ပယီၤသုးတီၢ်မၤဒၢၣ်သးစၢ်လၢအဟဲက့ၤစိာ်ကသံၣ်တဂၤဒီးဟံကွံာ်၀ဲကသံၣ်ကသီႇစ့တဖၣ်

လါယနူၤအါရံၤ ၁၃ သီႇ ၂၀၂၃ နံၣ်ႇ ခ့ၣ်အဲးစံၣ်

လၢကညီကီၢ်စဲၣ် ကၠၤအ့စ့ၣ်ကၠံ၀့ၢ်ကပၤန့ၣ် ဖဲအပူၤကွံာ်စှၤသီအခါ ပယီၤသုးတီၢ်မၤဒၢၣ်၀ဲလီၢ်က၀ီၤသးစၢ်လၢအဟဲက့ၤစိာ်ကသံၣ်အံၤတဂၤဒီးဟံကွံာ်၀ဲကသံၣ်ကသီဒီးစ့သ့ၣ်တဖၣ် အဂ့ၢ်န့ၣ် သ့ၣ်ညါဘၣ်န့ၣ်လီၤႉ

သးစၢ်လၢပယီၤသုးတီၢ်မၤဒၢၣ်၀ဲတဂၤအံၤအိၣ်ဟဲက့ၤလၢကၠၤအ့စ့ၣ်ကၠံ၀့ၢ်ဟဲက့ၤစိာ်ဃုာ်၀ဲကသံၣ်ကသီဒီး ဖဲအတလၢထီၣ်၀့ၢ်ဟးထီၣ် သၢတၢၣ်သ၀ီခိၣ်ထိး ပယီၤသုးခီၣ်သုးရ့ၣ်(၂၈၃)တြဲၤအံၤန့ၣ် ပယီၤသုးသံမံသမိးထံၣ်၀ဲ ကသံၣ်ကသီတဖၣ်အဃိလိာ်ဘၢလိာ်ကွီၢ်အီၤလၢအဆီၣ်ထွဲမၤစၢၤတၢ်ပၢၢ်ဆၢကရူၢ်ဒီးတီၢ်မၤဒၢၣ်၀ဲအဂ့ၢ်န့ၣ် သးစၢ်လၢပယီၤသုးတီၣ်မၤဒၢၣ်အီၤတဂၤအံၤစံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“တလၢထီၣ်တြဲၤန့ၣ်အ၀ဲသ့ၣ်ကိးပတုာ်ၦၤႉအသမံသမိးပတၢ်ဘိၣ်လူလီၤ၀ဲႇထံၣ်ကသံၣ်ဘိၣ်ဘျီဒု အတဲၦၤလၢသုကလဲၤဆှၢန့ၢ်ကီၢ်သူလ့ၤကသံၣ်ဒၢးဧါႉပတဲအီၤတမ့ၢ်ဘၣ်ကသံၣ်သရၣ်မုၣ်အိၣ်လၢသ၀ီပူၤတဂၤမၢပဟဲက့ၤစိာ်န့ၢ်အီၤလီၤႉပတဲအီၤဒ်န့ၣ်နါက့တန့ၢ်ဘၣ်ႉအ၀ဲသ့ၣ်သမံသမိးၦၤႉမ့၀ံၤအထံးယၤဒီးကျိခံႇယခိၣ်သွံၣ်လီၤဒီးအက့ၤကိးသမံသမိးယၤလၢကျဲကပၤကျးပူၤမီၤနီၤႉအသမံသမိးယၤကအိၣ်(၁)နၣ်ရံၣ်ဃၣ်ဃၣ်၀ံၤပျၢ်လီၤက့ၤယၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

လီၢ်က၀ီၤသးစၢ်လၢအဟဲက့ၤစိာ်န့ၢ်၀ဲကသံၣ်သရၣ်မုၣ်တဂၤအကသံၣ်အံၤပယီၤသုးတီၢ်မၤဒၢၣ်အီၤနးနးကလဲာ်တကးဒံးဘၣ်အမဲာ်ညါဟံးကွံာ်ကသံၣ်ကသီတနီၤဒီးစ့(၂၂၅ႇ၀၀၀)ကၠးညါအဂ့ၢ်န့ၣ် သးစၢ်တဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ

