လါနိၣ်၀့ဘၢၣ် ၁၀ သီႇ ၂၀၂၃ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုက့ ၁)ဟီၣ်က၀ီၤ ဖၣ်အၣ်ကီၢ်ဆၣ်အပူၤ ဖဲအပူၤကွံာ် လါနိၣ်၀့ဘၢၣ် ၃ သီအနံၤန့ၣ် သုးခိးကီၢ်ဆၢ(BGF) ၁၀၁၄ သုးရ့ၣ် စုတီၤဖီလာ် သုးဒ့ခိၣ် ဘိၤတ့ၤ၀့ ထၢ၀ဲဒၣ်စ့လၢသ၀ီ (၂၄)ဖျၢၣ်ၦၤကမျၢၢ်အအိၣ်အဂ့ၢ်န့ၣ် ခ့ၣ်အဲၣ်ယူၣ် လီၢ်ခၢၣ်သးထုးထီၣ်ပာ်ဖျါ၀ဲဖဲလါနိၣ်၀့ဘၢၣ် ၈ သီ အနံၤ န့ၣ်လီၤႉ
မ့ၣ်ထံၤလၤ(BGF)သုးကလၢၤ သုးဒ့ခိၣ် ဘိၤတ့၀့အံၤ ကိးထံၣ်၀ဲဒၣ်(၀ဲပၠၣ်)ကရူၢ်ႇ(တကီၤဘိ)ကရူၢ် သ၀ီသးၦၢ် တဖၣ်ဒီး ဖဲန့ၣ်တဲ၀ဲလၢတၢ်ကဖျီၣ်ထီၣ်ဃိၣ်သဒၢလၢသုးကလၢၤပူၤအံၤအဂီၢ် ဃ့၀ဲဒၣ်စ့(တကယၤခွံဆံလွံၢ်ကလီၢ်)ကၠးလၢ သ၀ီ(၂၄)ဖျၢၣ်ၦၤကမျၢၢ်အအိၣ်အဂ့ၢ်န့ၣ် ခ့ၣ်အဲၣ်ယူၣ်လီၢ်ခၢၣ်သးလံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
သ၀ီလၢ(BGF)ဃ့စ့သ့ၣ်တဖၣ်န့ၣ်မ့ၢ်၀ဲ၀ဲပၠၣ်ကရူၢ်ပူၤ ၀ဲပၠၣ်သ၀ီႇပ့ၤပ့ၤစ့ၣ်သ၀ီႇဖယါစ့ၣ်သ၀ီႇမ့ၣ်ထံၤလၤသ၀ီႇ မဲၤကၠံၣ်ႇ ဖါဘီၤသ၀ီႇမဲၤကၠံၣ်ကစၢၢ်ခီၣ်ထံးႇတိၣ်ကၠံသ၀ီ ဒီး တကီၤဘိကရူၢ်ပူၤ တကီၤဘိသ၀ီႇကိဒါကၠံသ၀ီႇ မံပိသ၀ီႇ ဘီၣ်သပၠူၣ်သ၀ီႇကၠိပ့ၤစ့ၣ်သ၀ီႇနိကွါသ၀ီႇမဲလၤသ၀ီႇ မဲလၤခၠီ၀ၣ်သ၀ီႇထံဖိနဲၣ်ႇနီၤသယ့သ၀ီႇကွံသခီၣ်ႇ လၤခဲၣ်ခီၤသ၀ီႇ စ့ၣ်ခၠီသ၀ီႇလဲၣ်ပတါ,၀ဲပၠၣ်ခၠီ၀ၣ်ႇမၠဲၤသ၀ီသ့ၣ်တဖၣ်အံၤဒီး သ၀ီတဖျၢၣ်န့ၣ်ဃ့၀ဲစ့(၂)ကလီၢ်တုၤ (၁၃)ကလီၢ်ညါအဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါပူၤ ပာ်ဖျါ၀ဲန့ၣ်လီၤႉ
ဘၣ်ဃးတၢ်ထၢစ့လၢကမျၢၢ်အအိၣ်တၢ်ဂ့ၢ်အံၤပခ့ၣ်အဲးစံၣ်-ကညီတၢ်ကစီၣ်ဆဲးကျိးသုးခိးကီၢ်ဆၢ(BGF) ၁၀၁၄ သုးရ့ၣ် သုးဒ့ခိၣ် ဘိၤတ့ၤ၀့ဘၣ်ဆၣ် ဆဲးကျိးတန့ၢ်ဘၣ်န့ၣ်လီၤႉ
လၢန့ၣ်အမဲာ်ညါဖဲအပူၤကွံာ်(၂၀၂၂)လါမ့ၤ ၂ သီအခါစ့ၢ်ကီး လၢဖၣ်အၣ်ကီၢ်ဆၣ် တတါအူႇညီၤကိႇ၀ဲပၠၣ်သ၀ီအပူၤ ဘိၤတ့၀့တီခိၣ်ရိၣ်မဲ(BGF)အၦၤဖီၣ်၀ဲဒၣ်ၦၤကမျၢၢ်က့ၤကိး၀ဲဒၣ်ဆူတၤပီႇလ့က့ၣ်လၢကမၢ၀ံပီၣ်တၣ်ဒီး ဒ်န့ၣ်အသိး ထၢသုးဃ့၀ဲဒၣ်စ့ကဲထီၣ်တ့ၢ်အသးအိၣ်၀ဲအဂ့ၢ်န့ၣ် သ့ၣ်ညါဘၣ်လၢဂံၢ်ခီၣ်ထံးတၢ်ကစီၣ်အအိၣ်န့ၣ်လီၤႉ
