ဘံလ့ကီၢ်ဆၣ်ပူၤ ပယီၤသုးခးလီၤကျိဖးဒိၣ်အဃိ ကမျၢၢ်သံ(၃)ဂၤဒီး လီၢ်က၀ီၤကမျၢၢ်ဃ့ၢ်ထီၣ်တကထိဘျဲၣ်

လါယူၤလံ ၁၈ သီႇ ၂၀၂၃ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၁)တၢ်ပၢဟီၣ်က၀ီၤ ဒူသထူၣ်ကီၢ်ရ့ၣ်အပူၤ ဖဲအပူၤကွံာ်လါယူၤလံ ၁၅ သီအနံၤနၣ် ပယီၤသုးကျိၤနုာ်လီၤ၀ဲလၢ(ဘံလ့ကီၢ်ဆၣ်)ဒူသ၀ီတဖၣ်အပူၤဒီး ခးလီၤကျိဖးဒိၣ်အဃိ လီၢ်က၀ီၤကမျၢၢ်သံ၀ဲ(၃)ဂၤအသိး လီၢ်က၀ီၤကမျၢၢ်ဃ့ၢ်ထီၣ်၀ဲတကထိဘျဲၣ်အဂ့ၢ်န့ၣ် လီၢ်က၀ီၤကမျၢၢ်စံး၀ဲအသိး သ့ၣ်ညါဘၣ်န့ၣ်လီၤႉ

ဖဲတၢ်တနံၤန့ၣ်ခီဖျိပယီၤသုးနုာ်လီၤ၀ဲလၢဘံလ့ကီၢ်ဆၣ် ငပၠီတီႇကယၣ်၀့စ့ၣ်ႇစှါစူၣ်ႇခၠါမၠ့ၣ်ဒီးစံကိသ၀ီပူၤအါအါ ဂီၢ်ဂီၢ်အဃိ လီၢ်က၀ီၤကမျၢၢ်တကထိဘျဲၣ်ဘၣ်ဃ့ၢ်ထီၣ်၀ဲဒီးပယီၤသုးအံၤနုာ်လီၤအိၣ်၀ဲလၢ(ကယၣ်၀့စ့ၣ်)ဒီး (စံကိ)သ၀ီပူၤ ခးလီၤကျိဖးဒိၣ်အဃိ ကမျၢၢ်သံ(၃)ဂၤအကျါပၣ်ဃုာ်၀ဲပိာ်မုၣ်တဂၤအဂ့ၢ်န့ၣ် ဘံလ့လီၢ်က၀ီၤကမျၢၢ်တဂၤ စံး၀ဲန့ၣ်လီၤႉ

“ပယီၤသုးကျိၤဟဲလီၤဘျီၦၤသ၀ီဖိတဖၣ်န့ၣ်ဟးပလဲာ်သးခဲလၢာ်လီၤႉပယီၤသုးခးလီၤကျိဖးဒိၣ်အဃိၦၤဆါတၢ်ဒီမါ၀ၤခံဂၤဒီးသ၀ီဖိတဂၤသံ၀ဲဒၣ်ႉအိၣ်လၢ(စံကိ)သ၀ီကျဲမုၢ်ခိၣ်န့ၣ်တဂၤႇလၢကျးနုာ်လီၤန့ၣ်တဂၤႇမတၤတဂၤမးက့ၤကွၢ်တဘူၣ်ဒံးဘၣ်ႉ ကမျၢၢ်တဖၣ်စံၣ်ထီၣ်၀ဲလၢတၢ်စူၤကျါတနၤဃီအဃိခဲအံၤတၢ်လိၣ်တၢ်လဲးဒုအိၣ်မီၤနီၤ”အဂ့ၢ်န့ၣ် စံး၀ဲန့ၣ်လီၤႉ

