တၢ်ဒုးကဲထီၣ်လၢကြုၢ်တုအခါခီဖျိကျိဖးဒိၣ်အဃိမ့ၣ်အူအီၣ်ကမျၢၢ်အဟံၣ်အဃီ

လါယနူၤအါရံၤ ၂၅ သီႇ ၂၀၂၃ နံၣ်ႇ ခ့ၣ်အဲးစံၣ်

ကီးတရံးကီၢ်ဆၣ် ကြုၢ်တုဟီၣ်က၀ီၤအပူၤ လၢ(ကၠဲ)ထံကျိ၀ၢ်ခီ ကါနံၤ–ညီၤယ့ၣ်သၤႇ ကီၣ်ကၤႇ သယဲၣ်တီသ၀ီတကပၤန့ၣ် တၢ်ဒုးကဲထီၣ်၀ဲလၢပယီၤသုးဒီးတၢ်ပၢၢ်ဆၢသုးပာ်ဖှိၣ်အဘၢၣ်စၢၤဒီး ခီဖျိကျိဖးဒိၣ်အဃိမ့ၣ်အူအီၣ်၀ဲသ၀ီဖိအဟံၣ်အဃီတဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

စးထီၣ်လါယနူၤအါရံၤ ၂၂ သီတုၤလၢလါယနူၤအါရံၤ ၂၄ သီအနံၤန့ၣ် လၢကြုၢ်တုဟီၣ်က၀ီၤအပူၤ တၢ်ဒုးဆူၣ်ထီၣ်၀ဲလၢပယီၤသုးဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်အဘၢၣ်စၢၤဒီး တၢ်ဒုးကဲထီၣ်အကတီၢ်ခီဖျိပယီၤသုးခးလီၤကျိဖးဒိၣ်အဃိ မ့ၣ်အူအီၣ်ကမျၢၢ်အဟံၣ်အဃီအိၣ်၀ဲအသိး လီၢ်က၀ီၤသ၀ီဖိဘၣ်ဃ့ၢ်ထီၣ်၀ဲစ့ၢ်ကီးအဂ့ၢ်န့ၣ် သ၀ီဖိတဖၣ်စံး၀ဲန့ၣ်လီၤႉ

သယဲၣ်တီသ၀ီဖိတဂၤစံး၀ဲ“ပယီၤသုးခးလီၤကျိဖးဒိၣ်ဒီတနံၤကျၢၤလီၤႉကြုၢ်တုပယီၤသုး(၅၄၅/၅၄၆)ခးလီၤ၀ဲမီၤနီၤႉ မ့၀ံၤပယီၤသုးခးလီၤကျိဖးဒိၣ်ဘၣ်ဟးဂီၤ၀ဲဒၣ်(သယဲၣ်တီ)ႇ(ညီၤယ့ၣ်သၤ)သ၀ီဖိအဟံၣ်ဒီဒူၣ်ညါႉ မ့မ့ၢ်လၢ(ကါနံၤ)တကပၤခီန့ၣ်ခီဖျိပယီၤသုးကျိဖးဒိၣ်အဃိမ့ၣ်အူအီၣ်ဟံၣ်ကအိၣ်တၢ်လီၢ်(၂)တီၤ(၃)တီၤညါႉ ကညီဖီၣ်စုက၀ဲၤကရူၢ်ခး၀ဲနါက့မ့ၣ်အူအီၣ်ဟံၣ်အိၣ်စ့ၢ်လီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

လၢကြုၢ်တုကီၢ်ဆၣ်(ကၠဲ)ထံကျိ၀ၢ်ခီ တလၢၤဒူသ၀ီတဖၣ်အပူၤန့ၣ်တၢ်ဒုးကဲထီၣ်အဃိ လၢဖၣ်အၣ်၀့ၢ်တဆီပယီၤသုးကျိၤတဖၣ်အံၤဟဲထီၣ်မၤအါထီၣ်သုးဂံၢ်ဘါလၢ(ကၠဲ)ထံကျိတိၤႇ ကီးတရံး–ကၠဲတိၤ ကပၤအဂ့ၢ်န့ၣ် ကမျၢၢ်လၢအထံၣ်တၢ်ကဲထီၣ်သးဒီးအမဲာ်တဖၣ်စံး၀ဲန့ၣ်လီၤႉ

(ညီၤယ့ၣ်သၤ)သ၀ီဖိတဂၤစံး၀ဲ “တၢ်ဒုးကဲထီၣ်ဖဲမဂီၤအခါန့ၣ်ခီဖျိပယီၤသုးခးကျိဖးဒိၣ်အဃိ(ညီၤယ့ၣ်သၤ)သ၀ီႇ သယဲၣ်တီသ၀ီဖိတဖၣ်လဲၤဃ့ၢ်ထီၣ်၀ဲဒီးချံစဲးလၢ(သၤလဲၤ)သ၀ီႇခယါႇကီၣ်လဲၣ်ႇကီၣ်ကၠဲၣ်တကပၤန့ၣ်မီၤနီၤႉ တနီၤန့ၣ်လဲၤဃ့ၢ်ထီၣ်ဒီးချံစဲးလၢ(မီၣ်လမၠဲၣ်)တကပၤနါက့အိၣ်လီၤႉတနီၤန့ၣ်လဲၤဃ့ၢ်ထီၣ်အိၣ်၀ဲလၢ(ကြုၢ်တု)က၀ီၤဒ့(သီခါဖၠၣ်)ဖီလာ်နါက့အိၣ်လီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲမဟါလါယနူၤအါရံၤ ၂၄ သီ အခါန့ၣ်လီၤ

ပယီၤသုး(၅၄၅/၅၄၆)လၢအိၣ်ဆီလီၤသးဖဲကြုၢ်တုတဖၣ်အံၤခးလီၤကျိဖးဒိၣ်တပယူာ်ဃီဆူ(ကြုၢ်တု)ကါနံၤႇညီၤယ့ၣ်သၤႇသယဲၣ်တီသ၀ီပူၤတုၤလၢမုၢ်နၤခီညါဒီးတၢ်ဒုးကဲထီၣ်အဃိခံခီခံကပၤတၢ်သံတၢ်ဘၣ်ဒိဘၣ်ထံးအိၣ်၀ဲအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ

ဘၣ်ဃးဒီးတၢ်ဒုးကဲထီၣ်တၢ်ဂ့ၢ်အံၤန့ၣ်ခ့ၣ်အဲးစံၣ်–ကညီတၢ်ကစီၣ်၀ဲၤလီၢ်ခိၣ်သ့ၣ် ဆဲးကျိး၀ဲသံကွၢ်၀ဲတၢ်ပၢၢ်ဆၢသုးပာ်ဖှိၣ်ကရူၢ်တန့ၢ်ဒံး၀ဲဘၣ်န့ၣ်လီၤႉ

လၢန့ၣ်အမဲာ်ညါဖဲလါယနူၤအါရံၤ ၂၄ သီ မုၢ်နၤခီအဆၢကတီၢ်စ့ၢ်ကီး နၢ်ဟူကျိသီၣ်ႇကျိဖးဒိၣ်ကလုၢ်သီၣ်လၢ ကီးတရံး(တီၤကၠၤအ့)သ၀ီတကပၤအဂ့ၢ်န့ၣ် လီၢ်က၀ီၤကမျၢၢ်စံး၀ဲအသိးသ့ၣ်ညါဘၣ်န့ၣ်လီၤႉ