တၢ်မၤသံသုးမီၤစိရိၤသးၦၢ်အဟံၣ်ဖိဃီဖိ(၇)ဂၤကဲထီၣ်၀ံၤအလီၢ်ခံတၢ်မၤဃံးထီၣ်တၢ်ဘံၣ်တၢ်ဘၢလၢပလီၣ်၀့ၢ်ပူၤ

လါဖ့ၤဘြူၤအါရံၤ ၁၃ သီႇ ၂၀၂၃ နံၣ်ႇ ခ့ၣ်အဲးစံၣ်

လၢတနီသရံၣ်ကီၢ်ခီဒိၣ် ပလီကီၢ်ဆၣ် ပလီၣ်၀့ၢ် ကၠီၣ်လိကၠံကရူၢ်(ညီၤစှ့ၤကိ)သ၀ီအပူၤန့ၣ် ဖဲအပူၤကွံာ်လါဖ့ၤဘြူၤအါရံၤ ၁၁ သီ ဟါခီအဆၢကတီၢ် ၦၤဖီၣ်စုက၀ဲၤတဒူၣ်မၤသံ၀ဲသုးမီၤစိရိၤသးၦၢ် အဟံၣ်ဖိဃီဖိ(၇)ဂၤကဲထီၣ်၀ံၤအလီၢ်ခံ ပယီၤသုးမၤဃံးထီၣ်တၢ်ဘံၣ်တၢ်ဘၢအဂ့ၢ်န့ၣ်သ့ၣ်ညါဘၣ်လၢလီၢ်က၀ီၤ ကမျၢၢ်အိၣ်န့ၣ်လီၤႉ

ဖဲလါဖ့ၤဘြူၤအါရံၤ ၁၁ သီ ဟါခီ ၈း၃၀ အဆၢကတီၢ်န့ၣ် လၢပလီကီၢ်ဆၣ် ပလီၣ်၀့ၢ်(ကၠီၣ်လိကၠံ)ကရူၢ် (ညီၤစှ့ၤကိ)သ၀ီအပူၤန့ၣ် ၦၤဖီၣ်စုက၀ဲၤလၢတၢ်တသ့ၣ်ညါအမံၤတဒူၣ် မၤသံ၀ဲသုးမီၤစိရိၤသးၦၢ်(အူမၠ့ၣ်အီၤ)အမါႇ အဖိမုၣ်ႇအလံၤသ့ၣ်တဖၣ်အဃိ ပယီၤသုးအိၣ်ခိးသမံသမိးမၤဃံးထီၣ်တၢ်ဘံၣ်တၢ်ဘၢလၢပလီၣ်၀့ၢ်ပူၤအဂ့ၢ်န့ၣ် ကမျၢၢ်လၢအိၣ်ပလီၣ်၀့ၢ်ပူၤတဂၤစံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“တဂီၤအံၤဖဲပလီၣ်၀့ၢ်န့ၣ်ပယီၤသုးဆီလီၤတြဲၤအိၣ်ခိးတၢ်ႉမ့၀ံၤသမံသမိး၀ဲသိလ့ၣ်ယီၢ်(ဆဲးကဲး)တဖၣ်မီၤနီၤႉအသံကွၢ်၀ဲနကလဲၤဖဲလဲၣ်ႇယဆိမိၣ်လၢအမၤတံာ်တာ်တၢ်ဒ်န့ၣ်လီၤႉမ့၀ံၤတဂီၤညါအံၤပယီၤသုးလဲၤထီၣ်ဒီးသိလ့ၣ်လၢသ၀ီ၀ဲန့ၣ်မီၤနီၤႉအနီၣ်ဂံၢ်အိၣ်ဆံးအါလဲၣ်ဒုတသ့ၣ်ညါဘၣ်ႉဖဲအံၤန့ၣ်ၦၤဟးထီၣ်တၢ်ချၢတဘူၣ်နီတဂၤဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

ၦၤလၢအသံတဖၣ်န့ၣ်မ့ၢ်၀ဲသးၦၢ်အူမၠ့ၣ်အီၤအမါဒီၤကၠံၤနွဲၣ်(၆၂)နံၣ်ႇအဖိမုၣ်ဒီၤသါသါမီၤ(၄၂)နံၣ်ႇမီၤန့ၤထဲၣ်သ့(၁၇)နံၣ်ႇမီၤစ့ၤယၤအီၤ(၁၆)နံၣ်ႇမီၤစိမ့ပဲၤ(၁၃)နံၣ်ႇမၣ်မ့ၤစ့ၤဖၠူၤ(၉)နံၣ်ႇမီၤသါမါ(၁)နံၣ် သ့ၣ်တဖၣ်အဂ့ၢ်န့ၣ် ဟီၣ်က၀ီၤတၢ်ကစီၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ

ၦၤသ့ၣ်တဖၣ်အံၤဘၣ်တၢ်မၤသံအီၤလၢကရူၢ်ကရၢဖဲလဲၣ်တဒူၣ်လဲၣ်န့ၣ်တၢ်ထုးထီၣ်ပာ်ဖျါ၀ဲလၢအဖိးသဲစးတအိၣ်ဒံးဘၣ်န့ၣ်လီၤႉ

ဘၣ်ဃးဒီးတၢ်ဂ့ၢ်အံၤ(Palaw People’s Defense Force)တၢ်ဘိးဘၣ်ရၤလီၤမူဒါခိၣ်စံး၀ဲလၢ“ဖဲ ၁၁ သီ ဟါခီအခါန့ၣ် ၦၤတဒူၣ်ဟဲမၤသံ၀ဲမီၤနီၤႉၦၤမၤသံတၢ်ဖိန့ၣ်တုၤလၢခဲအံၤၦၤတသ့ၣ်ညါဒံးဘၣ်ႉၦၤလၢတၢ်မၤသံအီၤခဲအံၤန့ၣ်မ့ၢ်၀ဲဒၣ် သုးမီၤစိရိၤအသ၀ီသးၦၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ

တကီၢ်ခါခဲအံၤလၢပလီကီၢ်ဆၣ်အပူၤန့ၣ်ဒူသ၀ီတဖၣ်အါဒၣ်တက့ၢ်ဘၣ်တၢ်ပၢပြးအီၤလၢသုးမီၤစိရိၤအသ၀ီသးၦၢ်လီၤဒီးအပူၤကွံာ်တၢ်မၤသံသုးမီၤစိရိၤသးၦၢ်ကဲထီၣ်အိၣ်၀ဲဘၣ်ဆၣ် တၢ်မၤသံဟံၣ်ဖိဃီဖိဒီတဖျၢၣ်ဒ်အံၤကဲထီၣ်မ့ၢ်၀ဲ အဆိကတၢၢ်တဘျီလီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