လါယနူၤအါရံၤ ၉ သီႇ ၂၀၂၃ သီႇ ခ့ၣ်အဲးစံၣ်
လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ် ဒွဲၣ်လိကီၢ်ဆၣ်အပူၤ ခီဖျိသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢ မဲၤသုၣ်ကရူၢ် လၢၢ်ထူၣ်ဖိဟီၣ်က၀ီၤပူၤအဃိ ဘၣ်သံ၀ဲလီၢ်က၀ီၤကမျၢၢ်(၆)ဂၤအဂ့ၢ်န့ၣ် ခ့ၣ်အဲၣ်ယူၣ် မုၢ်တြီၢ်တၢ်ကစီၣ်ထုးထီၣ်ပာ်ဖျါ၀ဲဖဲတနံၤအံၤန့ၣ်လီၤႉ
ဖဲလါယနူၤအါရံၤ ၇ သီ တနံၤဃီအတီၢ်ပူၤန့ၣ် ခီဖျိသုးမီၤစိရိၤကဘီယူၤ(၇)ဘ့ၣ်ဟဲတ့ၢ်လီၤမ့ၣ်ပိၢ်လၢ(သုးက့ ၅)ဟီၣ်က၀ီၤ မုၢ်တြီၢ်ကီၢ်ရ့ၣ်ပူၤအဃိ မ့ၣ်ပိၢ်လီၤတဲာ်ပိၢ်ဖးထီၣ်၀ဲလၢဒွဲၣ်လိကီၢ်ဆၣ် မဲၤသုၣ်ကရူၢ် ယာ်ယံၣ်ထၣ်သ၀ီပူၤ(၄)ဖျၢၣ်ဒီး ဘၣ်သံ၀ဲၦၤမၤထူဖိ(၆)ဂၤအဂ့ၢ်န့ၣ် မုၢ်တြီၢ်တၢ်ကစီၣ်လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ
ၦၤလၢအသံတဖၣ်န့ၣ်မ့ၢ်၀ဲယာ်ယံၣ်ထၣ်သ၀ီဖိလၢအမ့ၢ်(သ့ၣ်ခိၣ်)ဒီၤနွဲၤနံၤဒီးအဖိခွါ(၂)ဂၤႇ အဒဲၣ်မုၣ်(၁)ဂၤဒီးအၦၤခူၣ်ထူဖိ(၂)ဂၤန့ၣ်လီၤႉခီဖျိကဘီယူၤဟဲတ့ၢ်လီၤမ့ၣ်ပိၢ်အဃိတၢ်ဆါဟံၣ်ဒီးတၢ်သူၣ်ထီၣ်လၢအဂၤသ့ၣ်တဖၣ်ဟးဂီၤ၀ဲခဲလၢာ်(၇)ဖျၢၣ်အဂ့ၢ်န့ၣ်ခ့ၣ်အဲၣ်ယူၣ်စံး၀ဲန့ၣ်လီၤႉ
တၢ်တနံၤဃီ၀ဲန့ၣ်စ့ၢ်ကီးသုးမီၤစိရိၤကဘီယူၤ(၂)ဘ့ၣ်ဟဲတ့ၢ်လီၤမ့ၣ်ပိၢ်(၄)ဖျၢၣ်ဆူခ့ၣ်အဲၣ်ယူၣ်(သုးက့ ၅) ၀ဲၤလီၢ်ခိၣ်သ့ၣ်ကပၤ ဒ့ၣ်ပူၤနိၣ်လီၢ်က၀ီၤတကပၤအဃိ သ၀ီဖိဘၣ်ဒိ(၁)ဂၤဒီးဘၣ်ဟးဂီၤ၀ဲဟံၣ်တဖျၢၣ်ႇ သိလ့ၣ်တခိၣ်န့ၣ်လီၤႉတချုးလၢတၢ်ကဲထီၣ်သးဒံးဘၣ်ဖဲဂီၤခီအဆၢကတီၢ်န့ၣ် ခီဖျိသုးမီၤစိရိၤအကဘီယူၤ(၇)ဘ့ၣ် ဟဲတ့ၢ်လီၤမ့ၣ်ပိၢ်ကအိၣ်အဖျၢၣ်(၂၀)ဃၣ်ဃၣ်ညါအဃိလီၢ်က၀ီၤကမျၢၢ်တၢ်ဖံးအီၣ်မၤအီၣ်လီၢ်ကျဲဟးဂီၤ၀ဲအဂ့ၢ်န့ၣ်ခ့ၣ်အဲၣ်ယူၣ်လံာ်တၢ်ထုးထီၣ်ပာ်ဖျါအသိးသ့ၣ်ညါဘၣ်န့ၣ်လီၤႉ
ခီဖျိသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်အဃိလီၢ်က၀ီၤကမျၢၢ်ဘၣ်ဃ့ၢ်ထီၣ်၀ဲဒီးအ၀ဲသ့ၣ်ဘၣ်အိၣ်လၢတၢ်ပျံၤတၢ်ဖုးပူၤအသိးလၢကအီၣ်ကအီကအိၣ်ကဆိးအဂီၢ်စ့ၢ်ကီးထံၣ်ဘၣ်၀ဲတၢ်ကီတၢ်ခဲအဂ့ၢ်န့ၣ် လီၢ်က၀ီၤကမျၢၢ်တဖၣ်စံး၀ဲန့ၣ်လီၤႉ
ဒ်န့ၣ်အသိးဖဲအပူၤကွံာ်လါယနူၤအါရံၤ ၃ သီအနံၤစ့ၢ်ကီး သုးမီၤစိရိၤကဘီယူၤ(၄)ဘ့ၣ်ဟဲတ့ၢ်လီၤမ့ၣ်ပိၢ်ဖးဒိၣ် အဖျၢၣ်(၅၀)ဃၣ်ဃၣ်ဆူဒွဲၣ်လိကီၢ်ဆၣ် မဲၤ၀့ၤကရူၢ် မဲၤ၀့ၤသ၀ီ တိၤမဲၢ်ခံသ၀ီဒီးချိၣ်ခံသ၀ီတၢ်ဖံးအီၣ်မၤအီၣ်လီၢ်ကျဲပူၤ တကးဒံးဘၣ်အမဲာ်ညါကဘီယူၤဟဲခးလီၤ၀ဲကျိဖိအိၣ်၀ဲခဲလၢာ်အထံၣ်(၂၀၀၀၀)ခံကလးဘျဲၣ်ညါအဂ့ၢ်န့ၣ်ခ့ၣ် အဲၣ်ယူၣ်ထုးထီၣ်ပာ်ဖျါ၀ဲန့ၣ်လီၤႉ
ဒ်ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်(သုးက့ ၅)အတၢ်ထၢဖှိၣ်မၤနီၣ်စရီလၢ(၂၀၂၂)နံၣ်အသိးန့ၣ် တနံၣ်အတီၢ်ပူၤလၢ(သုးက့ ၅)ဟီၣ်က၀ီၤအပူၤ တၢ်ဒုးကဲထီၣ်၀ဲ(၂၇၃၇)ဘျီဒီးသုးမီၤစိရိၤကဘီယူၤဟဲခးလီၤတၢ်အိၣ်၀ဲ(၃၅)ဘျီဒီး တ့ၢ်လီၤ၀ဲမ့ၣ်ပိၢ်ခဲလၢာ်(၁၈၂)ဖျၢၣ်အဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
