ကဘီယူၤမ့ၣ်ပိၢ်ချံလၢအတပိၢ်ဖးထီၣ်ဒံးဘၣ်အိၣ်အဃိကမျၢၢ်တဖၣ်ဟဲက့ၤအိၣ်လၢသ၀ီပူၤတဘူၣ်ဒံးဘၣ်

လါယနူၤအါရံၤ ၆ သီႇ ၂၀၂၃ နံၣ်ႇ ခ့ၣ်အဲးစံၣ်

လၢကီးတရံး၀့ၢ်ဃၢၤ(ယွၤသ့ၣ်ကိ)သ၀ီအပူၤန့ၣ်ခီဖျိကဘီယူၤမ့ၣ်ပိၢ်ချံလၢအတပိၢ်ဖးထီၣ်ဒံးဘၣ်အိၣ် (၆)ဖျၢၣ်ဃၣ်ဃၣ်ညါအဃိလီၢ်က၀ီၤသ၀ီဖိတဖၣ်အံၤဟဲက့ၤအိၣ်လၢသ၀ီပူၤတဘူၣ်ဒံး၀ဲဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဖဲအပူၤကွံာ်လါဒံၣ်စ့ဘၢၣ် ၁၆ သီအနံၤန့ၣ် လၢကီးတရံး၀့ၢ်ခိၣ်၀့ၢ်ဃၢၤသ၀ီတဖၣ်အပူၤ တၢ်ဒုးကဲထီၣ်၀ဲလၢတၢ်ပၢၢ်ဆၢသုးပာ်ဖှိၣ်ကရူၢ်ဒီးပယီၤသုးတဖၣ်အဘၢၣ်စၢၤအဃိပယီၤသုးခးလီၤကျိဖးဒိၣ်ဆူသ၀ီပူၤတကးဒံးဘၣ်အမဲာ်ညါသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်ဒိၣ်ဒိၣ်မုၢ်မုၢ်ဒံးန့ၣ်လီၤႉ

စှၤသီအတီၢ်ပူၤအံၤခီဖျိတၢ်ဒုးကဲထီၣ်တအိၣ်အါအါလၢၤ၀ဲဘၣ်အဃိသ၀ီဖိတဖၣ်ရဲၣ်ကျဲၤလၢကဟဲက့ၤအိၣ်လၢသ၀ီပူၤဘၣ်ဆၣ်ခီဖျိမ့ၣ်ပိၢ်ဒီးကဘီယူၤမ့ၣ်ပိၢ်ချံလၢအတပိၢ်ဖးထီၣ်ဒံးဘၣ်အိၣ်ဒံး၀ဲဒီးတၢ်ဘံၣ်တၢ်ဘၢတအိၣ်ဒံးဘၣ်အဃိအ၀ဲသ့ၣ်ဘၣ်ဟးစံၣ်ပလဲာ်သးဒံး၀ဲအဂ့ၢ်န့ၣ်သ၀ီဖိတဂၤစံး၀ဲဒ်အံၤန့ၣ်လီၤႉ

“ၦၤဃ့ၢ်ထီၣ်အကျါအံၤပၣ်ဃုာ်ဒီးၦၤအိၣ်တဆူၣ်အိၣ်တချ့ဘၣ်အဃိပဟးအိၣ်လၢၦၢ်ပူၤတဘၣ်ဂီၢ်ဘၣ်ဒီးပဟဲက့ၤအိၣ်လၢသ၀ီပူၤလီၤႉပဟဲက့ၤတုၤလၢသ၀ီဘျီပထံၣ်ၦၤဟံၣ်ၦၤဃီဟးဂီၤဒီဒူၣ်ညါႉဟံၣ်လၢတၢ်နုာ်လီၤဟုၣ်တၢ်နါက့အိၣ်စ့ၢ်ႉမ့ၣ်ပိၢ်ချံလၢကဘီယူၤဟဲတ့ၢ်လီၤ၀ဲလၢအတပိၢ်ဖးထီၣ်ဒံးဘၣ်နါက့အိၣ်ဒံးႉပယီၤသုးနါက့အိၣ်ဒံးလၢတၢ်ခိၣ်တၢ်ဃၢၤဖဲအံၤအဃိဘၣ်ယိၣ်လၢတၢ်ဒုးကကဲထီၣ်ကဒီးအဃိပလဲၤစံၣ်အိၣ်က့ၤလၢပလ့ၢ်လိၤလ့ၢ်ထီၣ်ညီအလီၢ်မီၤနီၤ” အဂ့ၢ်န့ၣ်စံး၀ဲန့ၣ်လီၤႉ

