လီၢ်က၀ီၤကမျၢၢ်ဃ့ထီၣ်လၢ သုးခိၣ်စးလိတီခိၣ်ရိၣ်မဲ(KTLA)ခီၣ်မဲဒိၣ်အၦၤကဟးထီၣ်ကွံ၁်လၢသ၀ီပူၤ

လါအီးကထိဘၢၣ် ၆ သီႇ ၂၀၂၃ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် တီနီၢ်မုၢ်ထီၣ်ဟီၣ်က၀ီၤပူၤ မီခံသ၀ီကရူၢ် သ၀ီ(၅)ဖျၢၣ် ၦၤသ၀ီဖိတဖၣ်ပာ်ဖှိၣ်ထီၣ်သးဃ့ထီၣ်၀ဲလၢ သုးခိၣ်စးလိတီခိၣ်ရိၣ်မဲကီၢ်သူလ့ၤသုးမုၢ်ဒိၣ်(KTLA) ခီၣ်မဲဒိၣ် အၦၤတဖၣ်အံၤ ကဟးထီၣ်ကွံာ်လၢသ၀ီပူၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ

ဘၣ်ဃးဒီး(KTLA)အၦၤမၤဒၢၣ်ၦၤသ၀ီဖိတၢ်ဂ့ၢ်ကဲထီၣ်သးအံၤ ဖဲအပူၤကွံာ်လါအီးကထိဘၢၣ် ၃ သီ ဒီး ၄ သီအနံၤ (KTLA)ၦၤဘၣ်မူဘၣ်ဒါႇသ၀ီ(၅)ဖျၢၣ်ၦၤသ၀ီဖိဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ၦၤဘၣ်မူဘၣ်ဒါႇ ဃုာ်ဒီးလီၢ်က၀ီၤကမျၢၢ်မၤ၀ဲတၢ်အိၣ်ဖှိၣ်တခါဒီး ဖဲတၢ်အိၣ်ဖှိၣ်ထံၣ်လိာ်တဲသကိးဘျီ၀ဲအံၤအပူၤန့ၣ် ၦၤသ၀ီဖိတဖၣ် ဃ့ထီၣ်၀ဲဒ်အံၤလီၤအဂ့ၢ်န့ၣ် သ၀ီဖိတဂၤစံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“ KTLA ဟဲအိၣ်လၢသ၀ီပူၤအံၤပပာ်အ၀ဲသ့ၣ်ဒ်သိးပဖိပလံၤလီၤႉအ၀ဲသ့ၣ်န့ၣ်တပာ်ၦၤဒ်သိးမိပါဘၣ်ႉ အ၀ဲသ့ၣ်ဟဲအိၣ်တၢ်အံၤအမ့ၤသပၢၤခဲလၢာ်လီၤႉယိၤကီၢ်နါက့အမ့ၤသပၢၤႇပယီၤကီၢ်နါက့အမ့ၤသပၢၤလီၤႉခဲအံၤန့ၣ် အဒိတဲၣ်ဖးက့ၤမ့ၤသပၢၤအကလဲၤအီၣ်က့ၤမ့ၤဖဲလဲၣ်ႉအ၀ဲသ့ၣ်ဟးခးအီၣ်ၦၤဆီႇဟးသူၣ်ဂဲၤၦၤတဲတဘူၣ်ဘၣ်ႉၦၤမ့တဲ အ၀ဲသ့ၣ်န့ၣ်အခးၦၤဒီးကျိမီၤႉနတဲဆၢတဘူၣ်ဘၣ်အမၤဒူသးဒ်သိးပယီၤလီၤႉအ၀ဲသ့ၣ်မ့ဆဲးအိၣ်ဖဲသ၀ီပူၤန့ၣ်ပကဟးထီၣ်လီၤႉၦၤမ့တမၤဆှဲဘၣ်ဒုပအိၣ်တူဘၣ်ဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

တၢ်အိၣ်ဖှိၣ်ထံၣ်လိာ်တဲသကိးတၢ်ဘျီ၀ဲအံၤအပူၤဒ်သ၀ီ(၅)ဖျၢၣ်ၦၤသ၀ီဖိဃ့ထီၣ်၀ဲအသိးန့ၣ် တၢ်ဆၢတဲာ်လီၤ၀ဲလၢ သုးခိၣ်စးလိတီခိၣ်ရိၣ်မဲ(KTLA)ခီၣ်မဲဒိၣ်အၦၤကဟးထီၣ်ကွံာ်လၢသ၀ီပူၤအဂ့ၢ်န့ၣ် သ့ၣ်ညါဘၣ်လၢၦၤဘၣ်မူဘၣ်ဒါ တဖၣ်အအိၣ်န့ၣ်လီၤႉ

လၢန့ၣ်အမဲာ်ညါဒ်ၦၤသ၀ီဖိဃ့ထီၣ်၀ဲအသိးန့ၣ်(KTLA)အၦၤတဖၣ်ကဟးအိၣ်စီၤစုၤဒီးသ၀ီတတၢၣ်ခံတၢၣ်ဘျဲၣ်ႇ အ၀ဲသ့ၣ်မ့ဟဲလီၤလၢသ၀ီပူၤန့ၣ်တဘၣ်ဟဲစိာ်ကျိဘၣ်အဂ့ၢ်န့ၣ် (KTLA)တၢ်မဲာ်ညါဒုးယၤခိၣ် သုးခိၣ်ဒိၣ်စိ စီၤဖုချၢၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်ဒ်အံၤန့ၣ်လီၤႉ

