(KNLA)သုးပ၁်ဖှိၣ်နု၁်လီၤဟံးန့ၢ်လီၢ်လၢနၣ်သၤကွ့၀့ၢ်ပူၤ

လါဒံၣ်စ့ဘၢၣ် ၂၇ သီႇ ၂၀၂၃ နံၣ်ႇ ခ့ၣ်အဲးစံၣ်

ပယီၤသုးကလၢၤလၢအိၣ်ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၃)ဟီၣ်က၀ီၤ ချၢၣ်လွံၢ်ထူၣ်ကီၢ်ရ့ၣ် လၢၢ်ဒိၣ်ကီၢ်ဆၣ် နၣ်သၤကွ့၀့ၢ်ပူၤအံၤတဖၣ် ဖဲလါဒံၣ်စ့ဘၢၣ် ၂၆ သီအနံၤန့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA)သုးပာ်ဖှိၣ်နုာ်လီၤခး၀ဲဒီးနုာ်လီၤဟံးန့ၢ်လီၢ်လၢ၀့ၢ်ပူၤလံအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ် န့ၣ်လီၤႉ

စးထီၣ်ဖဲလါဒံၣ်စ့ဘၢၣ် ၂၆ သီ ဂီၤခီလွံၢ်နၣ်ရံၣ်ဃၣ်ဃၣ်အဆၢကတီၢ်န့ၣ် တၢ်ပၢၢ်ဆၢသုးပာ်ဖှိၣ်ကရူၢ်နုာ်လီၤခး၀ဲ နၣ်သၤကွ့ဒီးပဲနွဲၤကိ(ပဲနွယ်ကုန်း)ဘၢၣ်စၢၤပယီၤသုးကလၢၤခံဖျၢၣ်ဒီးဖဲန့ၣ်၀ံၤတကတီၢ်ဃီနုာ်လီၤခးကဒီး၀ဲ ပၢၤကီၢ်၀ဲၤလီၢ်ဒီးတၢ်သမံသမိးတြဲၤလီၢ်သ့ၣ်တဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

နၣ်သၤကွ့၀့ၢ်ပူၤ ကမျၢၢ်တဂၤစံး၀ဲလၢ“ၦၤလဲၤထီၣ်စိလၢနၣ်သၤကွ့ဒီးပဲနွဲၤကိတၢ်သမံသမိးတြဲၤခံခါန့ၣ်မီၤနီၤႉ ၀ံၤမးၦၤနုာ်လီၤက့ၤလၢ၀့ၢ်ပူၤပၢၤကီၢ်၀ဲၤလီၢ်ဒီးတိၤခိၣ်ထိးပယီၤသုးတၢ်လီၢ်ႇသီခါဖၠၣ်ႇပယီၤသုးတၢ်လီၢ်တဖၣ်မီၤနီၤႉ တၢ်ပၢၢ်ဆၢကရူၢ်ဒုကအိၣ်၀ဲဒၣ်ဖဲသ၀ီပူၤလီၤႉလၢတိၤတၢ်ဘံၣ်တၢ်ဘၢတြဲၤလၢန့ၣ်တကပၤန့ၣ်အိၣ်တ့ၢ်ဒံးႇမ့မ့ၢ်လၢန့ၣ် တကပၤဒုနုာ်လီၤဒၢးတန့ၢ်ဟးထီၣ်ဒၢးတန့ၢ်ဘၣ်ႇအိၣ်ကတာ်ထီၣ်သးဖဲန့ၣ်လီၤ”အဂ့ၢ်န့ၣ် စံး၀ဲန့ၣ်လီၤႉ

