လါယူၤလံ ၆ သီႇ ၂၀၂၃ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၆)ဟီၣ်က၀ီၤ နိၣ်တကီကီၢ်ဆၣ်အပူၤ စးထီၣ်လါယူၤ ၂၉ သီတုၤလၢ လါယူၤလံ ၅ သီအနံၤန့ၣ် တၢ်နုာ်လီၤခးပယီၤသုးကလၢၤ(၃)ဖျၢၣ်ဒီးတၢ်သမံသမိးတြဲၤလီၢ်(၁)ခါ ပယီၤသုးခိၣ်သံ(၁)ဂၤႇ ဘၣ်ဒိ၀ဲ(၅)ဂၤအဂ့ၢ်န့ၣ် ဒုးယၤလီၤဆီကရူၢ်(SOF)ထုးထီၣ်ပာ်ဖျါ၀ဲဖဲလါယူၤလံ ၅ သီအနံၤ န့ၣ်လီၤႉ
ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ႇဒုးယၤလီၤဆီကရူၢ်(SOF)ႇ(Cloud Wings)ဒြိကရူၢ်တဖၣ်အံၤ ပာ်ဖှိၣ်ထီၣ်သး နုာ်လီၤခး၀ဲပယီၤခီၣ်သုးရ့ၣ်(ခလရ–၂၈၃)၀ဲၤလီၢ်ခိၣ်သ့ၣ်ႇ ကးလံၣ်ခံပယီၤသုးကလၢၤႇ အဘ့ၣ်ပယီၤသုးတၢ်သမံသမိးတြဲၤလီၢ်ႇချၢၣ်တကူၣ်တၢၣ်ပၢၤကီၢ်၀ဲၤလီၢ်သ့ၣ်တဖၣ်အံၤလၢဒြိအဘျီ(၂၀)ဃၣ်ဃၣ်ဒီး တ့ၢ်လီၤ၀ဲမ့ၣ်ပိၢ်အဖျၢၣ်(၅၀)ဘျဲၣ်အဂ့ၢ်န့ၣ် (SOF)သုးဖိတဂၤ စံး၀ဲန့ၣ်လီၤႉ
အ၀ဲစံး၀ဲလၢ“စးထီၣ်လၢလါယူၤ ၂၉ သီတုၤလၢမဟါန့ၣ်ပလဲၤတ့ၢ်လီၤအ၀ဲသ့ၣ်ဒီးဒြိမီၤနီၤႉပနုာ်လီၤခး၀ဲ ပယီၤသုး(ခလရ–၂၈၃)ႇကးလံၣ်ခံပယီၤသုးသးကလၢၤႇအဘ့ၣ်တၢ်သမံသမိးတြဲၤႇ ချၢၣ်တကူၣ်တၢၣ်ပၢၤကီၢ်၀ဲၤလီၢ်ဒီး တၢ်လီၢ်လၢပယီၤသုးကျိၤဟဲထီၣ်အလီၢ်တဖၣ်န့ၣ်မီၤနီၤႉပယီၤသုးအမျိာ်သုးရ့ၣ်(၃၁၈)သုးခိၣ်သံတဂၤဒီးအၦၤသုးဖိဘၣ်ဒိနးနး(၅)ဂၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲလါယူၤလံ ၅ သီ အနံၤန့ၣ်လီၤႉ
ဘၣ်ဃးတၢ်နုာ်လီၤခးပယီၤသုးတၢ်လီၢ်သ့ၣ်တဖၣ်အံၤအဖီခိၣ်တၢ်ပၢၢ်ဆၢသုးပာ်ဖှိၣ်တကပၤ ထုးထီၣ်ပာ်ဖျါ၀ဲ ပယီၤသုးသံဘၣ်ဒိဘၣ်ထံးအနီၣ်ဂံၢ်စရီအိၣ်ဘၣ်ဆၣ်မ့မ့ၢ်ပယီၤသုးတကပၤန့ၣ်ထုးထီၣ်ပာ်ဖျါ၀ဲတအိၣ်နီတမံၤဘၣ်န့ၣ်လီၤႉ
တၢ်နုာ်လီၤခးပယီၤသုးကလၢၤဒီးတၢ်သမံသမိးတြဲၤတၢ်လီၢ်၀ံၤလီၢ်ခံခီဖျိပယီၤသုးက့ၤခးလီၤကဒါကျိဖးဒိၣ်ဆူသ၀ီပူၤအဃိ လီၢ်က၀ီၤကမျၢၢ်ဘၣ်ဃ့ၢ်ထီၣ်၀ဲအဂ့ၢ်န့ၣ် တၢ်ပၢၢ်ဆၢသုးပာ်ဖှိၣ်ကရူၢ်စံး၀ဲန့ၣ်လီၤႉ
“ကျိဖးဒိၣ်ဒုခးလီၤ၀ဲတပယူာ်ဃီလီၤႉ(၁၂၀ မမ)ႇ(၈၁ မမ)ႇ(၆၀ မမ)ခးလီၤ၀ဲခဲလၢာ်လီၤႉ လၢချၢၣ်တကူၣ်တၢၣ်ဒီး ပလ့ၤသ၀ီပူၤစ့ၢ်ကီးကျိဖးဒိၣ်လီၤတဲာ်စ့ၢ်ႉသ၀ီလၢအိၣ်ဘူးဖဲချၢၣ်တကူၣ်တၢၣ်ကပိၤကပၤတဖၣ်န့ၣ်ၦၤဃ့ၢ်ထီၣ်ခဲလၢာ်လီၤ”အဂ့ၢ်န့ၣ် (Cloud Wings)ဒြိကရူၢ် သုးဖိတဂၤ စံး၀ဲန့ၣ်လီၤႉ
ဒ်န့ၣ်အသိးဖဲအပူၤကွံာ်လါယူၤ ၂ သီအခါစ့ၢ်ကီး (KNLA)ႇဒုးယၤလီၤဆီကရူၢ်(SOF)ႇ(Cloud Wings) ဒြိကရူၢ် သုးပာ်ဖှိၣ်တဖၣ်အံၤနုာ်လီၤခးဒံး၀ဲသုးမီၤစိရိၤအပၢၤကီၢ်၀ဲၤလီၢ်ႇပၢပြး၀ဲၤဒၢးႇ(လ၀က)၀ဲၤဒၢးႇတၢ်ဆဲးကျိး၀ဲၤဒၢးႇ စံၣ်ညီၣ်ကွီၢ်ရူသ့ၣ်တဖၣ်အံၤဒံးန့ၣ်လီၤႉ
ဒုးယၤလီၤဆီကရူၢ်(SOF)ႇကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်လၢအနုာ်လီၤခး ပယီၤသုးတၢ်လီၢ် သ့ၣ်တဖၣ်အံၤတကီၢ်ခါခဲအံၤအ၀ဲသ့ၣ်ဟူးဂဲၤဟံး၀ဲတၢ်တၢ်ဘံၣ်တၢ်ဘၢဖဲ၀ီၢ်ရ့ၣ်–သရိာ်၀ါ ပၠံၣ်ထီၣ်စူၣ်ကျဲမုၢ်ဖီခိၣ်အံၤ န့ၣ်လီၤႉ
