သထူၣ်၀့ၢ်ပူၤ တၢ်ပၢၢ်ဆၢသုးပ၁်ဖှိၣ်နု၁်လီၤခးပယီၤသုးရ့ၣ်(၂)ရ့ၣ် ပယီၤသုးသံ ၅ ဂၤဒီးဘၣ်ဒိ ၄ ဂၤ

လါယူၤ ၁၁ သီႇ ၂၀၂၃ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်အပူၤ ကျိဖးဒိၣ်ပယီၤသုး(၄၀၂)သုးရ့ၣ်ဒီး ခီၣ်ချ့သုးရ့ၣ်(၁)လၢအိၣ်ဆီလီၤသးဖဲသထူၣ်၀့ၢ်ပူၤတဖၣ်အံၤ ဖဲလါအပူၤကွံာ်ယူၤ ၇ သီ ဂီၤခီအဆၢကတီၢ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်နုာ်လီၤခး၀ဲအဃိ ပယီၤသုးသံ(၅)ဂၤဒီး ဘၣ်ဒိ(၄)ဂၤ အကျါပၣ်ဃုာ်၀ဲသုးရ့ၣ်ခိၣ်တဂၤအဂ့ၢ်န့ၣ် သ့ၣ်ညါဘၣ်လၢခ့ၣ်အဲၣ်ယူၣ်ဂံၢ်ခီၣ်ထံးၦၤဟ့ၣ်တၢ်ကစီၣ်ဖိ အအိၣ်န့ၣ်လီၤႉ

ဖဲတၢ်တနံၤန့ၣ်ဂီၤခီ ၆ နၣ်ရံၣ်ဃၣ်ဃၣ်အဆၢကတီၢ် (KNLA)သုးပာ်ဖှိၣ်လၢအမ့ၢ် သထူၣ်တၢ်ဒီသဒၢကမျၢၢ်သုးႇ ဘံလ့ကီၢ်ဆၣ်တၢ်ဒီသဒၢကမျၢၢ်သုးဒီးဒြိသုးကရူၢ်တဖၣ်အံၤနုာ်လီၤခး၀ဲအဃိပယီၤသုး(၄၀၂)သုးရ့ၣ်အၦၤသံ၀ဲ(၅)ဂၤအသိး (ခမရ)သုးရ့ၣ်အၦၤဘၣ်ဒိ(၄)ဂၤအကျါပၣ်ဃုာ်၀ဲ သုးရ့ၣ်ခိၣ်လၢအဟဲသီတဂၤအဂ့ၢ်န့ၣ် ခ့ၣ်အဲၣ်ယူၣ် ဒူသထူၣ်ကီၢ်ရ့ၣ် သိၣ်မှံၤဂ့ၢ်၀ီပၢဆှၢရဲၣ်ကျဲၤကမံးတံာ်ခိၣ် သုးခိၣ် စီၤကၠီၤမၠ့ၣ်စံး၀ဲန့ၣ်လီၤႉ

အ၀ဲစံး၀ဲလၢ“သုးရ့ၣ်ခိၣ်တဂၤန့ၣ်စးထီၣ်လၢအဟဲအိၣ်ဖဲအံၤန့ၣ်ခးလီၤကျိဖးဒိၣ်လၢသ၀ီပူၤကိးမုၢ်နံၤဒဲးလီၤ အဃိၦၤသ၀ီဖိဘၣ်ဒိဘၣ်ထံးအိၣ်တနီၤမီၤနီၤႉအဃိန့ၣ်တၢ်ပၢၢ်ဆၢသုးကရူၢ်က့ၤခးဆၢကဒါ၀ဲဒ်အံၤလီၤႉပနၢ်ဟူလၢ သုးရ့ၣ်ခိၣ်တဂၤန့ၣ်ဘၣ်ဒိနးအဃိၦၤက့ၤဆှၢကူစါယါဘျါအီၤလၢန့ၣ်ပၠံၣ်တီၣ်တၢ်ဆါဟံၣ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲလါယူၤ ၁၀ သီအနံၤန့ၣ်လီၤႉ

ဒ်န့ၣ်အသိးတၢ်နုာ်လီၤခးပယီၤသုးဘျီ၀ဲအံၤန့ၣ်မ့မ့ၢ်တၢ်ပၢၢ်ဆၢသုးပာ်ဖှိၣ်တကပၤခီန့ၣ် တၢ်သံတၢ်ဘၣ်ဒိဘၣ်ထံးတအိၣ်၀ဲဘၣ်အဂ့ၢ်န့ၣ် ဂံၢ်ခီၣ်ထံးၦၤဟ့ၣ်တၢ်ကစီၣ်ဖိ စံး၀ဲန့ၣ်လီမႉ