ပယီၤသုးလၢအတီၣ်မၤဒၢၣ်သးစၢ်တဖၣ်အံၤန့ၣ်သုးဟံးန့ၢ်တၢ်စိတၢ်ကမီၤ၀ံၤအလီၢ်ခံမ့ၢ်ၦၤသ့ၣ်တဖၣ်လၢအဟဲနုာ်လီၤဟူးဂဲၤအိၣ်၀ဲလၢဟီၣ်က၀ီၤဖဲန့ၣ်အပူၤဒီးလၢကၠၤအ့စ့ၣ်ကၠံ၀့ၢ်ချၢတၢ်လီၢ်သ့ၣ်တဖၣ်န့ၣ်စ့ၢ်ကီးအ၀ဲသ့ၣ်ဆီလီၤ၀ဲတၢ်အိၣ်ခိးလီၢ်အိၣ်ခိးသမံသမိးကမျၢၢ်လၢအဟးထီၣ်က့ၤလီၤတဖၣ်ထီဘိလီၤအဂ့ၢ်န့ၣ်လီၢ်က၀ီၤကမျၢၢ်စံး၀ဲန့ၣ်လီၤႉ

ပယီၤသုးအတၢ်ဖံးတၢ်မၤဒ်အံၤအဖီခိၣ်န့ၣ်ကညီဂ့ၢ်၀ီခွဲးယာ်ကရူၢ်(KHRG)ၦၤကတိၤတၢ်ပၢ စီၤနၢၤဒၣ်ဆူ စံး၀ဲလၢ “ဖီၣ်စုက၀ဲၤတၢ်သဘံၣ်သဘုၣ်အဃိန့ၣ်ကမျၢၢ်သ့ၣ်တဖၣ်အတၢ်ဘံၣ်တၢ်ဘၢတအိၣ်ဘၣ်ႉနီၢ်ခိမ့ၢ်ဂ့ၤနီၢ်သးမ့ၢ်ဂ့ၤတၢ်လဲၤထီၣ်က့ၤလီၤသဘျ့တအိၣ်ဘၣ်ႉမ့၀ံၤဒီးလၢတၢ်ဒိးန့ၢ်ဘၣ်တၢ်ကူစါယါဘျါသ့ၣ်တဖၣ်အံၤတၢ်မၤဘၣ်ဒိအီၤမီၤနီၤႉၦၤစိာ်ကသံၣ်ကသီတဲ၀ဲလၢၦၤမၤစၢၤကီၢ်သူလ့ၤမၤဒၢၣ်၀ဲဒ်အံၤခီန့ၣ်တီတီအဲၣ်ဒိးမၤနၢၤ၀ဲလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

ဟီၣ်က၀ီၤဖဲန့ၣ်အပူၤဒူသ၀ီတဖၣ်ခီဖျိအိၣ်ယံၤ၀ဲဒီးတၢ်ဆါဟံၣ်ႇကသံၣ်ဒၢးအဃိလီၢ်က၀ီၤကမျၢၢ်တဖၣ်အါဒၣ်တက့ၢ်န့ၣ်လဲၤကူစါယါဘျါဟံးန့ၢ်အီၣ်ကသံၣ်လၢကသံၣ်သရၣ်/မုၣ်လၢအိၣ်သ၀ီပူၤတဖၣ်အအိၣ်လီၤအဃိ ကသံၣ်ကသီလၢတၢ်သူ၀ဲသ့ၣ်တဖၣ်အံၤတၢ်လဲၤထီၣ်ၦ့ၤအီၤလၢ၀့ၢ်ပူၤတၢ်ဆါကသံၣ်ကျးပူၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ

စးထီၣ်လၢသုးဟံးန့ၢ်တၢ်စိတၢ်ကမီၤ၀ံၤအလီၢ်ခံန့ၣ်လၢကညီကီၢ်စဲၣ်ဒူသ၀ီတဖၣ်အပူၤတၢ်ကးတံာ်ကွံာ်၀ဲတၢ်ဟ့ၣ်ကသံၣ်ဒၢးဒီးတၢ်ဆါဟံၣ်သ့ၣ်တဖၣ်န့ၣ်လီၤႉလၢဟီၣ်က၀ီၤတၢ်လီၢ်တနီၤအပူၤခီဖျိတၢ်ဒုးကဲထီၣ်တလီၢ်လီၢ်ဒီးပယီၤသုးအိၣ်ခိးဖီၣ်သမံသမိးတၢ်လၢကျဲပူၤအိၣ်အဃိလီၢ်က၀ီၤကမျၢၢ်တဖၣ်တၢ်ကီတၢ်ခဲအိၣ်ထီၣ်လၢကကူစါယါဘျါသးအဂ့ၢ်န့ၣ်သ့ၣ်ညါဘၣ်န့ၣ်လီၤႉ