အ၀ဲစံး၀ဲလၢ“တၢ်အိၣ်ဖှိၣ်တနံၤအံၤပအိၣ်ခိး၀ဲဒၣ်သုးခိၣ်စးလိတုၤလၢမုၢ်ထူၣ်(၁၂)နၣ်ရံၣ်ညါႉဘၣ်ဆၣ်အတဟဲတၢ်အိၣ်ဖှိၣ်ဘၣ်ႉအတဟဲထီၣ်တၢ်အိၣ်ဖှိၣ်ဘၣ်ဘၣ်ဆၣ်ပကဘၣ်လူၤပိာ်မၤထွဲ၀ဲၦၤသ၀ီဖိအတၢ်ဘၣ်သးဒီး(KTLA)ဒုးယၤသၢဘ့ၣ် အတၢ်ဆၢတဲာ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲလါအီးကထိဘၢၣ် ၄ သီအနံၤ န့ၣ်လီၤႉ

တၢ်အိၣ်ဖှိၣ်ဘျီ၀ဲအံၤအပူၤ သ၀ီ(၅)ဖျၢၣ်လၢအမ့ၢ် ခီဖိခံသ၀ီႇဖီဘုၣ်လၣ်ထၣ်ႇကီးဆၢႇကလီၤဂီၤႇမဲးဘီခံသ၀ီ သ့ၣ်တဖၣ်ဟဲထီၣ်၀ဲဒီး ဒ်န့ၣ်အသိး(KTLA)၀ဲၤလီၢ်ခိၣ်သ့ၣ် ဒုးယၤခိၣ် သုးခိၣ်ဒိၣ်စိ စီၤလဲကဲၤႇ (KTLA)တၢ်မဲာ်ညါဒုးယၤခိၣ် သုးခိၣ်ဒိၣ်စိ စီၤအဲၣ်စ့၀ါႇ သုးခိၣ်ဒိၣ်စိ စီၤဖုချၢၣ်ႇ KNLA သုးရ့ၣ်(၂၀၁)မျိာ်သုးဒ့ခိၣ်ဒီး မီခံသ၀ီကရူၢ် သ၀ီသးၦၢ်သ့ၣ် တဖၣ်အံၤဟဲထီၣ်၀ဲတၢ်အိၣ်ဖှိၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဘၣ်ဃးတၢ်အိၣ်ဖှိၣ်ဘျီ၀ဲအံၤ(KTLA)ခီၣ်မဲဒိၣ် သုးရ့ၣ်ခိၣ် သုးခိၣ်စးလိစံး၀ဲလၢ“ဘၣ်မနုၤအဃိယတလဲၤဘၣ်လဲၣ်န့ၣ် ဘၣ်ဃးတၢ်ဂ့ၢ်တခါန့ၣ်ယကျဲၤဒီးၦၤသ၀ီဖိ၀ံၤလံႉလၢခံတနံၤယကျဲၤဒီးသ၀ီခိၣ်နၢ်ႇ(DKBA)ခိၣ်နၢ်ဘၣ်ဂီၢ်လၢၤလံႉ ပတဲ၀ံၤလံအသုတ၀ံၤဒံးဘၣ်ႉအဃိန့ၣ်ပတလဲၤထီၣ်တၢ်အိၣ်ဖှိၣ်ဘၣ်န့ၣ်တၢ်ဂ့ၢ်တခါန့ၣ်ႉအ၀ဲသ့ၣ်မ့တအဲၣ်ဒိးထံၣ်ၦၤ ဘၣ်န့ၣ်ပသုးလီၢ်တုၤလၢမၠၣ်၀တံၣ်နါက့ပသုးသ့လီၤႉယအိၣ်ဖဲအံၤယဟီၣ်ခိၣ်တက့မးတအိၣ်ဘၣ်ႇယဟံၣ်တဖျၢၣ်မး တအိၣ်ဘၣ်ႉတၢ်တခါန့ၣ်အသံကွၢ်ယၤတသ့ဘၣ်ႇဘၣ်သံကွၢ်လၢသုးခိၣ်စီၤနၢၤဒါႉစီၤနၢၤဒါမ့၀ံၤန့ၣ်ယ၀ံၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

အပူၤကွံာ်ဘၣ်ဃးတၢ်မၤဒၢၣ်ၦၤသ၀ီဖိတၢ်ဂ့ၢ်ကဲထီၣ်မုၢ်ဆ့ၣ်ထီၣ်လါစဲးပထ့ဘၢၣ် ၂၅ သီအနံၤန့ၣ် ခီဖိခံသ၀ီႇ ဖီဘုၣ်လၣ်ထၣ်ဒီးကလီၤဂီၤသ၀ီ သ၀ီ(၃)ဖျၢၣ် ၦၤသ၀ီဖိတဖၣ်ပာ်ဖှိၣ်ထီၣ်သးဃ့ထီၣ်၀ဲလၢ သုးခိၣ်စးလိဃုာ် (KTLA)အၦၤကဟးထီၣ်ကွံာ်လၢသ၀ီပူၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