လါယူၤလံ ၂၅ သီႇ ၂၀၂၃ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၆)ဟီၣ်က၀ီၤႇ တလၢၤကီၢ်စဲၣ် ၀ီၢ်ရ့ၣ်ကီၢ်ဆၣ် ၀ီၢ်ရီဟီၣ်က၀ီၤအပူၤ စးထီၣ်လါယူၤလံ ၁၇ သီတုၤလၢ ၂၁ သီ လၢ(၄)သီအတီၢ်ပူၤ တၢ်ပၢၢ်ဆၢသုးပာ်ဖှိၣ်ဒီးပယီၤသုးအဘၢၣ်စၢၤတၢ်ဒုးကဲထီၣ် အခါ ပယီၤသုးတကပၤသံ၀ဲ(၁၀)ဂၤဒီး ဘၣ်ဒိဘၣ်ထံး(၁၁)ဂၤအကျါပၣ်ဃုာ်၀ဲသုးခိၣ်စိ(၂)ဂၤ အဂ့ၢ်န့ၣ် ခ့ၣ်အဲၣ်ယူၣ်လီၢ်ခၢၣ်သးထုးထီၣ်ပာ်ဖျါ၀ဲဖဲလါယူၤလံ ၂၄ သီအနံၤန့ၣ်လီၤႉ
တၢ်ဒုးကဲထီၣ်လၢဘျီ၀ဲအံၤန့ၣ်မ့ၢ်၀ဲကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးရ့ၣ် ၂၇ ဒီး ပၢဆှၢရဲၣ်ကျဲၤ၀ဲၤလီၢ် ခိၣ်သ့ၣ်(စကခ–၈)စုတီၤဖီလာ် ခီၣ်ချ့သုးရ့ၣ်(ခမရ–၄၀၇)ႇ သုးတြိၤ(၄၄)စုတီၤဖီလာ် ခီၣ်ချ့သုးရ့ၣ်(ခမရ–၁၀၄) တဖၣ်အံၤအဘၢၣ်စၢၤအဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ
ခံခီခံကပၤတၢ်ဒုးကဲထီၣ်လၢလွံၢ်သီအတီၢ်ပူၤအံၤမ့မ့ၢ်လၢတၢ်ပၢၢ်ဆၢသုးပာ်ဖှိၣ်တကပၤန့ၣ်ဘၣ်ဟ့ၣ်လီၤကွံာ်အသးသမူ (၁)ဂၤဒီး ဘၣ်ဒိ(၄)ဂၤအဂ့ၢ်န့ၣ် (KNLA)သုးရ့ၣ် ၂၇ ထုးထီၣ်ပာ်ဖျါ၀ဲန့ၣ်လီၤႉ
(KNLA)သုးရ့ၣ် ၂၇ ဒီးသုးပာ်ဖှိၣ်သ့ၣ်တဖၣ်အံၤအ၀ဲသ့ၣ်ဟူးဂဲၤ၀ဲဒၣ်လၢ၀ီၢ်ရ့ၣ်ႇသရိာ်၀ါႇလမဲဟီၣ်က၀ီၤပူၤဒီး အ၀ဲသ့ၣ်ဟံစ့ၢ်ကီး၀ဲကျဲတၢ်ဘံၣ်တၢ်ဘၢအိၣ်ခိးသမံသမိးတၢ်လၢ၀ီၢ်ရ့ၣ်–ဘျံးဒ၀ဲၢ်ကျဲမုၢ်ခိၣ်ဒီတကျိၤန့ၣ်လီၤႉ
ခံခီခံကပၤတၢ်ဒုးကဲထီၣ်ဘျီ၀ဲအံၤဘၣ်ဃးတၢ်သံတၢ်ဘၣ်ဒိဘၣ်ထံးတၢ်အိၣ်သးခီန့ၣ် တၢ်ပၢၢ်ဆၢသုးပာ်ဖှိၣ်တကပၤ ထုးထီၣ်ပာ်ဖျါ၀ဲတၢ်ကစီၣ်အိၣ်ဘၣ်ဆၣ်မ့မ့ၢ်လၢပယီၤသုးတကပၤခီန့ၣ်ထုးထီၣ်ပာ်ဖျါတၢ်ကစီၣ်တအိၣ်နီတမံၤဘၣ်န့ၣ်လီၤႉ
ဒ်န့ၣ်အသိးဖဲအပူၤကွံာ်လါယူၤလံ ၂၁ သီအခါစ့ၢ်ကီး ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ႇ ခီၤဘြၤသုးကျိၤ(၁)ႇ (ကျားသစ်နက်)သုးကျိၤႇ(Federal Wings)ဒြိသုးပာ်ဖှိၣ်သ့ၣ်တဖၣ်အံၤ လဲၤထီၣ်မၤန့ၢ်၀ဲမၠၣ်၀တံၣ်၀့ၢ်ဃၢၤ (လဲၣ်ခၣ်တီၤ)ပယီၤသုးကလၢၤဒံးအဂ့ၢ်န့ၣ် ခီၤဘြၤသုးကျိၤထုးထီၣ်ပာ်ဖျါ၀ဲန့ၣ်လီၤႉ
