လါဖ့ၤဘြူၤအါရံၤ ၂၀ သီႇ ၂၀၂၃ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ကီးတရံးကီၢ်ဆၣ်ကလံၤထံးအပူၤ ဖဲလါဖ့ၤဘြူၤအါရံၤ ၁၉ သီ မုၢ်နၤခီ ၁၂ နၣ်ရံၣ်ဃၣ်ဃၣ်အဆၢကတီၢ်န့ၣ် ခီဖျိသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢၦၤဃ့ၢ်အိၣ်ကဒု တၢ်လီၢ်အဃိ ကမျၢၢ်ၦၤဃ့ၢ်တၢ်ဒုးဖိဘၣ်ဒိ(၃)ဂၤအကျါပၣ်ဃုာ်ဖိသၣ်မုၣ်ဖိ(၁၄)နံၣ်တဂၤအဂ့ၢ်န့ၣ် သ့ၣ်ညါဘၣ်န့ၣ် လီၤႉ
သုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်ဘျီ၀ဲအံၤနီၢ်နဒၤ၀့(၁၄)နံၣ်ႇနီၢ်လၣ်ထွ့(၃၆)နံၣ်ဒီးစီၤဖါထုးဒီ(၄၄)နံၣ် သ့ၣ်တဖၣ်အံၤဘၣ်ဒိဘၣ်ထံး၀ဲအဂ့ၢ်န့ၣ် သ၀ီၦၤဘၣ်မူဘၣ်ဒါတဂၤပာ်ဂၢၢ်ပာ်ကျၢၤစံးဘၣ် ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
အ၀ဲစံး၀ဲလၢ“ဘၣ်၀ဲဒၣ်ဖိသၣ်မုၣ်(၁၄)နံၣ်တဂၤႉမ့၀ံၤဘၣ်၀ဲဒၣ်သ၀ီဖိလၢအဃ့ၢ်တၢ်ဒုးန့ၣ်(၃)ဂၤမီၤနီၤႉ ယအဲၣ်ဒိးသ့ၣ်ညါလၢကဘီယူၤဟဲခးလီၤတၢ်ခဲအံၤန့ၣ်မ့ၢ်အဟဲခးဒုၣ်ဒါဧါႇမ့ၢ်အဟဲခးကမျၢၢ်ခီဧါႉဟးခးလီၤတၢ်လၢကမျၢၢ်အိၣ်အလီၢ်န့ၣ်လီၤႉနမ့ခးကမျၢၢ်န့ၣ်မ့ၢ်နထံနကီၢ်ကန့ၢ်ညီဧါႉၦၤသ၀ီဖိတဖၣ်အံၤတထီဒါပယီၤသုးဘၣ်ႇထဲအ၀ဲသ့ၣ်ဘၣ်ဟးဃ့ၢ်န့ၣ်လီၤဘၣ်တၢ်ကီတၢ်ခဲလၢာ်လံ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
ခီဖျိဒုးယၤတၢ်သဘံၣ်သဘုၣ်ကဲထီၣ်၀ဲလၢပယီၤသုးဒီးတၢ်ပၢၢ်ဆၢသုးပာ်ဖှိၣ်အဘၢၣ်စၢၤအဃိ ကီးတရံး၀့ၢ်ခိၣ်၀့ၢ်ဃၢၤလီၢ်က၀ီၤကမျၢၢ်တဖၣ်အံၤစးထီၣ်အပူၤကွံာ်လါဒံၣ်စ့ဘၢၣ်တုၤလၢခဲအံၤဘၣ်ဟးစံၣ်အိၣ်လၢအလါလံန့ၣ်လီၤႉ
တကီၢ်ခါခဲအံၤကမျၢၢ်ၦၤဃ့ၢ်တၢ်ဒုးဖိတဖၣ်ဘၣ်ဟးစံၣ်အိၣ်ယံၤထီၣ်၀ဲလံအသိးခီဖျိပယီၤသုးခးလီၤကျိဖးဒိၣ်ဒီးကဘီယူၤဟဲတ့ၢ်လီၤမ့ၣ်ပိၢ်အဃိကမျၢၢ်ၦၤဃ့ၢ်တၢ်ဒုးဖိတဖၣ်အံၤအသူၣ်လီၤဘှံးသးလီၤဘှါတူၢ်ဘၣ်၀ဲသးတၢ်တူၢ်ဘၣ်ခီၣ်ဘၣ်သ့ၣ်တဖၣ်အဂ့ၢ်န့ၣ်ၦၤဃ့ၢ်တၢ်ဒုးဖိတဖၣ်စံး၀ဲန့ၣ်လီၤႉ
“ပစံၣ်န့ၢ်ဖးယံၤလံႉအဲၣ်ဒိးက့ၤအိၣ်လၢပကစၢ်ဟံၣ်ကစၢ်ဃီလံႉကမျၢၢ်တနီၤန့ၣ်ဘၣ်လဲၤအိၣ်လၢၦၤဒူသ၀ီႇလၢၦၢ်ပူၤယံၤထီၣ်လံအဃိတၢ်ကီတၢ်ခဲအိၣ်ထီၣ်အမံၤမံၤလီၤႉၦၤစံၣ်အကျါန့ၣ်ပၣ်ဃုာ်၀ဲၦၤတဆူၣ်တချ့ႇၦၤသူၣ်က့သးၦၢ်ဒီးၦၤမိၢ်ဒၢဒီဒူၣ်ညါလီၤႉစံၣ်ယံၤထီၣ်ဘျီသးနါက့လီၤစၢ်၀ဲလီၤ”အဂ့ၢ်န့ၣ် ကီးတရံးကလံၤကမျၢၢ်ၦၤဃ့ၢ်တၢ်ဒုးတဂၤ စံးဘၣ် ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
ခီဖျိပယီၤသုးခးလီၤကျိဖးဒိၣ်ဒီးသုးမီၤစိရိၤကဘီယူၤဟဲတ့ၢ်လီၤမ့ၣ်ပိၢ်လၢကီးတရံးကီၢ်ဆၣ်ကလံၤထံးသ၀ီပူၤတလီၢ်လီၢ်အဃိ ကမျၢၢ်သံဘၣ်ဒိဘၣ်ထံးအနီၣ်ဂံၢ်ကအိၣ်လၢအဆံဘျဲၣ်လံအဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးတဖၣ်စံး၀ဲန့ၣ် လီၤႉ
ဒ်န့ၣ်အသိးဖဲတနံၤအံၤလါဖ့ၤဘြူၤအါရံၤ ၂၀ သီ ဂီၤခီ ၉း၃၀ အဆၢကတီၢ်န့ၣ် သုးမီၤစိရိၤကဘီယူၤဟဲတ့ၢ်လီၤကဒီး မ့ၢ်ပိၢ်လၢကမျၢၢ်ၦၤဃ့ၢ်မှံဟးဖျိးအိၣ်တၢ်လီၢ်ဒံးအသိး ဖဲမုၢ်ဃ့ၢ်လီၤ ၁ နၣ်ရံၣ်ဃၣ်ဃၣ်အဆၢကတီၢ်စ့ၢ်ကီး နၢ်ဟူကျိဖိကျိဖးဒိၣ်သီၣ်လၢကီးတရံး၀့ၢ်ဃၢၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
