လါစဲးပထ့ဘၢၣ် ၂၂ သီႇ ၂၀၂၃ နံၣ်ႇ ခ့ၣ်အဲးစံၣ်
လၢတနီသရံၣ်ကီၢ်ခီဒိၣ် ကီၢ်သီကီၢ်ဆၣ် ခမီၣ်ကၠံသ၀ီဒီးမလံၤ၀ါသ၀ီကပၤန့ၣ် စးထီၣ်ဖဲတလါအံၤ ၂၀ သီအနံၤ ခီဖျိတၢ်ဒုးကဲထီၣ်လၢဟီၣ်က၀ီၤတၢ်ပၢၢ်ဆၢသုးကရူၢ်ဒီးပယီၤသုးအဘၢၣ်စၢၤအဃိ လီၢ်က၀ီၤကမျၢၢ်လၢအကယၤ လဲၤဃ့ၢ်ထီၣ်ဆူကီၢ်ကၠီၣ်တဲၣ်တကပၤအဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ
တၢ်ဒီသဒၢကမျၢၢ်သုးမုၢ်ဒိၣ် ကီၢ်သီကီၢ်ရ့ၣ် နီၣ်ဂံၢ်(၁)သုးရ့ၣ်ဒီးပယီၤသုးအဘၢၣ်စၢၤ တၢ်ဒုးကဲထီၣ်ဖဲသ၀ီကပၤ ၀ံၤလီၢ်ခံ ခီဖျိပယီၤသုးအဂၤ(၃၀)ဃၣ်ဃၣ်နုာ်လီၤလၢသ၀ီပူၤအဃိ လီၢ်က၀ီၤသ၀ီဖိတဖၣ်ခီဃီၤ၀ဲ(ပၤခၠၤ)ကျိဒီး လဲၤထီၣ်အိၣ်ကဒု ဆိသးလၢကီၢ်ကၠီၣ်တဲၣ် ယနီ၀့ၢ်ပူၤအဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးတဂၤ စံး၀ဲန့ၣ်လီၤႉ
အ၀ဲစံး၀ဲလၢ“ၦၤစံၣ်ထီၣ်ခဲအံၤတဖၣ်န့ၣ်မ့ၢ်ၦၤအိၣ်လၢတၢ်ကဲထီၣ်သးအကပိၤကပၤတခွ့ၢ်တခွီၢ်န့ၣ်လီၤႉ တမ့ၢ်သ၀ီဒီတဖျၢၣ်ညါဘၣ်ႉကအိၣ်ယံၤဒီးသ၀ီန့ၣ် ၇ မံးလာ်ညါမီၤနီၤႉ အခိၣ်တီတနံၤန့ၣ်ၦၤစံၣ်ထီၣ်ကအိၣ်ထဲ အဂၤ(၁၀၀)လီၤႉတုၤလၢတနံၤၦၤဟဲစံၣ်ထီၣ်အံၤကအိၣ်အဂၤ(၃၀၀)လံႉတနံၤဘၣ်တနံၤန့ၣ်ၦၤဃ့ၢ်မှံဟးဖျိးအါထီၣ်ကွ့ၢ်ကွ့ၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
ကီၢ်သီ၀့ၢ်ပူၤဒုးယၤတၢ်ဖ့ၣ်စၢကဲထီၣ်၀ဲလၢပယီၤသုးဒီးတၢ်ဒီသဒၢကမျၢၢ်သုးကရူၢ်အဘၢၣ်စၢၤဘၣ်ဆၣ် မ့မ့ၢ်လၢဒူသ၀ီတကပၤခီန့ၣ်တၢ်ခးလိာ်သးကဲထီၣ်တလီၢ်လီၢ်လီၤဒီးပယီၤသုးအံၤခးလီၤကျိဖးဒိၣ်ဆူသ၀ီပူၤအိၣ်၀ဲတလီၢ်လီၢ်အဂ့ၢ်န့ၣ် ကီၢ်သီတၢ်ဒီသဒၢကမျၢၢ်သုးကရူၢ်တကပၤစံး၀ဲန့ၣ်လီၤႉ
ကမျၢၢ်လၢအဃ့ၢ်ထီၣ်ခဲအံၤတဖၣ်ပၣ်ဃုာ်၀ဲၦၤဖိဒံဖိသၣ်သ့ၣ်တဖၣ်ဒီးတကီၢ်ခါခဲအံၤတၢ်ဒုးဂၢၢ်ထီၣ်လံဘၣ်ဆၣ် ၦၤသ၀ီဖိတဖၣ်တုၤလၢခဲအံၤက့ၤခီဃီၤဆူကီၢ်ပယီၤပူၤတအိၣ်ဒံး၀ဲဘၣ်ဒီးခီဖျိအ၀ဲသ့ၣ်ဃ့ၢ်ထီၣ်ကရီကဒးအဃိ လိၣ်ဘၣ်၀ဲဒၣ်တၢ်အီၣ်တၢ်အီႇတၢ်အိၣ်တၢ်ဆိးလီၢ်ကျဲတၢ်ဆီၣ်ထွဲမၤစၢၤအဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးလၢအဂၤ တဂၤစ့ၢ်ကီးစံး၀ဲဒ်အံၤန့ၣ်လီၤႉ
“ခီဖျိအ၀ဲသ့ၣ်ဟဲသုးလီၢ်သုးကျဲသတူၢ်ကလာ်အဃိမ့မ့ၢ်တၢ်အီၣ်တၢ်အီဒုလိၣ်ဖးအါညါႉတုၤလၢခဲအံၤၦၤက့ၤလၢကီၢ်ပယီၤတကပၤန့ၣ်တဘူၣ်ဒံးဘၣ်ႉၦၤဟဲစံၣ်ထီၣ်အကျါန့ၣ်ပၣ်ဃုာ်ၦၤဖိသၣ်ဒီဒူၣ်ညါႉမ့၀ံၤတၢ်စူၤအဃိတၢ်ခိၣ်ဒုးလိၣ်မီၤနီၤႉလၢသ၀ီန့ၣ်ၦၤတဲထံရူၢ်ကီၢ်သဲးအဂ့ၢ်အကျိၤတဘူၣ်အါအါဘၣ်ႉလၢသ၀ီန့ၣ်အဖိခွါမ့တအိၣ်ဘၣ်န့ၣ်ၦၤဖီၣ်က့ၤကိးလၢအပါလီၤ” အဂ့ၢ်န့ၣ် စံး၀ဲန့ၣ်လီၤႉ
ဒ်န့ၣ်အသိးဖဲအပူၤကွံာ်လါစဲးပထ့ဘၢၣ် ၂၀ သီအနံၤစ့ၢ်ကီး ဖဲခံခီခံကပၤတၢ်ဒုးကဲထီၣ်အကတီၢ် ခီဖျိပယီၤသုး ခးလီၤကျိဖးဒိၣ် ဆူသ၀ီပူၤအဃိ ခမီၣ်ကၠံသ၀ီ ကမျၢၢ်အနံၣ်(၆၀)ဘျဲၣ်တဂၤသံ၀ဲအဂ့ၢ်န့ၣ် လီၢ်က၀ီၤတၢ်ကစီၣ်သန့ ပာ်ဖျါ ၀ဲအသိး သ့ၣ်ညါဘၣ်န့ၣ်လီၤႉ
