လါမးရှး ၃၀ သီႇ ၂၀၂၃ နံၣ်ႇ ခ့ၣ်အဲးစံၣ်
ကညီကလုာ်ပၣ်တံၣ်(KNP)လၢအိၣ်ဆီလီၤသးဖဲအ့ၣ်ယၣ်၀တံၣ်ကီၢ်ခီဒိၣ်ပူၤအံၤတက့ၤမၤနီၣ်မၤဃါသးလၢသုးမီၤစိရိၤတၢ်ဃုထၢခီၣ်မံရှၢၣ်ကရူၢ်အအိၣ်ဘၣ်ဒီးကအိၣ်ဆၢထၢၣ်တပူၤဃီဒီးကမျၢၢ်တုၤလၢသုးမိၤစိရိၤသနူလီၤၦီၢ်တစုအဂ့ၢ်န့ၣ် ပၣ်တံၣ်ၦၤဘၣ်မူဘၣ်ဒါစံး၀ဲန့ၣ်လီၤႉ
ဖဲလါမးရှး ၂၈ သီအနံၤန့ၣ် တၢ်ထုးထီၣ်ဒုးသ့ၣ်ညါ၀ဲလၢ ထံရူၢ်ကီၢ်သဲးပၣ်တံၣ်အဒူၣ်(၄၀)လၢအတလဲၤမၤနီၣ်မၤဃါသး လၢသုးမီၤစိရိၤအကီၢ်စၢဖှိၣ်တၢ်ဃုထၢခီၣ်မံရှၢၣ်အအိၣ်ဘၣ်တဖၣ်အံၤတၢ်မၤဟးဂီၤကွံာ်အီၤလံဒီ:ထံရူၢ်ကီၢ်သဲးပၣ်တံၣ်လၢတၢ်မၤဟးဂီၤကွံာ်အီၤတဖၣ်အကျါပၣ်ဃုာ်၀ဲကညီကလုာ်ပၣ်တံၣ်စ့ၢ်ကီးအဂ့ၢ်န့ၣ် ခီၣ်မံရှၢၣ်ထုးထီၣ်ပာ်ဖျါ၀ဲအသိးသ့ၣ် ညါဘၣ်န့ၣ်လီၤႉ
(KNP)ပၣ်တံၣ်ၦၤဘၣ်မူဘၣ်ဒါတဂၤစံး၀ဲလၢ“စးထီၣ်မ့ၢ်လၢသုးဟံးန့ၢ်တၢ်စိတၢ်ကမီၤန့ၣ်ပတမၤဘၣ်ဃးလိာ်သးဒီးအ၀ဲသ့ၣ်ဘၣ်ႉမ့ကိးဟ့ၣ်ၦၤလီၢ်နါက့ပတမၤဘၣ်ႉတၢ်ဃုထၢခီၣ်မံရှၢၣ်မ့ကိး၀ဲနါက့ပတလဲၤထီၣ်ဘၣ်ႉပဆၢတဲာ်လီၤပသးလၢလ့ၤတက့ၤပတမၤဘူးဒီးအ၀ဲသ့ၣ်ဘၣ်ႉၦၤမၤအၢမၤနးနၦၤကလုာ်ထဲထဲအံၤညါန့ၣ်ပကလဲၤပာ်ပနီၣ်အီၤတသ့ဘၣ်ႉလၢသုးမီၤစိရိၤသနူကလီၤၦီၢ်ကွံာ်အဂီၢ်န့ၣ်ပကအိၣ်ဆၢထၢၣ်တပူၤဃီဒီးကမျၢၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် ဖဲလါမးရှး ၂၉ သီအနံၤန့ၣ်လီၤႉ
ဖျိၤ–စှီၤဒံၣ်မိၣ်ကရဲၣ်တ့ၣ်ပၣ်တံၣ်(PSDP)ႇကညီကလုာ်ဒံၣ်မိၣ်ကရဲၣ်တ့ၣ်ပၣ်တံၣ်(KNDP)လၢအိၣ်ဆီလီၤသးဖဲ ကညီကီၢ်စဲၣ်ပူၤအံၤဒီးကညီကလုာ်ပၣ်တံၣ်(KPP)လၢအိၣ်ဆီလီၤသးဖဲ၀့ၢ်တကူၣ်ကီၢ်ခီဒိၣ်အံၤတဖၣ်န့ၣ် က့ၤမၤနီၣ်မၤဃါသးလၢသုးမီၤစိရိၤတၢ်ဃုထၢခီၣ်မံရှၢၣ်အအိၣ်ဒီးထဲဒၣ်(KNP)ပၣ်တံၣ်အံၤလီၤတက့ၤမၤနီၣ်မၤဃါအသးလၢၤဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
