ခီဖျိတၢ်ကးတံၢ်ဃ၁်တၢ်စိ၁်ထီၣ်စိ၁်လီၤတၢ်အီၣ်တၢ်အီအဃိပလီကီၢ်ဆၣ်ပူၤဟုသးဒီးဂံၢ်ခီၣ်ထံးတၢ်အီၣ်တၢ်အီတဖၣ်လီၤတူ၁်

လါအ့ဖြ့ၣ် ၂၄ သီႇ ၂၀၂၃ နံၣ်ႇ ခ့ၣ်အဲးစံၣ်

လၢတနီသရံၣ်ကီၢ်ခီဒိၣ် ပလီကီၢ်ဆၣ် ပလီ၀့ၢ်ဒီးဒူသ၀ီတနီၤအပူၤ ခီဖျိပယီၤသုးပံးဃာ်၀ဲတၢ်စိာ်ထီၣ်စိာ်လီၤ တၢ်အီၣ်တၢ်အီအဃိ ဟုသးဒီးဂံၢ်ခီၣ်ထံးတၢ်အီၣ်တၢ်အီတဖၣ်စးထီၣ်လီၤတူာ်၀ဲလံအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣလီၤႉ

စးထီၣ်ဖဲအပူၤကွံာ်လါဖ့ၤဘြူၤအါရံၤသၢနွံတနွံတုၤလၢခဲအံၤန့ၣ်ပယီၤသုးပံးဃာ်၀ဲတၢ်စိာ်ထီၣ်စိာ်လီၤဟုသးဒီးဂံၢ်ခီၣ်ထံးတၢ်အီၣ်တၢ်အီတဖၣ်အဃိကမျၢၢ်လၢအိၣ်(ပလီ၀့ၢ်ပူၤ)ဒီးသ၀ီပူၤတဖၣ်တၢ်အီၣ်တၢ်အီစးထီၣ်လီၤတူာ်၀ဲအဃိ ထံၣ်ဘၣ်၀ဲတၢ်ကီတၢ်ခဲတဖၣ်အဂ့ၢ်န့ၣ် ပလီကီၢ်ဆၣ် လီၢ်က၀ီၤကမျၢၢ်တဂၤ စံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“အ၀ဲသ့ၣ်န့ၣ်လၢညါလံၤလံၤလံတပျဲၦၤစိာ်ထီၣ်စိာ်လီၤတၢ်လၢၤဘၣ်ႉအ၀ဲသ့ၣ်ဆိမိၣ်၀ဲလၢၦၤမၤစၢၤ(PDF)အဃိအ၀ဲသ့ၣ်တပျဲၦၤစိာ်တၢ်အီၣ်တၢ်အီလၢၤဘၣ်ႉခဲအံၤလၢ၀့ၢ်ပူၤမ့ၢ်ဂ့ၤႇလၢသ၀ီပူၤမ့ၢ်ဂ့ၤန့ၣ်ဟုသးႇပသၢသၣ်ႇညၣ်ဒၢတဖၣ်န့ၣ်လၢာ်လံႉမ့၀ံၤဖဲပလီအံၤတၢ်ဒုးကဲထီၣ်ခဲအံၤခဲအံၤအဃိပယီၤသုးအံၤမၤ၀ဲဒ်တဲာ်လွံၢ်တဲာ်န့ၣ်မီၤနီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

ပယီၤသုးအံၤတပျဲၦၤစိာ်ထီၣ်စိာ်လီၤတၢ်အီၣ်တၢ်အီတကးဒံးဘၣ်အမဲာ်ညါတပျဲစိာ်စ့ၢ်ကီးဒးဆံၣ်သိႇဒံၣ်စဲၣ်ဒီးပရံမံယါသိတဖၣ်အံၤဘၣ်အဃိလီၢ်က၀ီၤကမျၢၢ်လၢအသူဒးစံၣ်သ့ၣ်တဖၣ်အံၤထံၣ်ဘၣ်၀ဲတၢ်ကီတၢ်ခဲအဂ့ၢ်န့ၣ် လီၢ်က၀ီၤကမျၢၢ်တဂၤစံး၀ဲဒ်အံၤန့ၣ်လီၤႉ

“ဒးဆံၣ်ႇဒံၣ်စဲၣ်ႇပရံမံယါသိတဖၣ်ခဲလၢာ်လီၤတဟ့ၣ်စိာ်၀ဲဘၣ်ႉအ၀ဲသ့ၣ်ဆီလီၤတြဲၤဘျီအိၣ်ခိးသမံသမိးတၢ်ႉဒးဆံၣ်ကျးနါက့အ၀ဲသ့ၣ်တဟ့ၣ်ဒုးဆါ၀ဲလၢၤဘၣ်ႉပယီၤသုးဟးမၤပျံၤမၤဖုးတၢ်ႉတၢ်အံၤတၢ်ဖးနးညါ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

ဒ်န့ၣ်အသိးလၢပလီ၀့ၢ်ဃၢၤ(ပလၣ်၀့ၢ်)ပူၤန့ၣ်စ့ၢ်ကီးပယီၤသုးပံးဃာ်၀ဲတၢ်စိာ်ထီၣ်စိာ်လီၤဟုသးအိၣ်၀ဲဘၣ်ဆၣ် မ့ပၣ်ဃုာ်၀ဲသးၦၢ်အလံာ်အုၣ်သးမးတၢ်ပျဲလဲၤၦ့ၤ၀ဲဟုသးဒီးၦၤကညီတဂၤန့ၣ်ၦ့ၤဟုသးန့ၢ်ထဲ(၁)ဘူလီၤအဂ့ၢ်န့ၣ် ဟီၣ်က၀ီၤတၢ်ကစီၣ်သန့တဖၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ

ပလီကီၢ်ဆၣ်အံၤသုးမီၤစိရိၤဘိးဘၣ်ရၤလီၤ၀ဲလၢအမ့ၢ်သုးတၢ်ပၢတၢ်ပြးဒီးတၢ်ဒုးကဲထီၣ်၀ဲလၢပယီၤသုးဒီးလီၢ်က၀ီၤတၢ်ဒီသဒၢကမျၢၢ်သုးအဘၢၣ်စၢၤခဲအံၤခဲအံၤဒီးပယီၤသုးအံၤသူ၀ဲတဲာ်လွံၢ်တဲာ်ပံးဃာ်၀ဲတၢ်စိာ်ထီၣ်စိာ်လီၤတၢ်အီၣ်တၢ်အီသ့ၣ်တဖၣ်တပယူာ်ဃီအဂ့ၢ်န့ၣ် တၢ်ဒီသဒၢသုးကရူၢ်ပာ်ဂၢၢ်ပာ်ကျၢၤစံး၀ဲန့ၣ်လီၤႉ