တၢ်ဒုးကဲထီၣ်၀ံၤလီၢ်ခံကဘၣ်ဖဲဂီၤခီ ၁၀ နၣ်ရံၣ်ဃၣ်ဃၣ်အဆၢကတီၢ်န့ၣ် ပယီၤသုး(ခမရ–၁)ခးလီၤကျိဖးဒိၣ် ၉ ဖျၢၣ် ဆူသထူၣ်ကီၢ်ဆၣ်သ၀ီပူၤ လီၤတဲာ်ပိၢ်ဖးထီၣ်၀ဲလၢ ညၤထါ၀ဲၤႇဒါယိဒီးကၠိၤမ့ၤသ၀ီပူၤအဃိ ကမျၢၢ်အဟံၣ်အဃီဟးဂူာ်ဟးဂီၤအိၣ်၀ဲအဂ့ၢ်န့ၣ် ဟီၣ်က၀ီၤၦၤဘၣ်မူဘၣ်ဒါတဂၤ စံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“လၢညၣ်ထါ၀ဲၤသ၀ီပူၤန့ၣ်ကျိဖးဒိၣ်လီၤတဲာ်ပိၢ်ဖးထီၣ်(၄)ဖျၢၣ်ႇလၢဒါယိန့ၣ်(၃)ဖျၢၣ်ႇလၢကၠိၤမ့ၤန့ၣ်ပိၢ်ဖးထီၣ် (၂)ဖျၢၣ်မီၤနီၤႉမ့မ့ၢ်လၢဒါယိသ၀ီပူၤခီန့ၣ်အူတ့ၤအ့အဟံၣ်ဘၣ်၀ဲဒီးမ့ၣ်ပိၢ်အက့အခီႉၦၤဟံၣ်ၦၤဃီဒီးတၢ်သူတၢ်သၣ်ဟးဂီၤအိၣ်၀ဲတနီၤမီၤနီၤ”အဂ့ၢ်န့ၣ် စံး၀ဲန့ၣ်လီၤႉ

လၢန့ၣ်အမဲာ်ညါဖဲလါယူၤ ၉ သီဟါခီအဆၢကတီၢ်စ့ၢ်ကီး ပယီၤသုးမၤဟးဂီၤကွံာ်၀ဲ ၀ံယီပယီၤသုးကလၢၤကပၤ  သ့းစ့ၣ်–လ့က့ၣ်ကျဲအဃိလီၢ်က၀ီၤကမျၢၢ်တဖၣ်တၢ်ကီတၢ်ခဲအိၣ်ထီၣ်လၢတၢ်ဟးထီၣ်က့ၤလီၤအဂ့ၢ်န့ၣ် သ့ၣ်ညါဘၣ်လၢ သထူၣ်၀့ၢ်ပူၤ ကမျၢၢ်တဖၣ်အအိၣ်န့ၣ်လီမႉ

ဒ်န့ၣ်အသိးဖဲအပူၤကွံာ်လါယူၤ ၁ သီအခါစ့ၢ်ကီး (KNLA)တၢ်ပၢၢ်ဆၢသုးပာ်ဖှိၣ်နုာ်လီၤခး၀ဲ ဖၣ်အၣ်ဒီးသထူၣ်ကီၢ်ဆၣ် အဆၢ ဒူယ့စ့ၣ်သ၀ီ ဒိၤသမံၣ်တိၤ တၢ်သမံသမိးတြဲၤလီၢ်(၂)ခါတဘျီဃီအသိး ခိးထုးစ့ၢ်ကီး၀ဲပယီၤသုးလၢအဟဲထီၣ် (စစ်ကူ)သ့ၣ်တဖၣ်အံၤအဃိ ပယီၤသုးသံ၀ဲခဲလၢာ်(၄၅)ဂၤဒီး ဘၣ်ဒိ၀ဲ(၁၉)ဂၤ အဂ့ၢ်န့ၣ် ဒူသထူၣ်ကီၢ်ရ့ၣ် တၢ်ပၢၢ်ဆၢသုးပာ်ဖှိၣ်ကရူၢ် ထုးထီၣ်ပာ်ဖျါ၀ဲဖဲလါယူၤ ၃ သီအနံၤန့ၣ်လီၤႉ