လါနိၣ်၀့ဘၢၣ် ၁၄ သီႇ ၂၀၂၂ နံၣ်ႇ ခ့ၣ်အဲးစံၣ်
ဖဲအပူၤကွံာ်လါနိၣ်၀့ဘၢၣ် ၁၂ သီ ဂီၤခီအဆၢကတီၢ်န့ၣ် KNLA (သုးက့ ၆) သုးရ့ၣ်(၁၇)သုးပာ်ဖှိၣ် နုာ်လီၤခး၀ဲ(ကၠဲၣ်မယီကီၢ်ဆၣ်) ခၠီနခွၣ်ပၢၤကီၢ်၀ဲၤလီၢ်ဒီး ပၢၤကီၢ်သံ(၃)ဂၤအကျါပၣ်ဃုာ်၀ဲပၢၤကီၢ်ခိၣ်တဂၤဒီး ဖီၣ်သမူန့ၢ်၀ဲ(၄)ဂၤအဂ့ၢ်န့ၣ် သ့ၣ်ညါဘၣ်လၢတၢ်ပၢၢ်ဆၢသုးပာ်ဖှိၣ်ကရူၢ်အအိၣ်န့ၣ်လီၤႉ
ပယီၤသုးလၢတၢ်ဖီၣ်သမူန့ၢ်၀ဲတဖၣ်န့ၣ်မ့ၢ်၀ဲပၢၤကီၢ်သုးစကီၤအ့ကိၤႇသုးဖိလွ့ၤကိၤဟ့ႇသုးစကီၤပြံမၠိအ့ႇ သုးဖိကိၤလ့သ့ၣ်တဖၣ်ဒီးအသံတဖၣ်မ့ၢ်၀ဲပၢၤကီၢ်ခိၣ်လၣ်ကၠီၤအူႇသုးစကီၤပြံစိည့အူဒီးသုးဖိအီၤနါစိၤသ့ၣ်တဖၣ်န့ၣ်လီၤႉတကးဒံးဘၣ်အမဲာ်ညါတၢ်မၤန့ၢ်၀ဲ(AK-47)တခိၣ်ႇ(M-16)လွံၢ်ခိၣ်ႇ(G-3)တခိၣ်ႇ(၆၀ မမ)ကျိဖုၣ် တခိၣ်ႇ မ့ၣ်ပိၢ်ခံဖျၢၣ်ဒီးကျိချံၦာ်သၣ်တဖၣ်အဂ့ၢ်န့ၣ် ပယိၤဂီၤသုးကျိၤၦၤကတိၤတၢ်ပၢတဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ် ဒ်အံၤန့ၣ်လီၤႉ
KNLA သုးရ့ၣ်(၁၇) ပယိၤဂီၤသုးကျိၤ ၦၤကတိၤတၢ်ပၢ စီၤအဲၣ် စံး၀ဲလၢ“ပဖီၣ်န့ၢ်၀ဲဒၣ်ပၢၤကီၢ်(၄)ဂၤႉ လၢပ၀ဲတကပၤန့ၣ်တၢ်ဘၣ်ဒိဘၣ်ထံးတအိၣ်ဘၣ်ႉ(စကစ)အစိၤအံၤၦၤကညီတၢ်အိၣ်မူတၢ်ဂဲၤႇပၢၢ်တုၤလၢမုၢ်ကျိၤ၀ဲၤကွာ်န့ၣ်တၢ်ဘံၣ်တၢ်ဘၢတအိၣ်လၢၤဘၣ်ဒီးဒ်သိးတၢ်သ့ၣ်တဖၣ်အံၤပလဲၤခီပတာ်အီၤကန့ၢ်အဂီၢ်န့ၣ်ပကကွၢ်ဆၢၣ်မဲာ်သကိးတၢ်ကီတၢ်ခဲသ့ၣ်တဖၣ်အံၤဒီးဒ်သိးတၢ်ပၢၢ်ဆၢကကတၢၢ်ကွံာ်လၢအဆိအချ့အဂီၢ်န့ၣ်ပကပာ်ဖှိၣ်မၤသကိးတၢ်ခဲလၢာ်”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲမဟါလါနိၣ်၀့ဘၢၣ် ၁၃ သီအနံၤန့ၣ်လီၤႉ
တၢ်ဒုးကဲထီၣ်လၢခၠီနခွၣ်ပၢၤကီၢ်၀ဲၤလီၢ်ကရၢၢ်ပူၤကဲထီၣ်သး၀ံၤအလီၢ်ခံခီဖျိပယီၤသုးကဘီယူၤ(၂)ဘ့ၣ်ဟဲတ့ၢ်လီၤမ့ၣ်ပိၢ်လၢသ၀ီလၢအိၣ်ဘူးပၢၤကီၢ်၀ဲၤလီၢ်အခိၣ်အဃၢၤတဖၣ်ကအိၣ်(၁၃)ဘျီညါအဃိဘၣ်ဒိ၀ဲသီခါ(၁)ပါဒီးသ၀ီဖိတဂၤအသိးလီၢ်က၀ီၤကမျၢၢ်ဘၣ်ဃ့ၢ်ထီၣ်၀ဲအဂၤ(၅၀၀)ဘျဲၣ်အဂ့ၢ်န့ၣ် သ့ၣ်ညါဘၣ်လၢၦၤမၤစၢၤၦၤဃ့ၢ်မှံဟးဖျိးတဖၣ်အအိၣ် န့ၣ်လီၤႉ
(ခၠီနခွၣ်သ၀ီ) ပၢၤကီၢ်၀ဲၤလီၢ်ဒီးတိၤတၢ်ဘံၣ်တၢ်ဘၢတြဲၤ(gate)တၢ်လီၢ်သ့ၣ်တဖၣ်အံၤန့ၣ် ကညီသုးခိးကီၢ်ဆၢ (BGF)ႇပၢၤကီၢ်ႇပယီၤသုးတဖၣ်အိၣ်ဆီလီၤသးဟံး၀ဲတၢ်ဘံၣ်တၢ်ဘၢဒီးဖဲအပူၤကွံာ်လါမ့ၤအခါစ့ၢ်ကီးတၢ်ပၢၢ်ဆၢကရူၢ်သုးပာ်ဖှိၣ်နုာ်လီၤခး၀ဲခၠီနခွၣ်တိၤတၢ်ဘံၣ်တၢ်ဘၢတြဲၤ(gate)တၢ်လီၢ်တခါအဃိ ပယီၤသုးသံ (၅) ဂၤဒံးအဂ့ၢ်န့ၣ် သ့ၣ်ညါဘၣ်န့ၣ်လီၤႉ
