ခီဖျိပယီၤသုးနု၁်လီၤအိၣ်လၢ(သံမိုးတောင်)ကၠိကရၢၢ်ပူၤအဃိတၢ်ကီတၢ်ခဲအိၣ်လၢကက့ၤအိးထီၣ်ကဒါကၠိ

လါမ့ၤ ၁၈ သီႇ ၂၀၂၃ နံၣ်ႇ ခ့ၣ်အဲးစံၣ်

လၢကညီကီၢ်စဲၣ် သၣ်တီၣ်ကၠံ၀့ၢ် လ့ၣ်သိၤဟီၣ်က၀ီၤအပူၤ စးထီၣ်လါမ့ၤထီၣ်တနွံတုၤလၢခဲအံၤတစုန့ၣ် ခီဖျိပယီၤသုးနုာ်လီၤအိၣ်ဆီလီၤသးလၢ(သံမိုးတောင်)သ၀ီ ကၠိကရၢၢ်ပူၤအဃိ တၢ်ကီတၢ်ခဲအိၣ်လၢကက့ၤအိးထီၣ် ကဒါကၠိအဂ့ၢ်န့ၣ် သ့ၣ်ညါဘၣ်လၢဟီၣ်က၀ီၤဂံၢ်ခီၣ်ထံးၦၤဟ့ၣ်တၢ်ကစီၣ်ဖိတဖၣ်အအိၣ်န့ၣ်လီၤႉ

ဖဲအပူၤကွံာ်(၂၀၂၂)လါနိၣ်၀့ဘၢၣ်အခါ လၢ(သံမိုးတောင်)သ၀ီအပူၤ တၢ်ဒုးကဲထီၣ်၀ဲလၢပယီၤသုးဒီး ဟီၣ်က၀ီၤတၢ်ပၢၢ်ဆၢသုးကရူၢ်အဘၢၣ်စၢၤဒီးခီဖျိပယီၤသုးခးလီၤကျိဖးဒိၣ်ဒီးကဘီယူၤဟဲခးလီၤတၢ်အဃိ လီၢ်က၀ီၤကမျၢၢ်တဖၣ်အါဒၣ်တက့ၢ်ဘၣ်ဃ့ၢ်ထီၣ်၀ဲဒၣ်န့ၣ်လီၤႉ

ဖဲတလါအံၤလါမ့ၤအတီၢ်ပူၤစ့ၢ်ကီးခီဖျိပယီၤသုးအိၣ်ဒံးဖဲကၠိကရၢၢ်ပူၤဒီးတၢ်ဒုးကဲထီၣ်တလီၢ်လီၢ်အဃိ က့ၤအိးထီၣ်ကဒါကၠိတသ့ဒံးဘၣ်အဂ့ၢ်န့ၣ် ၦၤလၢအဘူးဒီးကၠိၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ

လီၢ်က၀ီၤပိာ်မုၣ်တဂၤစံး၀ဲလၢ“တနံၣ်အံၤၦၤက့ၤအိးထီၣ်ကဒါကၠိတညီဘၣ်အဃိသရၣ်မုၣ်တဂၤတဲ၀ဲလၢၦၤကၠိဖိလၢအဲၣ်ဒိးလဲၤထီၣ်က့ၤကၠိလၢအဂၤတဖၣ်န့ၣ်မၢဟဲဟံကၠိလံာ်အုၣ်သးမီၤနီၤႉမ့ၢ်ယကဘၣ်ဒ်လဲၣ်မးတသ့ၣ်ညါလၢၤဘၣ်ႉ ၦၤလၢအကျိၣ်အိၣ်စ့အိၣ်ညါလဲၤပာ်က့ၤအဒံၣ်အဖိကၠိလၢအဂၤသ့၀ဲဘၣ်ဆၣ်မ့မ့ၢ်လၢၦၤမုၢ်ဆ့ၣ်မုၢ်ဂီၤဖိတဖၣ်အဂီၢ်ဒုတညီနီတစဲးဘၣ်”အဂ့ၢ်န့ၣ် စံး၀ဲန့ၣ်လီၤႉ

