ခ့ၣ်အဲၣ်ယူၣ်(သုးက့ ၆)ဟီၣ်က၀ီၤ ၂ သီအတီၢ်ပူၤ ပယီၤသုးဟဲက့ၤပ၁်လီၤစုက၀ဲၤ ၃ ဂၤ

လါစဲးပထ့ဘၢၣ် ၂၁ သီႇ ၂၀၂၃ နံၣ်ႇ ခ့ၣ်အဲးစံၣ်

တလါအံၤအတီၢ်ပူၤပယီၤသုးလၢအိၣ်ဆီလီၤသးဖဲခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ကီးတရံးကီၢ်ဆၣ် ဂီၤလ့ၤဟီၣ်က၀ီၤပူၤလၢအမ့ၢ်သုးတြိၤ(၄၄)စုတီၤဖီလာ်ခီၣ်ချ့သုးရ့ၣ်(ခမရ–၅၅၆)အၦၤ ၂ ဂၤဒီး ခီၣ်ချ့သုးရ့ၣ်(ခမရ–၉)အၦၤတဂၤ ဟဲက့ၤပာ်လီၤစုက၀ဲၤလၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)အအိၣ် အဂ့ၢ်န့ၣ် ခ့ၣ်အဲၣ်ယူၣ်လီၢ်ခၢၣ်သးထုးထီၣ်ပာ်ဖျါတၢ်ကစီၣ်န့ၣ်လီၤႉ

ဖဲအပူၤကွံာ်လါစဲးပထ့ဘၢၣ် ၆ သီအနံၤ ပယီၤသုး(ခမရ–၅၅၆)သုးရ့ၣ်အၦၤ ကိၤကိၤနဲၤဒီးအဲၣ်စှါ(၂၀)နံၣ် ၂ ဂၤ အံၤ ဃုာ်ဒီးလါစဲးပထ့ဘၢၣ် ၈ သီအနံၤ (ခမရ–၉) စီၤသဲၣ်နဲၤထိ(၃၃)နံၣ် ၦၤသၢဂၤအံၤဟဲက့ၤပာ်လီၤစုက၀ဲၤလၢ (KNLA) အအိၣ်န့ၣ်လီၤႉ

ပယီၤသုးဖိလၢအဟဲက့ၤပာ်လီၤစုက၀ဲၤ ၃ ဂၤအံၤ အ၀ဲသ့ၣ်ဟဲက့ၤစိာ်ဃုာ်၀ဲ(MA-1)ကျိတခိၣ်ႇအဒၢ(၄)ခါႇ (၅ႉ၅၆)အချံ (၂၃၉)ဖျၢၣ်ဒီး အံၣ်ကွ့မဲၣ်တစိၣ်ႇ (338)စနဲးဖၢး ၁ ခိၣ်ဒီး အချံ(၅၀)ဖျၢၣ်န့ၣ်လီၤႉ ဒ်န့ၣ်အသိး ပယီၤသုးဖိလၢအ၀ဲခံဂၤန့ၣ် တၢ်ဟ့ၣ်လၤကပီၤ၀ဲလၢစ့ယိၤတဂၤန့ၣ်(၅)ကလးဒီး မ့မ့ၢ်လၢအ၀ဲတဂၤန့ၣ်တၢ်ဟ့ၣ်လၤ ကပီၤ၀ဲ(၁)ကလီၢ်ဘးအဂ့ၢ်န့ၣ် ခ့ၣ်အဲၣ်ယူၣ် လီၢ်ခၢၣ်သးလံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ

မ့မ့ၢ်ပယီၤသုး(ခမရ–၅၅၆)သုးရ့ၣ်အၦၤ ၂ ဂၤအံၤန့ၣ် ဟဲက့ၤပာ်လီၤစုက၀ဲၤလၢ(KNLA) သုးရ့ၣ် ၁၀၃ သုးဒ့(၁)အအိၣ်ဒီး မ့မ့ၢ်ပယီၤသုး(ခမရ–၉)အၦၤတဂၤခီန့ၣ် ဟဲက့ၤပာ်လီၤစုက၀ဲၤလၢသုးခိၣ်ဒးဘီတီခိၣ်ရိၣ်မဲ(Cobra)သုးကျိၤအအိၣ် အဂ့ၢ်န့ၣ် သ့ၣ်ညါဘၣ်န့ၣ်လီၤႉ

သုးကီၣ်ကးစုတီၤဖီလာ်အၦၤလၢအိၣ်တ့ၢ်ဒံးလၢ(ခ့ၣ်အဲၣ်ယူၣ်)သုးက့ဟီၣ်က၀ီၤပူၤတဖၣ်အံၤ မ့ဟဲက့ၤပာ်လီၤ စုက၀ဲၤလၢ (KNLA)သုးပာ်ဖှိၣ်အအိၣ်မ့ဟဲက့ၤစိာ်ဃုာ်ဒီးစုက၀ဲၤန့ၣ်ကအိၣ်ခိးသဂၢၢ်လီၤဂ့ၤဂ့ၤဒီးတၢ်အိၣ်မူခါဆူညါ အဂီၢ်စ့ၢ်ကီး ကဆီၣ်ထွဲမၤစၢၤ၀ဲအဂ့ၢ်န့ၣ် ခ့ၣ်အဲၣ်ယူၣ်စံး၀ဲန့ၣ်လီၤႉ

ဒ်န့ၣ်အသိးလၢခ့ၣ်အဲၣ်ယူၣ်သုးက့ဟီၣ်က၀ီၤတဖၣ်အပူၤ တၢ်ဖီၣ်န့ၢ်၀ဲသုးကီၣ်ကးအသုးရ့ၣ်ခိၣ်ႇသုးခိၣ်သုးနၢ်ဒီး ၦၤသုးဖိတဖၣ်အိၣ်၀ဲအါမးအသိးၦၤလၢအဟဲက့ၤပာ်လီၤစုက၀ဲၤစ့ၢ်ကီးအိၣ်၀ဲအါမးဘၣ်ဆၣ်အနီၣ်ဂံၢ်နီၣ်ဒွးအိၣ်ဆံးအါလဲၣ်ခီန့ၣ်ကရူၢ်ကရၢဘၣ်ထွဲတဖၣ်ထုးထီၣ်ပာ်ဖျါ၀ဲအနီၣ်ဂံၢ်လီၤတံၢ်လီၤဆဲးတအိၣ်ဒံးဘၣ်န့ၣ်လီၤႉ