တၢ်ဒုးကဲထီၣ်အခါခီဖျိသုးကီၣ်ကးကဘီယူၤဟဲခးလီၤတၢ်လၢနၣ်သၤကွ့၀့ၢ်ပူၤဒီး၀့ၢ်ခိၣ်၀့ၢ်ဃၢၤအဃိ နၣ်သၤကွ့ႇ တကိၤတဲၤ(တံခွန်တိုင်)ၦၤကမျၢၢ်သံ၀ဲဒၣ် ၅ ဂၤအကျါပၣ်ဃုာ်၀ဲၦၤဖိသၣ်လၢအသးနံၣ်တၦဲၤဒံးဘၣ်န့ၣ်(၃)ဂၤဒီး ဒ်န့ၣ်အသိးပယီၤသုးတၢ်သမံသမိးတြဲၤလီၢ်လၢအိၣ်ဘူးဖဲတၢ်ခိၣ်တၢ်ဃၢၤဖဲန့ၣ်တဖၣ်စ့ၢ်ကီးခးလီၤ၀ဲကျိဖးဒိၣ် ဆူ၀့ၢ်ပူၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဂံၢ်ခီၣ်ထံးတၢ်ကစီၣ်တဖၣ်အအိၣ်န့ၣ်လီၤႉ

“တၢ်ကဲထီၣ်သးသီသီန့ၣ်ကဘီယူၤတဟဲဒံးဘၣ်မုၢ်၀ါထီၣ်မးကဘီယူၤဟဲႉပယီၤသုးအိၣ်လၢပဲနွဲၤကိဒီးပ့စလိၣ် တဖၣ်န့ၣ် ခးစိဃီၤကျိဖးဒိၣ်လၢ၀့ၢ်ပူၤဒုအိၣ်ဘၣ်ဆၣ်စးထီၣ်လၢကဘီယူၤဟဲသၢဘျီ၀ံၤဘျီန့ၣ်ဂၢၢ်ထီၣ်တစဲးႉလၢတကိၤတဲၤ (တံခွန်တိုင်)တကပၤန့ၣ်ၦၤဖိသၣ်ဘၣ်(၃)ဂၤညါႉၦၤစံၣ်ထီၣ်အိၣ်တနီၤဒီးမ့မ့ၢ်ၦၤလၢအဂၤတနီၤခီဒုနုာ်လီၤစံၣ်အိၣ်လၢတၢ်ပူၤ”အဂ့ၢ်န့ၣ် နၣ်သၤကွ့ကမျၢၢ်တဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ

ဘၣ်ဃးတၢ်ပၢၢ်ဆၢသုးပာ်ဖှိၣ်နုာ်လီၤခး၀ဲနၣ်သၤကွ့၀့ၢ်ပူၤတၢ်အိၣ်သးအံၤန့ၣ်ခ့ၣ်အဲၣ်ယူၣ်တကပၤထုးထီၣ်ပာ်ဖျါ တၢ်ကစီၣ်တအိၣ်နီမံၤဒံးဘၣ်ဒီးဒ်န့ၣ်အသိးဖဲပဆဲးကျိးသံကွၢ်(ခ့ၣ်အဲၣ်ယူၣ်)ၦၤကတိၤတၢ်ပၢအခါ စံး၀ဲလၢ(သုးက့ ၃) တၢ်ကစီၣ်တဟဲတုၤဒံးဘၣ်အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

တလါအံၤလါဒံၣ်စ့ဘၢၣ်အတီၢ်ပူၤဖဲတၢ်ပၢၢ်ဆၢသုးပာ်ဖှိၣ်ကရူၢ်နုာ်လီၤခးတၢ်လၢ၀့ၢ်ပူၤ၀ံၤလီၢ်ခံန့ၣ် ဘၣ်ယိၣ်လၢပယီၤသုး ကက့ၤခီၣ်ဆၢကဒါတၢ်တမံၤမံၤအဃိတၢ်ပၢၢ်ဆၢသုးပာ်ဖှိၣ်ဟ့ၣ်ပလီၢ်ၦၤကမျၢၢ်တဖၣ်လၢ ကဟးထီၣ်စံၣ်အိၣ်လၢ၀့ၢ်ချၢ န့ၣ်လီၤႉ