တၢ်ဒုးကဲထီၣ်လၢကီးတရံး၀့ၢ်ခိၣ်၀့ၢ်ဃၢၤအခါခီဖျိပယီၤသုးခးလီၤကျိဖးဒိၣ်ဆူသ၀ီပူၤဒီးကဘီယူၤစ့ၢ်ကီးဟဲတ့ၢ်လီၤမ့ၣ်ပိၢ်တပယူာ်ဃီအဃိလီၢ်က၀ီၤကမျၢၢ်သံဘၣ်ဒိဘၣ်ထံးဒီးဟံၣ်ဃီတၢ်သူၣ်ထီၣ်ႇတၢ်ဖံးအီၣ်မၤအီၣ်လီၢ်ဟးဂီၤ၀ဲအါမးန့ၣ်လီၤႉတကးဒံးဘၣ်ဆၣ်ဖိကီၢ်ဖိလၢၦၤဘုၣ်လၢဟံၣ်တဖၣ်စ့ၢ်ကီးသံဘၣ်ဒိဘၣ်ထံး၀ဲအါအါဂီၢ်ဂီၢ်ဒီးတၢ်ထံၣ်န့ၢ်၀ဲကဘီယူၤမ့ၣ်ပိၢ်ချံလၢအတပိၢ်ဖးထီၣ်ဒံးဘၣ်အိၣ်(၆)ဖျၢၣ်ညါအဂ့ၢ်န့ၣ်လီၢ်က၀ီၤကမျၢၢ်စံး၀ဲန့ၣ်လီၤႉ

သ၀ီဖိလၢတအဲၣ်ဒိးပာ်ဖျါအမံၤလၢအဂၤတဂၤစ့ၢ်ကီးစံး၀ဲ“လၢသ၀ီပူၤန့ၣ်ၦၤထံၣ်ကဘီယူၤမ့ၣ်ပိၢ်ချံအလၢတပိၢ်ဖးထီၣ်ဒံးဘၣ်အိၣ်(၆)ဖျၢၣ်ညါႉအ၀ဲတဖျၢၣ်န့ၣ်ကအိၣ်လၢအပီၣ်(၅၀၀)ညါတသ့ၣ်ညါဘၣ်ႉမ့ၣ်ပိၢ်ချံအံၤၦၤကညီဘၣ်ယိးအီၤ(၈)ဂၤညါႉလၢအ၀ဲတဖၣ်န့ၣ်ခီၦၤဘၣ်ယိးကအိၣ်(၂)လီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

ဒ်ပဒိးန့ၢ်ဘၣ်တၢ်ကစီၣ်လၢလီၢ်ခံကတၢၢ်အသိးန့ၣ်ဖဲလါယနူၤအါရံၤ ၅ သီအနံၤ လီၢ်က၀ီၤသ၀ီဖိတနီၤဟဲက့ၤအိၣ်လၢအ၀ဲသ့ၣ်အဟံၣ်အဃီဒူသ၀ီပူၤလံဒီးလၢအအိၣ်တ့ၢ်တဖၣ်အါဒၣ်တက့ၢ်န့ၣ်ဘၣ်ဟးစံၣ်ဒံး၀ဲအဖၢမုၢ်န့ၣ်လီၤႉ

စးထီၣ်ဖဲအပူၤကွံာ်လါဒံၣ်စ့ဘၢၣ်လါတ၀ာ်အခါန့ၣ်ခီဖျိတၢ်ဒုးဆူၣ်ထီၣ်လၢကီးတရံး၀့ၢ်ပူၤအဃိ တၢ်ကးတံၢ်ကွံာ်၀ဲအ့ရှါကျဲမုၢ်ဖးဒိၣ်အံၤဒီးဖဲလါယနူၤအါရံၤ ၄ သီ ဂီၤခီအဆၢကတီၢ်န့ၣ် တၢ်က့ၤအိးထီၣ်ကဒါကျဲအံၤကအိၣ်လၢအမံးနံးအတီၢ်ပူၤ၀ံၤတၢ်က့ၤကးတံၢ်ကွံာ်အီၤလီၤအဂ့ၢ်န့ၣ် ကမျၢၢ်လၢအိၣ်ကီးတရံး၀့ၢ်ပူၤတဖၣ်စံး၀ဲန့ၣ်လီၤႉ

ဒ်န့ၣ်အသိးလၢကၠၤအ့စ့ၣ်ကၠံ၀့ၢ်ပူၤစ့ၢ်ကီးတၢ်ဒုးကဲထီၣ်၀ဲဒိၣ်ဒိၣ်မုၢ်မုၢ်ဒီးခီဖျိသုးမီၤစိရိၤကဘီယူၤဟဲခးလီၤတၢ်အဆၢတတဲာ်ဘၣ်အဃိလီၢ်က၀ီၤကမျၢၢ်ဘၣ်ဃ့ၢ်ထီၣ်၀ဲအါအါဂီၢ်ဂီၢ်အဂ့ၢ်န့ၣ်သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