ပယီၤသုးလၢအနု၁်လီၤအိၣ်ဆီလီၤသးဖဲသ၀ီပူၤတဖၣ်ဟံကွံ၁်ကမျၢၢ်စ့ဒီးလီတဲစိတဖၣ်

လါမ့ၤ ၁၆ သီႇ ၂၀၂၃ နံၣ်ႇ ခ့ၣ်အဲးစံၣ်

လၢတနီသရံၣ်ကီၢ်ခီဒိၣ် ယ့ၤဖၠူၤကီၢ်ဆၣ် နဘူၣ်လဲၤဟီၣ်က၀ီၤအပူၤ ပယီၤသုးလၢအနုာ်လီၤအိၣ်ဆီလီၤသးဖဲ (မူဒူ)သ၀ီပူၤတဖၣ်အံၤဟံကွံာ်၀ဲသ၀ီဖိအကျိၣ်အစ့ဒီးအလီတဲစိသ့ၣ်တဖၣ် အဂ့ၢ်န့ၣ် သ့ၣ်ညါဘၣ်လၢမူဒူသ၀ီဖိတဖၣ် အအိၣ်န့ၣ်လီၤႉ

ဖဲအပူၤကွံာ်လါမ့ၤ ၁၄ သီအနံၤ ယ့ၤဖၠူၤကီၢ်ဆၣ် တၢ်ဒီသဒၢကမျၢၢ်သုးနုာ်လီၤခး၀ဲပယီၤသုးတြဲၤ၀ံၤလီၢ်ခံ ဖဲမဟါန့ၣ်ပယီၤသုးနုာ်လီၤ၀ဲလၢမူဒူသ၀ီပူၤဒီးဟံကွံာ်၀ဲသ၀ီဖိအကျိၣ်အစ့ဒီးလီတဲစိတကးဒံးဘၣ် ဖီၣ်၀ဲသ၀ီဖိတဖၣ်အဂ့ၢ်န့ၣ် မူဒူသ၀ီဖိလၢတအဲၣ်ဒိးပာ်ဖျါအမံၤတဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲလါမ့ၤ ၁၆ သီ အနံၤ န့ၣ်လီၤႉ

အ၀ဲစံး၀ဲလၢ“ပယီၤဟဲနုာ်လီၤလၢသ၀ီပူၤဘျီသ၀ီဖိတဖၣ်ပျံၤတၢ်န့ၣ်ႉမ့၀ံၤပယီၤသုးဖီၣ်ချုးသ၀ီဖိလၢအလဲၤစံၣ်အိၣ်ခူသူၣ်လၢ(မယင်းကြီး)ဃိၣ်ခိၣ်န့ၣ် ၅ ဂၤႉဟံကွံာ်၀ဲသ၀ီဖိတဖၣ်အံၤအလီတဲစိဒီးအကျိၣ်အစ့ခဲလၢာ်လီၤႉ ခဲအံၤနုာ်လီၤဃုခွံခွးတၢ်အဖၢမုၢ်လီၤႉပယီၤသုးနီၣ်ဂံၢ်အိၣ်ဆံးအါလဲၣ်ဒုပတသ့ၣ်ညါလီၤတံၢ်လီၤဆဲးဘၣ်ႉဘၣ်ဆၣ်ဖးအါညါ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

ပယီၤသုးဟ့ၣ်ထီၣ်တၢ်ဂ့ၢ်လၢကနုာ်လီၤဃု၀ဲတၢ်ဒီသဒၢကမျၢၢ်သုးဒီး ဆီလီၤသးလၢသ၀ီပူၤဃုခွံခွးတၢ်ဒ်အံၤအဃိ လီၢ်က၀ီၤသ၀ီဖိတဖၣ်ပျံၤတၢ်ဖုးတၢ်အဂ့ၢ်န့ၣ် သ၀ီဖိတဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ

တချုးဒံးလၢပယီၤသုးနုာ်လီၤလၢသ၀ီ၀ဲန့ၣ်အပူၤဒံးဘၣ်အခါန့ၣ်သုးမီၤစိရိၤကဘီယူၤဟဲဆှၣ်တၢ်အိၣ်၀ဲကိးမုၢ်နံၤဒဲးဒီး ဖဲန့ၣ်၀ံၤလီၢ်ခံလါမ့ၤ ၁၄ သီအနံၤန့ၣ် ကဘီယူၤဟဲတ့ၢ်လီၤ၀ဲမ့ၣ်ပိၢ်အဂ့ၢ်န့ၣ် လီၢ်သ၀ီၤသ၀ီဖိတဖၣ်စံး၀ဲန့ၣ်လီၤႉ

လီၢ်က၀ီၤသ၀ီဖိတဂၤစံး၀ဲလၢ“ဖဲအ၀ဲတနံၤ ဂီၤခီ ၄ နၣ်ရံၣ်အခါန့ၣ်တၢ်ဒုးကဲထီၣ်ႉ ကဘီယူၤဟဲတ့တၢ်လီၤ မ့ၣ်ပိၢ်လၢသ၀ီပူၤႉၦၤဘၣ်ဒိဘၣ်ထံးဒုတအိၣ်ဘၣ်ႉကဘီယူၤဟဲအဃိသ၀ီဖိစံၣ်ထီၣ်၀ဲန့ၣ်ႉအဃိန့ၣ်ပဘၣ်ယိၣ်လၢကဘီယူၤကဟဲကဒါမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

ဖဲအပူၤကွံာ်လါမ့ၤ ၁၄ သီ ဂီၤခီအဆၢကတီၢ် လီၢ်က၀ီၤတၢ်ဒီသဒၢကမျၢၢ်သုးနုာ်လီၤခး၀ဲ ယ့ၤဖၠူၤ၀့ၢ်ပူၤ ပယီၤသုးတၢ်သမံသမိးတြဲၤလီၢ်တခါဒီးဖဲန့ၣ်ခီဖျိတၢ်ဘၣ်ပယီၤသုးနးအဃိအ၀ဲသ့ၣ်စးထီၣ်သူ၀ဲကဘီယူၤလၢအဆိကတၢၢ်တဘျီဒီးတကီၢ်ခါခဲအံၤခံခီခံကပၤဒုးယၤတၢ်ဖ့ၣ်စၢအိၣ်ဒံး၀ဲအဂ့ၢ်န့ၣ် လီၢ်က၀ီၤပူၤတၢ်ကစီၣ်ပာ်ဖျါ၀ဲအသိး သ့ၣ်ညါဘၣ် န့ၣ်လီၤႉ