လါမးရှး ၈ သီႇ ၂၀၂၃ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် နိၣ်တကီကီၢ်ဆၣ်အပူၤ ဖဲလါမးရှး ၆ သီအနံၤန့ၣ် နိၣ်တကီကီၢ်ဆၣ် ကမျၢၢ်ပၢပြးကရူၢ်ဟ့ၣ်လီၤ၀ဲပၢၤကီၢ်ဒီးပယီၤသုးလၢအနုာ်လီၤမၤ(CDM)တဖၣ်အံၤလၢ လံာ်တၢ်လၤကပီၤလၢဒီကလုာ်ဃူဖိး(NUG)ဆှၢဃီၤ၀ဲဒၣ်အံၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ယူးယီၣ်ပာ်ကဲဘၣ်ၦၤလၢအနုာ်လီၤပၣ်ဃုာ်လၢ(CDM)ပူၤတဖၣ်ဒိၣ်မးဒီးဒ်သိးသုးမီၤစိရိၤအၦၤလၢအိၣ်တ့ၢ်ဒံးလၢကီၢ်ပူၤတဖၣ်အံၤကသ့ၣ်ညါ၀ဲလၢပဟူးဂဲၤမၤတၢ်လၢအ၀ဲသ့ၣ်တၢ်လုၢ်အီၣ်နီၢ်ခိသးသမူဒီးတၢ်ဘံၣ်တၢ်ဘၢအဂီၢ်အံၤအဃိပမၤ၀ဲဒၣ်တၢ်ဟ့ၣ်လီၤလံာ်တၢ်လၤကပီၤမူးတၢ်ရဲၣ်တၢ်ကျဲၤဒ်အံၤလီၤအဂ့ၢ်န့ၣ် နိၣ်တကီကီၢ်ဆၣ်(ပအဖ)သိၣ်မှံၤ တၢ်ရ့လိာ်မုာ်လိာ်မူဒါခိၣ် အူည့မ့ စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
အ၀ဲစံး၀ဲလၢ“ယပာ်ကဲအ၀ဲသ့ၣ်ဒိၣ်မးလီၤႉသးလၢအအိၣ်ဆၢထၢၣ်လၢတၢ်မ့ၢ်တၢ်တီတကပၤဒ်အံၤစ့ၢ်ကီးယပာ်ကဲဒိၣ်မးႉမ့၀ံၤၦၤတနီၤန့ၣ်တဲ၀ဲလၢပမၤ(CDM)မ့၀ံၤန့ၣ်မ့ၢ်ၦၤကမၤၦၤဒ်လဲၣ်ႇၦၤကရ့ၦၤဒ်လဲၣ်တဲ၀ဲဒ်န့ၣ်အိၣ်မီၤနီၤႉအ၀ဲသ့ၣ်အကစၢ်နါက့သ့ၣ်ညါ၀ဲလီၤႉပမၤတၢ်ရဲၣ်တၢ်ကျဲၤခဲအံၤဒ်သိးသုးမီၤစိရိၤအၦၤကသ့ၣ်ညါ၀ဲလၢနုာ်လီၤမၤ(CDM)မ့၀ံၤန့ၣ်ၦၤကွၢ်ထွဲအ၀ဲသ့ၣ်လၢတၢ်လုၢ်အီၣ်နီၢ်ခိသးမူဒီးတၢ်ဘံၣ်တၢ်ဘၢအဂီၢ်ခဲလၢာ်လီၤဒ်န့ၣ်မီၤနီၤ”အဂ့ၢ်န့ၣ် စံး၀ဲန့ၣ်လီၤႉ
လၢန့ၣ်အမဲာ်ညါတၢ်ဟ့ၣ်လီၤလံာ်ဟ့ၣ်လၤကပီၤဒ်အံၤအဖီခိၣ်န့ၣ်တၢ်ရ့လိာ်မုာ်လိာ်သးလၢတဂၤဒီးတဂၤအဘၢၣ်စၢၤဟဲဂ့ၤထီၣ်၀ဲအသိး ၦၤလၢကဟဲက့ၤပာ်ဖှိၣ်မၤသကိးတၢ်ဒီးကမျၢၢ်ထံဖိကီၢ်ဖိန့ၣ်အိၣ်ဒံးဒီဒူၣ်ညါအဂ့ၢ်န့ၣ် အူည့မ့ စံးအါထီၣ်၀ဲန့ၣ်လီၤႉ
“ပဟ့ၣ်လီၤလံာ်ဟ့ၣ်လၤကပီၤဒ်အံၤၦၤသးခုကိးဂၤဒဲးလီၤႉအ၀ဲသ့ၣ်တူၢ်ဘၣ်၀ဲလၢပပာ်ကဲအ၀ဲသ့ၣ်ဒ်ဒီပုၢ်ဒီ၀ဲၢ်အသိးမီၤနီၤႉၦၤအိၣ်ဖဲအံၤသ့ၣ်တဖၣ်န့ၣ်အတၢ်ပာ်သးအိၣ်လၢကမၤတဲာ်ကွံာ်သုးမီၤစိရိၤသနူကိးဂၤဒဲးလီၤႉ
ပပာ်ကဲအ၀ဲသ့ၣ်ဒိၣ်မးႉအ၀ဲသ့ၣ်နါက့အ၀ဲသ့ၣ်ဒီးအကစၢ်န့ၣ်ပာ်ကဖၢလၢလီၤအသးစ့ၢ်လီၤႉအ၀ဲသ့ၣ်န့ၣ်တၢ်ကီတၢ်ခဲအိၣ်လၢကဟးထီၣ်လၢတၢ်ချၢမီၤနီၤႉမ့ဘၣ်လဲၤလၢတၢ်မဲာ်ညါလံန့ၣ်ၦၤလၢအဘၣ်သးစံၣ်ဖျိးထီၣ်န့ၣ်အိၣ်ႉၦၤလၢအဆဲးကျိးၦၤလၢကဟဲက့ၤမၤသကိးတၢ်ဒီးၦၤန့ၣ်အိၣ်ဒီဒူၣ်ညါ”အဂ့ၢ်န့ၣ် အ၀ဲစံးအါထီၣ်၀ဲန့ၣ်လီၤႉ
လၢခ့ၣ်အဲၣ်ယူၣ် နိၣ်တကီကီၢ်ဆၣ်အပူၤ ပၢၤကီၢ်ဒီးပယီၤသုးလၢအဟဲက့ၤမၤ(CDM)လၢအဖိးသဲစးန့ၣ်အိၣ်၀ဲခဲလၢာ် (၁၅)ဂၤဒီးဖဲန့ၣ်အကျါပၣ်ဃုာ်၀ဲသုးဖိႇသုးခိၣ်သ့ၣ်တဖၣ်ဒီးတကးဒံးဘၣ်အမဲာ်ညါ ၦၤလၢတၢ်မၤလီၤတံၢ်စရီအဖၢမုၢ်စ့ၢ်ကီးအိၣ်ဒံး၀ဲအဂ့ၢ်န့ၣ် ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ
ကၠၤအ့စ့ၣ်ကၠံကီၢ်ဆၣ်အပူၤ တၢ်မၤတၢ်ဟ့ၣ်လီၤလံာ်တၢ်လၤကပီၤမူးတၢ်ရဲၣ်တၢ်ကျဲၤဘျီ၀ဲအံၤအပူၤန့ၣ် ကၠၤအ့စ့ၣ်ကၠံကီၢ်ဆၣ်အခၢၣ်စးကညီကီၢ်စဲၣ်ဘျီၣ်ဒိၣ်ခၢၣ်စးအူတ့ၤမၠိအူႇကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးရ့ၣ် ၁၇ ၦၤဘၣ်မူဘၣ်ဒါဒီးတၢ်ပၢၢ်ဆၢသုးကရူၢ် ၦၤဘၣ်မူဘၣ်ဒါတဖၣ်ဟဲထီၣ်၀ဲန့ၣ်လီၤႉ
