ပယီၤသုးလၢအိၣ်ကီးတရံး၀့ၢ်ပူၤတဖၣ်ခးလီၤကျိဖးဒိၣ်အဃိ ကမျၢၢ်ဘၣ်ဒိဘၣ်ထံး

လါအ့ဖြ့ၣ် ၇ သီႇ ၂၀၂၃ နံၣ်ႇ ခ့ၣ်အဲးစံၣ်

ပယီၤသုးလၢအိၣ်ကညီကီၢ်စဲၣ် ကီးတရံး၀့ၢ်ပူၤတဖၣ်အံၤ ခီဖျိအ၀ဲသ့ၣ်ခးတပျုာ်တပျီာ်ကျိဖးဒိၣ်အဃိ လီၢ်က၀ီၤကမျၢၢ်ဘၣ်ဒိဘၣ်ထံး၀ဲအဂ့ၢ်န့ၣ် သ့ၣ်ညါဘၣ်လၢကမျၢၢ်အိၣ်ကီးတရံး၀့ၢ်ပူၤတဖၣ်အအိၣ်န့ၣ်လီၤႉ

ဖဲလါအ့ဖြ့ၣ် ၆ သီ ဂီၤခီအဆၢကတီၢ် ပယီၤသုး(ခလရ–၉၇)လၢအိၣ်ဆီလီၤသးဖဲကီးတရံး၀့ၢ်ပူၤတဖၣ်အံၤ ခီဖျိအ၀ဲသ့ၣ်ခးလီၤကျိဖးဒိၣ်အဃိ ခန့မူၤသ၀ီဖိ ပိာ်မုၣ်တဂၤဒီး ၦၤပိာ်မုၣ်လၢအိၣ်က၀ီၤဒ့(၇)ပူၤတဂၤ ဘၣ်ဒိဘၣ်ထံး၀ဲအဂ့ၢ်န့ၣ် သ့ၣ်ညါဘၣ်လၢၦၤအိၣ်၀့ၢ်ပူၤတဖၣ်အအိၣ်န့ၣ်လီၤႉ

ဒ်န့ၣ်အသိးဖဲတၢ်တနံၤဃီ၀ဲအံၤန့ၣ်မုၢ်ထူၣ်အဆၢကတီၢ်ခီဖျိပယီၤသုးတဒူၣ်ဃီ၀ဲအံၤတဖၣ် ခးလီၤကဒီးကျိဖးဒိၣ်ဒီးခီဖျိကျိဖးဒိၣ်လီၤတဲာ်ပိၢ်ဖးထီၣ်လၢ(အီကြီ)သီခါဖၠၣ်ဖီခိၣ်အဃိ ၦၤသ၀ီဖိလၢအလဲၤစံၣ်အိၣ်သီခါဖၠၣ်ကရၢၢ်ပူၤ(၂)ဂၤစ့ၢ်ကီးဘၣ်ဒိဘၣ်ထံး၀ဲအဂ့ၢ်န့ၣ် သ၀ီဖိတဖၣ်စံး၀ဲန့ၣ်လီၤႉ

တကးဒံးဘၣ်လၢန့ၣ်အမဲာ်ညါဖဲလါအ့ဖြ့ၣ် ၆ သီ ဂီၤခီအဆၢကတီၢ်စ့ၢ်ကီး လၢကီးတရံး(က၀ီၤဒ့ ၃) ပယီၤသုးတြဲၤနီၣ်ဂံၢ်(၃)ကပၤန့ၣ် တၢ်ခး၀ဲၦၤပိာ်မုၣ်တဂၤဒီးဘၣ်ဒိဘၣ်ထံး၀ဲအဂ့ၢ်န့ၣ် ၦၤမၤစၢၤတၢ်ကရူၢ်ဖိတဂၤ စံး၀ဲန့ၣ်လီၤႉ

“ဖဲတဂီၤအံၤကဘၣ်ဖဲ ၅ နၣ်ရံၣ်ဃၣ်ဃၣ်န့ၣ် လၢကီးတရံး၀့ၢ်နီၣ်ဂံၢ်(၃)တြဲၤန့ၣ် ပတၢ်နၢ်ဟူကျိသီၣ်အဃိ ၦၤဆဲးဃီၤလီတဲစိ(ဖိ)ႉတဲ၀ဲလၢၦၤပိာ်မုၣ်ဘၣ်ဒိတဂၤအဃိပလဲၤတီၣ်ဒီးဆှၢအီၤလၢတၢ်ဆါဟံၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲလါအ့ဖြ့ၣ် ၆ သီအနံၤ န့ၣ်လီၤႉ

ဖဲအပူၤကွံာ်လါမးရှး ၂၅ သီအခါန့ၣ် စးထီၣ်ဖဲတၢ်ဒုးကဲထီၣ်၀ဲလၢ ကီးတရံး–ကြုၢ်တု–မၠၣ်တ၀ံၣ်ဟီၣ်က၀ီၤပူၤ၀ံၤလီၢ်ခံန့ၣ် ပယီၤသုးလၢအိၣ်ကီးတရံး၀့ၢ်ပူၤတဖၣ်အံၤ ခးလီၤကျိဖးဒိၣ်ဆူကီးတရံး၀့ၢ်ချၢဒူသ၀ီတဖၣ်အပူၤဟဲအါထီၣ်၀ဲအဂ့ၢ်န့ၣ် ကမျၢၢ်လၢအိၣ်၀့ၢ်ပူၤတဖၣ်စံး၀ဲန့ၣ်လီၤႉ

ဖဲအပူၤကွံာ်လါအ့ဖြ့ၣ် ၃ သီအခါစ့ၢ်ကီး ပယီၤသုးဒီးသုးခိးကီၢ်ဆၢ(BGF)တဖၣ်ပာ်ဖှိၣ်ထီၣ်သးဒွဲၣ်အူအီၣ်၀ဲ ကီးတရံးကလံၤစိး(ကၠီၤစှၤကိ)သ၀ီပူၤ ကမျၢၢ်အဟံၣ်(၂၃)ဖျၢၣ်ဒီးတၢ်ဖိတၢ်လံၤလၢအဂၤတဖၣ်အဂ့ၢ်န့ၣ် ၦၤသ၀ီဖိတဖၣ်စံး၀ဲန့ၣ်လီၤႉ