လါယူၤ ၄ သီႇ ၂၀၂၃ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဖၣ်အၣ်ကီၢ်ရ့ၣ် တၢ်ကြဲၢ်ကီၢ်ဆၣ်အပူၤ တီနီၢ်ကစၢၢ်ခီၣ်ထံး(ကွံကၠဲၤ)သ၀ီကပၤ ကွံကၠဲၤထံလီၤဆှူအံၤ တၢ်စူၤခါအတီၢ်ပူၤခီဖျိထံကစၢၢ်လီၤအါဒီး တၢ်ဘၣ်ယိၣ်အိၣ်အဃိ တၢ်ပံးဃာ်၀ဲထံလီၤဆှူလဲၤဟးလိာ်ကွဲတန့ၢ်လၢၤဘၣ်အဂ့ၢ်န့ၣ် ထံလီၤဆှူကမံးတံာ်ကရူၢ် ထုးထီၣ်ပာ်ဖျါ၀ဲန့ၣ်လီၤႉ
ဒ်ကွံကၠဲၤထံလီၤဆှူကမံးတံာ်လံာ်တၢ်ပာ်ဖျါပူၤအသိးန့ၣ်တၢ်စူၤခါအတီၢ်ပူၤခီဖျိထံကစၢၢ်လီၤအါအဃိ စးထီၣ်လါမ့ၤ ၃၁ သီတုၤလၢလါနိၣ်၀့ဘၢၣ် ၃၁ သီ လၢဃုလါအတီၢ်ပူၤအံၤ တၢ်လဲၤဟးလိာ်ကွဲတန့ၢ်လၢၤ၀ဲဘၣ်ဒီး တၢ်ပာ်ပနီၣ်မုၢ်နံၤမုၢ်သီအတီၢ်ပူၤၦၤလၢအမ့လဲၤဟးလိာ်ကွဲတၢ်ဂ့ၢ်မ့ကဲထီၣ်သးဒီးအ၀ဲသ့ၣ်တမံၤမံၤန့ၣ် ထံလီၤဆှူဘံၣ်ဘၢကမံးတံာ်တဟံး၀ဲမူဒါဘၣ်အဂ့ၢ်န့ၣ် လံာ်တၢ်ပာ်ဖျါအပူၤစံး၀ဲန့ၣ်လီၤႉ
ထံလီၤဆှူၦၤဘၣ်မူဘၣ်ဒါတဂၤစံး၀ဲလၢ“တၢ်စူၤခါအတီၢ်ပူၤအံၤပမ့ပံးဃာ်အီၤမးအဂ့ၤ၀ဲမီၤနီၤႉၦၤသူၣ်ဘီၣ်သးစၢ်တဖၣ်န့ၣ်သ့ၣ်ညါ၀ဲလၢဘၣ်သးမုာ်ဘၣ်သးပၠီၣ်လီၤႉတၢ်ကကဲထီၣ်သးဒ်လဲၣ်န့ၣ်အ၀ဲသ့ၣ်တသ့ၣ်ညါ၀ဲဘၣ်ႉမ့၀ံၤပတဆၢမုၢ်လၢ်လၢတၢ်သံတၢ်ၦၢ်ကကဲထီၣ်ဖဲထံလီၤဆှူအံၤဘၣ်မီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
လၢကညီကီၢ်စဲၣ်ဟီၣ်က၀ီၤတဖၣ်အပူၤတၢ်ဟးလိာ်ကွဲလီၢ်ထံလီၤဆှူႇထံကျိဒီးကစၢၢ်ကလိသ့ၣ်တဖၣ်အိၣ်၀ဲအါမးဒီး ခီဖျိတၢ်သံတၢ်ၦၢ်ကဲထီၣ်သးအိၣ်အဃိ ထံလီၤဆှူကစၢၢ်ကလိလၢတၢ်ပံးဃာ်၀ဲလၢလဲၤတန့ၢ်ဘၣ်အံၤစ့ၢ်ကီးအိၣ်၀ဲအါမး အဂ့ၢ်န့ၣ် ၦၤဘၣ်မူဘၣ်ဒါတဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ
“တၢ်စူၤခါအတီၢ်ပူၤအံၤပမ့ပံးဃာ်အီၤန့ၣ်ဂ့ၤကတၢၢ်လီၤႉယဒံၣ်ယဖိတဖၣ်န့ၣ်အဲၣ်ဒိးလဲၤဖဲန့ၣ်မီၤနီၤႉ ထံကစၢၢ်လီၤအါအဃိတၢ်ဘၣ်ယိၣ်အိၣ်မီၤနီၤႉမ့၀ံၤတၢ်လီၢ်ဖဲန့ၣ်န့ၣ်ၦၤသံတလီၢ်လီၢ်လီၤ”အဂ့ၢ်န့ၣ် ကွံကၠဲၤသ၀ီဖိ နီၢ်ဒါမူစံး၀ဲန့ၣ်လီၤႉ
မ့တုၤဃီၤလၢတၢ်ယီၤထီၣ်လံန့ၣ်ကိးမုၢ်နံၣ်ဒဲးၦၤဟဲဂဲၤလိာ်ကွဲထံအါမးဒီးဘၣ်ဆၣ်မ့မ့ၢ်တၢ်စူၤခါန့ၣ်ထံကစၢၢ်လီၤ၀ဲအါမးအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ဒ်န့ၣ်အသိးလၢဖၣ်အၣ်ကီၢ်ရ့ၣ်ကီၢ်သူလ့ၤတၢ်ပၢဟီၣ်က၀ီၤ ထံလီၤဆှူတၢ်လီၢ်သ့ၣ်တဖၣ်လၢအမ့ၢ် လ့ကၠိၣ်ကီၤ ထံလီၤဆှူႇ ပျ့ၤကၠ့ၤထၣ် ထံလီၤဆှူသ့ၣ်တဖၣ်အံၤစ့ၢ်ကီး တၢ်စူၤခါအတီၢ်ပူၤအံၤတၢ်ပံးဃာ်၀ဲ လဲၤဟးလိာ်ကွဲတန့ၢ်ဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
