လါဒံၣ်စ့ဘၢၣ် ၂၇ သီႇ ၂၀၂၃ နံၣ်ႇ ခ့ၣ်အဲးစံၣ်
ဖဲအပူၤကွံာ်လါဒံၣ်စ့ဘၢၣ် ၂၃ သီအနံၤန့ၣ် ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ကီးတရံးကီၢ်ဆၣ် ကညီသးစၢ်ကရၢ(KYO)မၤ၀ဲဒၣ် ၅ ၀ီတ၀ီ တၢ်အိၣ်ဖှိၣ်ဖးဒိၣ်ခီကရဲး၀ံၤ၀ဲလံအဂ့ၢ်န့ၣ် သ့ၣ်ညါဘၣ်န့ၣ်လီၤႉ
တလါအံၤလါဒံၣ်စ့ဘၢၣ် ၂၂ သီတုၤ ၂၃ သီအနံၤ ကီးတရံးကီၢ်ဆၣ် ကညီသးစၢ်ကရၢတၢ်အိၣ်ဖှိၣ်ဖးဒိၣ် ခီကရဲးအပူၤန့ၣ် တၢ်ဃုထၢထီၣ်၀ဲကမံးတံာ်ဖိ ၁၅ ဂၤ ဖဲန့ၣ်အကျါကရၢခိၣ်န့ၣ်မ့ၢ်၀ဲ မါဆါမ့ႇ နဲၣ်ရွဲၣ် Saw Dillieaum Htoo, တၢ်ကရၢကရိဒီးတၢ်ဘိးဘၣ်ရၤလီၤမူဒါခိၣ်န့ၣ်မ့ၢ်၀ဲ စီၤ၀့ၤထူ ဒီး ၦၤပၢၤစ့ခီန့ၣ်မ့ၢ်၀ဲ နါဖၠူၤပၠၤမိ န့ၣ်လီၤႉ
ၦၤသးစၢ်တဖၣ်န့ၣ်ခါဆူညါအဂီၢ်မ့ၢ်ၦၤသ့ၣ်တဖၣ်လၢအရ့ဒိၣ်၀ဲဒၣ်အဃိပကဘၣ်သ့ၣ်ညါပာ်ပနီၣ်အ၀ဲသ့ၣ်အဂ့ၢ်န့ၣ် မါဆါမ့ လၢအဘၣ်တၢ်ဃုထၢထီၣ်အီၤလၢကီးတရံးကီၢ်ဆၣ် ကညီသးစၢ်ကရၢ(KYO)ကရၢခိၣ်အံၤ စံး၀ဲဒၣ်ဒ်အံၤ န့ၣ်လီၤႉ
အ၀ဲစံး၀ဲလၢ“တၢ်မၤတခါဂ့ၤတခါဂ့ၤၦၤသးစၢ်မ့တပၣ်ဃုာ်ဘၣ်န့ၣ်လဲၤတသ့ဘၣ်ႉလၢတၢ်ပၢၢ်ဆၢတကပၤမ့ၢ်ဂ့ၤႇ တၢ်ဖံးတၢ်မၤလၢအဂၤသ့ၣ်တဖၣ်အပူၤမ့ၢ်ဂ့ၤန့ၣ်အါဒၣ်တက့ၢ်န့ၣ်ၦၤသးစၢ်ပၣ်လီၤႉအဃိၦၤသးစၢ်တဖၣ်န့ၣ်အရ့ဒိၣ်ဒိၣ်မး ပကဘၣ်ပာ်ပနီၣ်အ၀ဲသ့ၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
ဒ်န့ၣ်အသိးဖီတၢၣ်လၢပၦၤကညီဖိမုၢ်လၢ်၀ဲသ့ၣ်တဖၣ်အံၤကတုၤအဂီၢ်န့ၣ် ကြၢးလၢၦၤသးစၢ်သ့ၣ်တဖၣ် နုာ်လီၤပာ်ဃုာ်ပၣ်ဂီၢ်၀ဲဒၣ်အဂ့ၢ်န့ၣ် ကီးတရံးကီၢ်ဆၣ် (KYO)ကီၢ်ဆၣ်ကမံးတံာ်ဖိ နီၢ်မူအဲၣ် လၢအဘၣ်တၢ်ဃုထၢ ထီၣ်အီၤအံၤစ့ၢ်ကီး စံး၀ဲဒၣ်ဒ်အံၤန့ၣ်လီၤႉ
“ခါလၢကဟဲလၢပ၀ဲဒၣ်ကညီသးစၢ်မ့ၢ်ဂ့ၤကညီဖိတဖၣ်မ့ၢ်ဂ့ၤဒ်သိးပကတုၤဖီတၢၣ်အဂီၢ်န့ၣ်အရ့ဒိၣ်လၢပကနုာ်လီၤ မၤသကိးတၢ်ကိးဂၤဒဲးႉပဆၢမုၢ်လၢ်လၢပၦၤကညီဖိသးစၢ်ခဲလၢာ်ကနုာ်လီၤမၤသကိးတၢ်ဒ်သိးသိးပကလဲၤဃူဃူဖိးဖိးမီၤနီၤႉ”အဂ့ၢ်န့ၣ် ကီၢ်ဆၣ်ကမံးတံာ်ဖိ နီၢ်မူအဲၣ် စံး၀ဲန့ၣ်လီၤႉ
၅ ၀ီတ၀ီ ကီးတရံးကီၢ်ဆၣ် ကညီသးစၢ်ကရၢ(KYO)တၢ်အိၣ်ဖှိၣ်ဖးဒိၣ်ခီကရဲးဘျီ၀ဲအံၤအပူၤန့ၣ် ခ့ၣ်အဲၣ်ယူၣ် ကီးတရံးကီၢ်ဆၣ်နဲၣ်ရွဲၣ် ပဒိၣ်မါမၠၣ်အ့ႇ ကီးတရံးကီၢ်ဆၣ် ကညီပိာ်မုၣ်ကရၢ(KWO)ကရၢခိၣ် ပဒိၣ်နါအဲၣ်ခၠဲၤႇ ကီၢ်ဆၣ်ပတီၢ်ခိၣ်နၢ်တဖၣ်ႇ ဒူပျာ်ယာ်ကီၢ်ရ့ၣ်(KYO)ခိၣ်နၢ်တဖၣ်ႇခိၢ်နၢ်လီၤဆီႇသ၀ီကရူၢ်စုာ်စုာ် ခၢၣ်စးတဖၣ်ဒီး ၦၤဟဲထီၣ်ဃုသ့ၣ်ညါခဲလၢာ်ပာ်ဖှိၣ်ဟဲထီၣ်၀ဲဒၣ်အဂၤ(၈၀)ဘျဲၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
ဒ်(KYO)အတၢ်သူၣ်ထီၣ်ဆီလီၤအိၣ်ပာ်အသိးန့ၣ် ကီၢ်ဆၣ်ဒီးကီၢ်ရ့ၣ်အပတီၢ်ခီကရဲးအံၤတၢ်မၤ၀ဲဒၣ်(၂)နံၣ်တဘျီဒီး မ့မ့ၢ်လၢလီၢ်ခၢၣ်သးအပတီၢ်ခီန့ၣ် တၢ်မၤ၀ဲဒၣ်(၄)နံၣ်တဘျီန့ၣ်လီၤႉ
