လါဒံၣ်စ့ဘၢၣ် ၂၁ သီႇ ၂၀၂၂ သီႇ ခ့ၣ်အဲးစံၣ်
လၢတလၢၤကီၢ်စဲၣ် ယ့ကီၢ်ဆၣ်အပူၤ (ယ့ဘလူ)ကရူၢ်လဲၤခးပယီၤသုးခီၣ်ချ့သုးရ့ၣ်(ခလရ–၅၈၆)အဃိ ပယီၤသုးသံ(၄)ဂၤဒီးဘၣ်ဒိနးနးကျံၤကျံၤ(၃)ဂၤအဂ့ၢ်န့ၣ် ယ့ဘလူကရူၢ်အခိၣ်စံး၀ဲန့ၣ်လီၤႉ
ဖဲမဟါလါဒံၣ်စ့ဘၢၣ် ၂၀ သီ မုၢ်ထူၣ် ၁၁း၅၀ မံးနံးဃၣ်ဃၣ်အဆၢကတီၢ် ပယီၤသုး(ခလရ–၅၈၆)သုးရ့ၣ်လၢ အိၣ်ဆီလီၤသးဖဲယ့၀့ၢ်ကပၤအံၤ ယ့ဘလူကရူၢ်လဲၤခးအ၀ဲသ့ၣ်ဒီး(RPG)ကျိဖးဒိၣ်ႇကျိဖိတဖၣ်အဂ့ၢ်န့ၣ် ယ့ဘလူကရူၢ်အခိၣ်တဂၤစံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“ပ၀ဲဒၣ်(ယ့ဘလူ)ကရူၢ်သူ၀ဲဒၣ်(RPG)ဒီးပလဲၤနုာ်လီၤခးပယီၤသုး(၅၈၆)မီၤနီၤႉပခး(RPG)န့ၣ်လဲၤလီၤတဲာ်၀ဲလၢအ၀ဲသ့ၣ်ဒုးယၤ(ဗန်ကာ)အဃိအ၀ဲသ့ၣ်သံဘၣ်ဒိဘၣ်ထံးအါမီၤနီၤႉအသံ(၄)ဂၤဘၣ်ဒိနးနး(၃)ဂၤ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
တၢ်ခးလိာ်သးကဲထီၣ်ဘျီ၀ဲအံၤ(ယ့ဘလူ)ကရူၢ်တကပၤတၢ်သံဘၣ်ဒိဘၣ်ထံးတအိၣ်၀ဲဘၣ်ဒီး က့ၤကဒါဆူအ၀ဲသ့ၣ်သုးကလၢၤတၢ်လီၢ်ဂ့ၤဂ့ၤလီၤအဂ့ၢ်န့ၣ်အ၀ဲစံးအါထီၣ်၀ဲန့ၣ်လီၤႉ
ဒ်န့ၣ်အသိးဖဲအပူၤကွံာ်လါနိၣ်၀့ဘၢၣ်အခါစ့ၢ်ကီး(ယ့ဘလူ)ကရူၢ်အိၣ်ခိးခး၀ဲပၢၤကီၢ်ခိၣ်အသိလ့ၣ်အဃိ ပယီၤသုးသံ(၃)ဂၤဒီးမၤန့ၢ်၀ဲကျိဖိတခိၣ်အဂ့ၢ်န့ၣ်(ယ့ဘလူ)ကရူၢ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
