၣ်ယူၣ်တၢ်ပၢဟီၣ်က၀ီၤအပူၤခီဖျိပယီၤသုးကဘီယူၤဟဲခးလီၤတၢ်ဒီးခးလီၤကျိဖးဒိၣ်အဃိကမျၢၢ်သံ(၆)ဂၤႇဘၣ်ဒိ(၁၁)ဂၤအဂ့ၢ်န့ၣ်ခ့ၣ်အဲၣ်ယူၣ်ထုးထီၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ
လၢခ့ၣ်အဲၣ်ယူၣ်တၢ်ပၢဟီၣ်က၀ီၤအပူၤပယီၤသုးသုးရ့ၣ်(၅၀)ဘျဲၣ်ဒီးဟီၣ်က၀ီၤသုးခိးကီၢ်ဆၢ(BGF)သုးရ့ၣ်(၄)ရ့ၣ်ပာ်ဖှိၣ်ထီၣ်သးနုာ်လီၤမၤ၀ဲဒုးယၤတၢ်ဟူးတၢ်ဂဲၤအဃိဖဲအပူၤကွံာ်လါအီးကထိဘၢၣ်အတီၢ်ပူၤန့ၣ်တၢ်ဒုးကဲထီၣ်၀ဲ(၂၈၆)ဘျီဒီးပယီၤသုးကဘီယူၤဟဲခးလီၤတၢ်(၆)ဘျီအဂ့ၢ်န့ၣ််ခ့ၣ်အဲၣ်ယူၣ်ထုးထီၣ်ပာ်ဖျါ၀ဲန့ၣ်လီၤႉ
စးထီၣ်ဖဲတနံၣ်အံၤလါယနူၤအါရံၤတုၤလၢလါအီးကထိဘၢၣ်န့ၣ်ပယီၤသုးဒီးဟီၣ်က၀ီၤ(KNLA)သုးပာ်ဖှိၣ်အဘၢၣ်စၢၤတၢ်ဒုးကဲထီၣ်၀ဲ(၃၈၄၅)ဘျီဒီးဖဲန့ၣ်ပယီၤသုးႇ(BGF)တကပၤသံ၀ဲ(၃၆၆၄)ဂၤႇဘၣ်ဒိ၀ဲ(၂၇၀၀)ဂၤအဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
ဖဲအပူၤကွံာ်(၂၀၂၁)တနံၣ်အတီၢ်ပူၤလၢခ့ၣ်အဲၣ်ယူၣ်တၢ်ပၢဟီၣ်က၀ီၤတဖၣ်အပူၤတၢ်ဒုးကဲထီၣ်၀ဲ(၃၁၅၂)ဘျီဒီး ဖဲန့ၣ်ပယီၤသုးဒီးအစုတီၤဖီလာ်သုးခိးကီၢ်ဆၢ(BGF)တကပၤသံ၀ဲ(၂၁၉၀)ဂၤႇဘၣ်ဒိ(၂၀၄၈)ဂၤအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲန့ၣ်လီၤႉ