လၢန့ၣ်အမဲာ်ညါဒူသ၀ီလၢအိၣ်ဘူးဖဲတၢ်ခိၣ်တၢ်ဃၢၤဖဲန့ၣ်ၦၤကၠိဖိလၢဖျိထီၣ်တီၤဖုၣ်သ့ၣ်တဖၣ်ဟဲထီၣ်ကဒါ၀ဲ (သံမိုးတောင်)တီၤထီကၠိအံၤလီၤဒီးခီဖျိတၢ်က့ၤအိးထီၣ်ကဒါကၠိတသ့လၢၤဘၣ်အဃိဘၣ်ကိၢ်ဘၣ်ဂီၤတၢ်လၢဒံၣ်ဖိတၢ်ကူၣ်ဘၣ်ကူၣ်သ့ခါဆူညါအဂီၢ်ဒိၣ်မးအဂ့ၢ်န့ၣ် ၦၤကၠိဖိမိၢ်ပၢ်လၢအဃ့ၢ်တၢ်ဒုးတဂၤစံး၀ဲန့ၣ်လီၤႉ

“ဖဲမဟိတနံၣ်န့ၣ်တၢ်ဒုးကဲထီၣ်၀ံၤကၠိက့ၤအိးထီၣ်ကဒါၦၤဒိးစဲးနံၣ်ကတၢၢ်တၢ်ဒိးစဲးဒံးႉဘၣ်ဆၣ်လၢလီၢ်ခံအံၤတၢ်ဒုးကဲထီၣ်တပယူာ်ဃီအဃိၦၤက့ၤပံးကဒါကၠိမီၤနီၤႉမ့ၢ်ဘၣ်မၤက့ၤဒ်လဲၣ်မးတသ့ၣ်ညါလၢၤဘၣ်လၢဖိသၣ်တၢ်ကူၣ်ဘၣ်ကူၣ်သ့အဂီၢ်အံၤႉခဲအံၤကၠိနါက့ကက့ၤအိးထီၣ်ကဒါလီၤႇပဘၣ်စံၣ်အဖၢမုၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

ဖဲလီၢ်က၀ီၤကမျၢၢ်သ့ၣ်တဖၣ်အံၤစံၣ်မှံဟးဖျိးအခါန့ၣ်ပယီၤသုးနုာ်လီၤဟုၣ်အ၀ဲသ့ၣ်တၢ်ဖိတၢ်လံၤအိၣ်၀ဲအသိး ခီဖျိပယီၤသုးခးလီၤကျိဖးဒိၣ်ဆူသ၀ီပူၤတၢ်ဖံးအီၣ်မၤအီၣ်လီၢ်ကျဲကရၢၢ်ပူၤအဃိလၢကဖံးအီၣ်မၤအီၣ်တၢ်အဂီၢ်တၢ်အိၣ်နီတမံၤလၢၤဘၣ်အဃိထံၣ်ဘၣ်၀ဲတၢ်ကီတၢ်ခဲအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ

ဖဲအပူၤကွံာ်လါမ့ၤ ၁၁ သီအခါစ့ၢ်ကီး ပယီၤသုးလၢအိၣ်(သံမိုးတောင်)ကၠိကရၢၢ်ပူၤတဖၣ်အံၤဒီးကညီဒီကလုာ် တၢ်ထူၣ်ဖျဲးသုးမုၢ်ဒိၣ်(KNLA)အဘၢၣ်စၢၤတၢ်ဒုးကဲထီၣ်၀ဲအဃိ ပယီၤသုးသံ(၁)ဂၤဒံးအဂ့ၢ်န့ၣ် သ့ၣ်ညါဘၣ်လၢ ခ့ၣ်အဲၣ်ယူၣ် ဂံၢ်ခီၣ်ထံးၦၤဟ့ၣ်တၢ်ကစီၣ်ဖိအအိၣ်န့ၣ်လီၤႉ

လၢန့ၣ်အမဲာ်ညါဖဲတၢ်တနံၤဃီ၀ဲန့ၣ်ဟါခီအဆၢကတီၢ် (Alpha One)ကရူၢ်လဲၤထီၣ်ခး၀ဲ သၤမိတီၤ ပယီၤသုးကလၢၤအံၤ လၢကဘီယူၤဒြိ၀ံၤလီၢ်ခံ ခီဖျိပယီၤသုးက့ၤခးလီၤကဒါကျိဖးဒိၣ်လၢ(သၤမိတီၤ)ဆၢခိၣ် သ၀ီပူၤ အဃိ ဟံၣ်ဟးဂီၤ၀ဲ(၃)ဖျၢၣ်ဒီးကျီးဟးဂီၤ၀ဲတနီၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