Home တၢ်ကစီၣ် KNU (သုးက့ ၄) ဆှၢထီၣ်လံာ် ဒုးသ့ၣ်ညါကီၢ်သူလ့ၤသုးမုၢ်ဒိၣ်လၢတဘၣ်နုာ်လီၤမၤတံာ်တာ်တၢ်လၢပၢပြးအပူၤဘၣ်

KNU (သုးက့ ၄) ဆှၢထီၣ်လံာ် ဒုးသ့ၣ်ညါကီၢ်သူလ့ၤသုးမုၢ်ဒိၣ်လၢတဘၣ်နုာ်လီၤမၤတံာ်တာ်တၢ်လၢပၢပြးအပူၤဘၣ်

536
0
Photo: Crd.

လါယနူၤအါရံၤ ၂ သီႇ ၂၀၂၃ နံၣ်ႇ ခ့ၣ်အဲးစံၣ်

ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢဟီၣ်က၀ီၤ ဘျံးဒ၀ဲၢ်ကီၢ်ရ့ၣ်အပူၤ တဘၣ်နုာ်လီၤမၤတံာ်တာ်တၢ်လၢတၢ်ပၢတၢ်ပြးအပူၤဘၣ်အဂ့ၢ်န့ၣ် ခ့ၣ်အဲၣ်ယူၣ်(သုးက့ ၄)ဒုးယၤခိၣ် ဆှၢထီၣ်လံာ်တဘ့ၣ်ဆူကီၢ်သူလ့ၤသုးမုၢ်ဒိၣ်(Kaw Thoo Lei Army)ဆၣ်ကဆီသုးက့အအိၣ်န့ၣ်လီၤႉ

ဖဲအပူၤကွံာ်လါဒံၣ်စ့ဘၢၣ် ၂၇ သီအနံၤန့ၣ် ခ့ၣ်အဲၣ်ယူၣ်(သုးက့ ၄)ဒုးယၤခိၣ် သုးခိၣ်ဒိၣ်စိ စီၤအဲၣ်မ့ၣ်စ့ ဆှၢထီၣ်လံာ်ဆူဆၣ်ကဆီသုးက့အအိၣ်ဒီးလံာ်အပူၤပာ်ဖျါ၀ဲလၢဆၣ်ကဆီသုးက့အံၤအတၢ်ဖံးတၢ်မၤတဆီဘၣ်တဆီဒုးအိၣ်ထီၣ်၀ဲဒၣ်တၢ်မၤထီဒါ၀ဲဒၣ်ပသုးက့(၄)ဒီးပခ့ၣ်အဲၣ်ယူၣ်ႇကီၢ်ရ့ၣ်ဘျံးဒ၀ဲၢ်ဒီးပကမျၢၢ်အါမံၤတကးဒံးဘၣ်သမံသမိးပၦၤမၤသကိးတၢ်ဖိႇပခိၣ်ပနၢ်ဒီးတဲတရီတပါ၀ဲအဂ့ၢ်န့ၣ် လံာ်တၢ်ဒုးသ့ၣ်ညါအပူၤစံး၀ဲန့ၣ်လီၤႉ

တကးဒံးဘၣ်လၢန့ၣ်အမဲာ်ညါဆၣ်ကဆီသုးက့အၦၤတဖၣ်နုာ်လီၤဟူးဂဲၤလၢခ့ၣ်အဲၣ်ယူၣ်(သုးက့ ၄)ဟီၣ်က၀ီၤပူၤ ႇတအိၣ်ဒီးတၢ်သ့ၣ်ညါပာ်ကဲတၢ်ကရၢကရိအမဲာ်ညါမၤသံမၤ၀ီကမျၢၢ်တဖၣ်ဖဲအသးႇဒွဲၣ်အူအီၣ်ကမျၢၢ်အသိလ့ၣ်ႇမၤပျံၤမၤဖုးကမျၢၢ်တဖၣ်အဂ့ၢ်န့ၣ်ခ့ၣ်အဲၣ်ယူၣ်(သုးက့ ၄)ဒုးယၤခိၣ် သုးခိၣ်ဒိၣ်စိ လံာ်တၢ်ဒုးသ့ၣ်ညါအပူၤ ပာ်ဖျါ၀ဲန့ၣ်လီၤႉ

ဘၣ်ဃးဒီးခ့ၣ်အဲၣ်ယူၣ်(သုးက့ ၄)ဆှၢလံာ်အံၤန့ၣ် လၢတၢ်ဒုးထီဒါဒုၣ်ဒါအပူၤန့ၣ်ဆၣ်ကဆီသုးက့အံၤ အတၢ်ပာ်ဖှိၣ်မၤသကိးတၢ်ဒီးတၢ်ဖီလာ်ခ့ၣ်အဲၣ်ယူၣ်အၦၤအိၣ်၀ဲဒီးတမၤကီမၤခဲ၀ဲလီၢ်က၀ီၤကမျၢၢ်တဖၣ်ဘၣ်အဂ့ၢ်န့ၣ် သုးခိၣ်ကျၢၢ် စီၤနၢၤဒါမၠး လၢအဒုးအိၣ်ထီၣ်(ကီၢ်သူလ့ၤသုးမုၢ်ဒိၣ်)အံၤ စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

“ဒ်သိးယသ့ၣ်ညါအသိးန့ၣ်အမၤတံာ်တာ်ကမျၢၢ်တအိၣ်ဘၣ်ႉအ၀ဲသ့ၣ်မၤ၀ဲဒၣ်လၢၦၤလၢမၤတၢ်လၢဒုၣ်ဒါအဂီၢ်တဖၣ်လီၤမီၤနီၤႉမ့၀ံၤအက့ၤမၤကီမၤခဲကမျၢၢ်ဒုတအိၣ်ဘၣ်ႉဘၣ်မနုၤအဃိလဲၣ်န့ၣ်ကမျၢၢ်တဖၣ်တူၢ်လိာ်အ၀ဲသ့ၣ်မီၤနီၤႉၦၤဆီၣ်ထွဲမၤစၢၤအ၀ဲသ့ၣ်အိၣ်မးအ၀ဲသ့ၣ်အိၣ်ဆၢထၢၣ်သ့လီၤႉကမျၢၢ်မ့တအဲၣ်အ၀ဲသ့ၣ်ဘၣ်န့ၣ်တမ့ၢ်လၢအ၀ဲသ့ၣ်အိၣ်ဆၢထၢၣ်၀ဲကန့ၢ်ဘၣ်” အဂ့ၢ်န့ၣ် သုးခိၣ်ကျၢၢ် စီၤနၢၤဒါမၠးစံး၀ဲန့ၣ်လီၤႉ

တကးဒံးဘၣ်လၢန့ၣ်အမဲာ်ညါကီၢ်သူလ့ၤသုးမုၢ်ဒိၣ်(KTLA)ဆၣ်ကဆီသုးက့မူဒါခိၣ်သုးခိၣ်အဲၣ်ကွံအံၤ တမ့ၢ်လၢအကမၤဘၣ်ဒိ၀ဲ(ခ့ၣ်အဲၣ်ယူၣ်)အတၢ်ပၢတၢ်ပြးတဖၣ်ဘၣ်အဂ့ၢ်န့ၣ် သုးခိၣ်ကျၢၢ် စီၤနၢၤဒါမၠး လၢအဒုးအိၣ်ထီၣ်(ကီၢ်သူလ့ၤသုးမုၢ်ဒိၣ်)အံၤစံးအါထီၣ်၀ဲန့ၣ်လီၤႉ

လၢခ့ၣ်အဲၣ်ယူၣ်(သုးက့ ၄)ဒုးယၤခိၣ်အလံာ်အပူၤန့ၣ်ဆၣ်ကဆီသုးက့အံၤမၤပျံၤမၤဖုး၀ဲဒၣ်ကမျၢၢ်ႇ ဃ့အီၣ်ကျိၣ်ဃ့စ့ဒီးကမျၢၢ်လၢအဖံးအီၣ်မၤအီၣ်တၢ်တဖၣ်ကဘၣ်လဲၤဃ့တၢ်ပျဲလၢအ၀ဲသ့ၣ်အအိၣ်မးဖံးတၢ်မၤတၢ်သ့ဒီးတၢ်သ့ၣ်တဖၣ်အံၤမ့ၢ်တၢ်ဟဲနုာ်လီၤမၤတံာ်တာ်၀ဲဒၣ်ပခ့ၣ်အဲၣ်ယူၣ်ကရၢတၢ်ပၢတၢ်ပြးဒီးမၤ၀ဲဒၣ်ဟီၣ်က၀ီၤတၢ်ဒိၣ်စိလၢပသုးက့(၄)ဟီၣ်က၀ီၤပူၤအဂ့ၢ်န့ၣ်ပာ်ဖျါ၀ဲန့ၣ်လီၤႉ

ကီၢ်သူလ့ၤသုးမုၢ်ဒိၣ်(KTLA)ဆၣ်ကဆီသုးက့လၢအနုာ်လီၤအိၣ်ဆီလီၤသးဟူးဂဲၤဖဲခ့ၣ်အဲၣ်ယူၣ်(ဘျံးဒ၀ဲၢ်ကီၢ်ရ့ၣ်)ပူူၤအံၤအပူၤကွံာ်န့ၣ်မ့ၢ်၀ဲဒၣ်ကညီဒီကလုာ်ဂၢၤသးကရၢ(KNDO)သုးရ့ၣ်လီၤဆီတခါန့ၣ်လီၤႉစးထီၣ်လၢအပာ်ဖှိၣ်မၤသကိးတၢ်ဒီးကီၢ်သူလ့ၤသုးမုၢ်ဒိၣ်(KTLA)လၢသုးခိၣ်ကျၢၢ်စီၤနၢၤဒါမၠးတီခိၣ်ရိၣ်မဲဒုးအိၣ်၀ဲအံၤ၀ံၤအလီၢ်ခံန့ၣ် ဆီတလဲက့ၤအသးဆူဆၣ်ကဆီသုးက့န့ၣ်လီၤႉ