လါမးရှး ၁၃ သီႇ ၂၀၂၄နံၣ်ႇ ခ့ၣ်အဲးစံၣ်
ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)တၢ်ပၢၢ်ဆၢသုးကျိၤပာ်ဖှိၣ်သ့ၣ်တဖၣ်ထီၣ်မၤန့ၢ်ကွံာ်၀ဲပယီၤသုးကီၣ်ကးအသုးကလၢၤလၢအိၣ်ဆီလီၤအသးဖဲ(ရၤမတံကီၢ်ဆၣ်ႇ သ့ၣ်ကါညံၤနီၤ)၀ံၤအလီၢ်ခံတၢ်မၤန့ၣ်သုးကီၣ်ကး စုက၀ဲၤကျိချံၦာ်သၣ်အါအါဂီၢ်ဂီၢ်အဂ့ၢ်(KNLA)လီၢ်ခၢၣ်သးပာ်ဖျါ၀ဲဖဲတနံၤအံၤလါမးရှး(၁၃)သီအနံၤန့ၣ်လီၤႉ
ပယီၤသုးပၢဆှၢရဲၣ်ကျဲၤ၀ဲၤလီၢ်ခိၣ်သ့ၣ်(စကခ-၁၂)အစုတီၤဖီလာ်(ခမရ-၃၅၅)လၢအအိၣ်ဆီလီၤသးဖဲ(ရၤမတံၤ ကီၢ်ဆၣ်)(သ့ၣ်ကါညံၤနီၤ)ဟီၣ်ကအပူၤအံၤဖဲပူၤကွံာ်လါမးရှး(၇)သီအနံၤန့ၣ်ကညီဒီကလုာ််တၢ်ထူၣ်ဖျဲးသုးမုၢ်ဒိၣ်(KNLA)တၢ်ပၢၢ်ဆၢသုးပာ်ဖှိၣ်တဖၣ်ထီၣ်မၤန့ၢ်ကွံာ်၀ဲသုးကလၢၤအံၤအဂ့ၢ်သ့ၣ်ညါဘၣ်န့ၣ်လီၤႉ
တၢ်ထီၣ်မၤန့ၢ်သုးကလၢၤဘျီ၀ဲအံၤအပူၤန့ၣ်တၢ်မၤန့ၢ်သုးကီၣ်ကးတၢ်စုက၀ဲၤဒ်အမ့ၢ်(RPG ၊ NATO)ကျိစဲးႇ ကျိဖိအ ကလုာ်ကလုာ်ခဲလၢာ်(၁၂၇)ခိၣ်ႇ (၆၀ မမ ၊ ၈၁ မမ)စုက၀ဲၤဒိၣ်ကလုာ်ကလုာ်(၁၃)ခိၣ်ဃုာ်ဒီးကျိချံအကလုာ်ကလုာ် သ့ၣ်တဖၣ်ဒီးသုးတၢ်ပီးတၢ်လီတၢ်ဖိတၢ်လံၤသ့ၣ်တဖၣ်အါအါဂီၢ်ဂီၢ်အဂ့ၢ်(KNLA)လီၢ်ခၢၣ်သးတၢ်ပာ်ဖျါပူၤအသိးသ့ၣ်ညါဘၣ်န့ၣ်လီၤႉ
လၢန့ၣ်အမဲာ်ညါတၢ်ထီၣ်မၤန့ၢ်ပယီၤသုးခီၣ်ချ့သုးရ့ၣ်-၃၅၅သုးကလၢၤ(၄)သီအတီပူၤကွံာ်အလီၢ်ခံဖဲလါမးရှး(၁၁)သီ အနံၤန့ၣ်ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)တၢ်ပၢၢ်ဆၢသုးပာ်ဖှိၣ်သ့ၣ်တဖၣ်ထီၣ်မၤန့ၢ်ကဒီး၀ဲ(ရၤမတံၤ)ကလံၤထံးဟီၣ်က၀ီၤႇ ဖလူပယီၤသုးကလၢၤစ့ၢ်ကီးအဂ့ၢ်သ့ၣ်ညါဘၣ်န့ၣ်လီၤႉ
