ဒ်သိးၦၤထူလံၤဖိတဖၣ်ကအိၣ်ဒီးနီၢ်ကစၢ်တၢ်ပၢလီၤသးခွဲးယ၁်အဂီၢ်တၢ်ဒုးအိၣ်ထီၣ်၀ဲသီသံၣ်တီအူၦၤထူလံၤဖိကရၢၢ်

လါဒံၣ်စ့ဘၢၣ် ၁၃ သီႇ ၂၀၂၃ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ တီအူကီၢ်ရ့ၣ်(သုးက့ ၂)ကီၢ်သူလ့ၤတၢ်ပၢဟီၣ်က၀ီၤကလံၤစိးအပူၤန့ၣ် ၦၤကညီအဒူၣ်အထၢတဖၣ်အိၣ်ဆိး၀ဲဒၣ်အါမးဒီး ဒ်သိးၦၤထူလံၤဖိသ့ၣ်တဖၣ်အံၤကအိၣ်ဒီးနီၢ်ကစၢ်တၢ်ပၢလီၤသး ခွဲးယာ်အဂီၢ်တၢ်ဒုးအိၣ်ထီၣ်၀ဲဒၣ်သီသံၣ်တီအူၦၤထူလံၤဖိကရၢၢ်အဂ့ၢ်န့ၣ် သ့ၣ်ညါဘၣ်ဖဲလါဒံၣ်စ့ဘၢၣ် ၁၂ သီ လၢတၢ်ဒုးသ့ၣ်ညါလီၤသီသံၣ်တီအူကရၢၢ်အတၢ်ရဲၣ်တၢ်ကျဲၤလၢ(အီၤလါ)ပူၤအံၤအသိးန့ၣ်လီၤႉ

ကညီဖိခိၣ်ဃၢၤဒီးၦၤဂ့ၢ်၀ီတၢ်မၤၦာ်ဘျးစဲကရၢ(KESAN)တီခိၣ်ရိၣ်မဲမၤ၀ဲတၢ်ဒုးသ့ၣ်ညါဒီးတၢ်ကွၢ်သကိးတၢ်ဂီၤမူ အတၢ်ရဲၣ်တၢ်ကျဲၤဘၣ်ဃးသီသံၣ်တီအူၦၤထူလံၤဖိကရၢၢ်အံၤလၢ(အီၤလါ)ပူၤဒီးကရၢၢ်အံၤဒ်သိးၦၤထူလံၤဖိတဖၣ် ကအိၣ်ဒီးနီၢ်ကစၢ်တၢ်ပၢလီၤသးအဂီၢ်န့ၣ်ဘၣ်တၢ်ဒုးအိၣ်ထီၣ်အီၤလီၤအဂ့ၢ်န့ၣ် ကရၢၢ်အံၤကကဲထီၣ်လိၣ်ထီၣ်အဂီၢ် ၦၤပၢၤလီၢ်ဆ့ၣ်နီၤ–၂ ပဒိၣ်စီၤဒဲဖိ စံးလီၤ၀ဲလၢတၢ်ဒုးသ့ၣ်ညါလီၤတၢ်ရဲၣ်တၢ်ကျဲၤပူၤန့ၣ်လီၤႉ

အ၀ဲစံး၀ဲလၢ“သီသံၣ်တီအူၦၤထူလံၤဖိကရၢၢ်အံၤမ့ဘၣ်ကွၢ်လၢဆၢကတီၢ်တၢ်အိၣ်သးမ့ကီမ့ခဲလၢထံရူၢ်ကီၢ်သဲး လၢတၢ်ဂ့ၢ်အါမံၤသနါက့လၢပတၢ်ထံၣ်ပတၢ်မုၢ်လၢ်ကွၢ်စိဒီးပထံၣ်သၦၢ်ကတၢၢ်ဂ့ၤလၢပဘၣ်ဒုးအိၣ်ထီၣ်ဒီး ပဒုးအိၣ်ထီၣ်အီၤလီၤ”အဂ့ၢ်န့ၣ် စံး၀ဲန့ၣ်လီၤႉ

လၢန့ၣ်အမဲာ်ညါဒ်သိးတၢ်ဒုးအိၣ်ထီၣ်သီသံၣ်တီအူၦၤထူလံၤဖိကရၢၢ်ကကဲထီၣ်လိၣ်ထီၣ်ဖးထီၣ်အဂီၢ်န့ၣ် ထံရူၢ်ကီၢ်သဲးတၢ်ဂ့ၢ်ကီအိၣ်ဘၣ်ဆၣ်ကဲထီၣ်တၢ်အဂ့ၤတခါလၢစၢၤသွဲၣ်သီသးစၢ်သ့ၣ်တဖၣ်အဂီၢ်အဃိ လၢတၢ်ကီတၢ်ခဲအပူၤဒုးအိၣ်ထီၣ်၀ဲကရၢၢ်အံၤအဂ့ၢ်န့ၣ် ပဒိၣ်စီၤဒဲဖိ စံးအါထီၣ်၀ဲန့ၣ်လီၤႉ