“ကညီကလုာ်ပၣ်တံၣ်အတၢ်အိၣ်ဆၢထၢၣ်ဒ်အံၤပပာ်ပနီၣ်ဒီးသဂၢၢ်လီၤအ၀ဲသ့ၣ်ဒိၣ်မးလီၤႉပကဟ့ၣ်ဂံၢ်ဟ့ၣ်ဘါအ၀ဲသ့ၣ်ႉ ခါဆူညါလၢတၢ်ကလဲၤလၢထံရူၢ်ကီၢ်သဲးအကျဲန့ၣ်စ့ၢ်ကီးပၣ်တံၣ်လၢအဟူးဂဲၤဖံးမၤတၢ်လၢကမျၢၢ်ထံဖိကီၢ်ဖိအဂီၢ်ဒ်အံၤတဖၣ်ကဟဲအိၣ်ဖျါထီၣ်အဂီၢ်ပကဆဲးလဲၤအီၤလီၤႉတဘၣ်မ့ၢ်လၢလီၢ်ဆ့ၣ်နီၤလၢသုးမီၤစိရိၤဟ့ၣ်လီၤယၤအံၤယမ့ဆ့ၣ်နီၤဘၣ်န့ၣ်၀ံၤလီၤဒ်န့ၣ်ဒုပတတူၢ်လိာ်ဘၣ်”အဂ့ၢ်န့ၣ် ဘျီၣ်ဒိၣ်ခၢၣ်စးလီၢ်လံၤတဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
ဖဲအပူၤကွံာ်(၂၀၁၅၊၂၀၂၀)တၢ်ဃုၢထၢအခါန့ၣ်ကညီကလုာ်ပၣ်တံၣ်ခၢၣ်စးပတြီာ်တဖၣ်နုာ်လီၤဒိးတပြၢသးလၢတၢ်ဖးဟီၣ်က၀ီၤဘၣ်ထွဲအပူၤဒီးဒိးန့ၢ်ဘၣ်၀ဲတၢ်ဖးနီၣ်ဂံၢ်စှၤဘၣ်ဆၣ်အိၣ်ဆၢထၢၣ်လၢကမျၢၢ်ထံဖိကီၢ်ဖိအအိၣ်တကပၤဒ်အံၤအဖီခိၣ်ပသ့ၣ်ညါပာ်ပနီၣ်ဒီးကဆဲးဟ့ၣ်ဂံၢ်ဟ့ၣ်ဘါ၀ဲအဂ့ၢ်န့ၣ် ၦၤဟူးဂဲၤကညီထံရူၢ်ကီၢ်သဲးဖိတဖၣ်စံး၀ဲန့ၣ်လီၤႉ
ကညီကလုာ်ပၣ်တံၣ်အံၤဖဲအပူၤကွံာ်(၂၀၁၄)လါအီးကထိဘၢၣ်အခါန့ၣ်လဲၤမၤနီၣ်မၤဃါသးလၢကီၢ်စၢဖှိၣ်တၢ်ဃုထၢခီၣ်မံရှၢၣ်အအိၣ်ဒီးလၢကညီကလုာ်အဂီၢ်ဒ်သိးတၢ်န့ၢ်ပၢဘၣ်ထံရူၢ်ကီၢ်သဲးခွဲးယာ်ဒီးကမျၢၢ်ထံဖိကီၢ်ဖိခဲလၢာ်ကအိၣ်ဘၣ်ဘံၣ်ဘံၣ်ဘၢဘၢအဂီၢ် ကပာ်ဖှိၣ်မၤသကိးတၢ်ဒီးကလုာ်ဒူၣ်လၢအဂၤတဖၣ်အဂ့ၢ်န့ၣ် အ၀ဲသ့ၣ်ပၣ်တံၣ်အတၢ်ပညိၣ်အပူၤ ပာ်ဖျါ၀ဲန့ၣ်လီၤႉ