လၢန့ၣ်အမဲာ်ညါဖဲလါယူၤလံ ၁၆ သီအနံၤ ပယီၤသုးလၢအနုာ်လီၤတဖၣ်အံၤဖဲအ၀ဲသ့ၣ်ကဟးထီၣ်လၢသ၀ီပူၤအခါ ဖီၣ်၀ဲဒၣ်ၦၤသ၀ီဖိလၢဟဲက့ၤလၢသ၀ီပူၤတဖၣ်အံၤဒီးသ၀ီဖိလၢအစံၣ်အိၣ်ခူသူၣ်ဖဲသ၀ီပူၤတဖၣ်အံၤတနီၤ၀ံၤ ဟါခီမးပျၢ်လီၤက့ၤ၀ဲ အဂ့ၢ်န့ၣ် ဟီၣ်က၀ီၤၦၤဟ့ၣ်တၢ်ကစီၣ်ဖိစံး၀ဲအသိး သ့ၣ်ညါဘၣ်န့ၣ်လီၤႉ

“အ၀ဲသ့ၣ်အိၣ်လၢ(ကယၣ်၀့စ့ၣ်)တိၤန့ၣ်အဖၢမုၢ်လီၤႉလၢန့ၣ်တကပၤန့ၣ်အ၀ဲသ့ၣ်ဆီလီၤအၦၤဒီတကျိၤလီၤႉ ၦၤလၢပယီၤသုးဖီၣ်အီၤအဟဲက့ၤထူၣ်ဖျဲးထီၣ်တဖၣ်န့ၣ်တဲ၀ဲလၢပယီၤသုးတဲ၀ဲလၢကထီၣ်ဟံန့ၢ်၀ဲတၢ်ပၢၢ်ဆၢသုးကရူၢ်အသုးကလၢၤခဲလၢာ်လီၤႉတဲ၀ဲလၢအိၣ်ခိးကွၢ်ကဒိးလီၤဟီၣ်လာ်မ့ၣ်ပိၢ်လၢကျဲဒီတဘိလီၤ”အဂ့ၢ်န့ၣ် လီၢ်က၀ီၤကမျၢၢ်လၢအဂၤတဂၤစ့ၢ်ကီး စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

ဒ်န့ၣ်အသိးဖဲအပူၤကွံာ်လါယူၤလံ ၁၁ သီအခါစ့ၢ်ကီး ခီဖျိပယီၤသုးမျိာ်သုးရ့ၣ်(အမတ–၃၁၄)ခးလီၤကျိဖးဒိၣ်ဆူ စွ့ၤယီၤပၠၣ်ကရူၢ် သ၀ီတဖၣ်အပူၤအဃိ စွ့ၤယီၤပၠၣ်သ၀ီဖိအဟံၣ်ဟးဂီၤ၀ဲ(၂)ဖျၢၣ်အသိး ဖဲလါယူၤလံ ၇ သီအခါ စ့ၢ်ကီး ခီဖျိကျိဖးဒိၣ်လီၤတဲာ်ပိၢ်ဖးထိၣ်လၢစွ့ၤယီၤပၠၣ်သ၀ီပူၤအဃိ ကမျၢၢ်ဘၣ်ဒိ(၆)ဂၤအကျါ မ့မ့ၢ်နီၢ်တ့ၤအ့အံၤအဘၣ်ဒိနးအဃိ သံကွံာ်၀ဲအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲဖဲလါယူၤလံ ၁၆ သီအနံၤန့ၣ်လီၤႉ

ဒ်န့ၣ်အသိးသုးဟံးန့ၢ်တၢ်စိတၢ်ကမီၤ၀ံၤလီၢ်ခံလၢခ့ၣ်အဲၣ်ယူၣ်(သုးက့ ၁)တၢ်ပၢဟီၣ်က၀ီၤ ဒူသထူၣ်ကီၢ်ရ့ၣ်အပူၤ ခီဖျိပယီၤသုးခးလီၤကျိဖးဒိၣ်အဃိ ကမျၢၢ်သံ၀ဲ(၃၂)ဂၤႇဘၣ်ဒိ၀ဲ(၈၃)ဂၤအဂ့ၢ်န့ၣ် ကညီဂ့ၢ်၀ီခွဲးယာ်ကရူၢ်(KHRG) ထုးထီၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