စးထီၣ်လၢသုးဟံးန့ၢ်တၢ်စိတၢ်ကမီၤကဲထီၣ်လၢကီၢ်ပယီၤထံကီၢ်ဒီဘ့ၣ်အပူၤကလုာ်ဒူၣ်အဒူၣ်အထၢတဖၣ်ဘၣ် တၢ်ဆီၣ်တံၢ်မၤနၢၤအီၤအကပၤကပၤဒီးလီၢ်က၀ီၤကလုာ်ဒူၣ်တဖၣ်ဘၣ်အိၣ်မူ၀ဲဒၣ်ကီကီခဲခဲန့ၣ်လီၤႉလၢန့ၣ်အမဲာ်ညါ ကညီအဒူၣ်အထၢလၢအိၣ်သီသံၣ်တီအူကရၢၢ်ပူၤတဖၣ်မ့ၢ်ဂ့ၤႇကလုာ်အဒူၣ်အထၢလၢအဂၤသ့ၣ်တဖၣ်မ့ၢ်ဂ့ၤ တၢ်ကတြီဆၢဒီသဒၢ၀ဲဒၣ်ၦၤထံဖိကီၢ်ဖိကမျၢၢ်အတၢ်ခွဲးတၢ်ယာ်အဂ့ၢ်န့ၣ် ကရၢၢ်အံၤကကဲထီၣ်လိၣ်ထီၣ်အဂီၢ် ၦၤဘၣ်မူဘၣ်ဒါတဖၣ် စံး၀ဲန့ၣ်လီၤႉ

ကရၢၢ်အံၤကကဲထီၣ်လိၣ်ထီၣ်အဂီၢ် ၦၤပၢၤလီၢ်ဆ့ၣ်နီၤ ပဒိၣ်စီၤအဲၣ်၀ါ စံး၀ဲလၢ“ပအိၣ်ဒီးနီၢ်ကစၢ်တၢ်ပၢလီၤသး ခွဲးယာ် အလံာ်အုၣ်သးခဲလၢာ်လီၤႉအဃိလၢပ၀ဲဒၣ်အကျါၦၤသ့ၦၤဘၣ်တဖၣ်ဒီးၦၤဘၣ်မူဘၣ်ဒါတဖၣ်ဆၢတဲာ်လီၤ၀ဲ လၢကမၤ တုၤသီသံၣ်တီအူၦၤထူလံၤဖိကရၢၢ်အံၤအကဲထီၣ်လီၤႉဒ်သိးပက့ၤပၢပြးလီၤကဒါက့ၤဟီၣ်ခိၣ်လီၢ်သ့ၣ်တဖၣ်အံၤကန့ၢ်အဂီၢ်န့ၣ်ပကရဲၣ်ကျဲၤပၢပြးက့ၤအီၤလီၤႉတၢ်ကီတၢ်ခဲအိၣ်ဘၣ်ဆၣ်တၢ်မၤအိၣ်န့ၣ်ပကဘၣ်မၤအီၤလီၤႇ ပကမၤတုၤအတုၤဆူ ဖီၣ်တၢၣ်လီၤ”အဂ့ၢ်န့ၣ် စံး၀ဲန့ၣ်လီၤႉ

တၢ်မၤတၢ်ဒုးသ့ၣ်ညါဒီးတၢ်ကွၢ်သကိးတၢ်ဂီၤမူအတၢ်ရဲၣ်တၢ်ကျဲၤဘၣ်ဃးသီသံၣ်တီအူၦၤထူလံၤဖိကရၢၢ်အံၤလၢ (အီၤလါ)ပူၤဘျီ၀ဲအံၤန့ၣ်တၢ်ကရၢကရိအခၢၣ်စးဃုာ်ဒီးတၢ်ကစီၣ်သန့လၢတၢ်ကွဲမု၁်အီၤတဖၣ် ဟဲထီၣ်ကအိၣ်၀ဲဒၣ် ခဲလၢာ်(၆၇)ဂၤညါဃၣ်ဃၣ်ညါန့ၣ်လီၤႉ

သီသံၣ်တီအူၦၤထူလံၤဖိကရၢၢ်အံၤအလဲၢ်အထီအိၣ်၀ဲ(၁ႇ၄၂၁ႇ၉၆၇)အ့ကၢၣ်ညါဒီးဟီၣ်က၀ီၤဖဲန့ၣ်အပူၤ အါဒၣ်တက့ၢ် ၦၤကညီအဒူၣ်အထၢတဖၣ်လၢအမ့ၢ်ကညီ၀ါႇကဲၤဘါႇဘှဲႇပကူႇမိၤၦၤႇမိၤန့ၢ်ၦၤႇစလၢၤဒီး ကညီအဒူၣ်အထၢလၢအဂၤ သ့ၣ်တဖၣ်အိၣ်ဆိး၀ဲဒီးအ၀ဲသ့ၣ်အံၤလုၢ်အီၣ်အသးသမူလၢတၢ်သူၣ်အီၣ်ဖျးအီၣ် တကပၤအဂ့ၢ်န့ၣ် တၢ်ဒုးသ့ၣ်ညါလီၤအပူၤ သ့ၣ်ညါဘၣ်န့ၣ်လီၤႉ