မုၢ်တြီၢ်ကီၢ်ရ့ၣ် သုးဟံးန့ၢ်တၢ်စိတၢ်ကမီၤသၢနံၣ်ဘျဲၣ်အတီၢ်ပူၤ တၢ်ထီၣ်န့ၢ်ပယီၤသုးလၢၤ(၂၄)ဖျၢၣ်

လါမးရှး ၂၀ သီႇ ၂၀၂၄ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)အပူၤ သုးဟံးန့ၢ်တၢ်စိတၢ်ကမီၤ (၃)နံၣ်ဘျဲၣ် အတီၢ်ပူၤအံၤ တၢ်ထီၣ်မၤန့ၢ်၀ဲပယီၤသုးကလၢၤ(၂၄)ဖျၢၣ်အဂ့ၢ်န့ၣ် (ခဲၤဖ့)သီသံၣ်ခိၣ် ထုးထီၣ်ပာ်ဖျါ၀ဲဖဲလါမးရှး ၁၇ သီ အနံၤ န့ၣ်လီၤႉ

စးထီၣ်(၂၀၂၁)သုဟံးန့ၢ်ထံကီၢ်တၢ်စိတၢ်ကမီၤ၀ံၤလီၢ်ခံန့ၣ် သုးကီၣ်ကးအသုးကလၢၤလၢအိၣ်မုၢ်တြီၢ်ကီၢ်ရ့ၣ် (သုးက့ ၅) ဟီၣ်က၀ီၤပူၤတဖၣ် ခီဖျိတၢ်ပၢၢ်ဆၢသုးပာ်ဖှိၣ်ကရူၢ်ထီၣ်ခးႇသူ၀ဲဒၣ်ဒြိဒီးဒီၣ်တဲာ်ကွံာ်တၢ်အီၣ်တၢ်အီ ကျဲလၢကျဲအကပၤ ကပၤအဃိ သုးကီၣ်ကးအသုးကလၢၤဘၣ်လီၤကွံာ်အါအါဂီၢ်ဂီၢ်ဒ်အံၤလီၤအဂ့ၢ်န့ၣ် သ့ၣ်ညါဘၣ်န့ၣ်လီၤ.

ဘၣ်ဃးတၢ်ထီၣ်န့ၢ်သုးကီၣ်ကးအသုးအဂ့ၢ်အကျိၤန့ၣ်(သုးက့ ၅) ၦၤဘၣ်မူဘၣ်ဒါလၢတအဲၣ်ဒိးပာ်ဖျါအမံၤတဂၤစံး၀ဲ လၢ“၂၀၂၁ သုးဟံးန့ၢ်တၢ်စိိတၢ်ကမီၤ၀ံၤလီၢ်ခံတကတီၢ်ဃီစးထီၣ်ဖဲ(၂၀၂၃-၂၀၂၄)ထီၣ်အံၤန့ၣ် ပယီၤသုးထုး ကွံာ်၀ဲသုးကလၢၤႉအပူၤကွံာ်တၢ်မ့ထီၣ်ဒုးအ၀ဲသ့ၣ်န့ၣ်အ၀ဲသ့ၣ်ဆှၢထီၣ်၀ဲဒၣ်အၦၤဂံၢ်ဘါအိၣ်ဘၣ်ဆၣ်စးထီၣ်ဖဲ သုးဟံးန့ၢ်တၢ်စိတၢ်ကမီၤ၀ံၤလီၢ်ခံခီဖျိတၢ်ဒုးအမဲာ်သၣ်အတကွီၢ်လဲၢ်ထီၣ်အဃိဆှၢအါထီၣ်အၦၤတန့ၢ်လၢၤဘၣ်ႉ လၢအတၢ်ထုးကဒါက့ၤသုးကလၢၤအံၤန့ၣ်မ့ၢ်ဒၣ်လၢအဂံၢ်အဘါလီၤစှၤႇတၢ်လဲၤခးအီၤဒီးဒြိႇစနဲးဖၢးအါထီၣ် အဃိ အၦၤလီၤစှၤအဖီခိၣ်က့ၤပာ်ဖှိၣ်ထီၣ်က့ၤသးတပူၤဃီမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ

ပယီၤသုးကလၢၤလၢ(သုးက့ ၅)အၦၤထီၣ်မၤန့ၢ်၀ဲသ့ၣ်တဖၣ်န့ၣ်မ့ၢ်၀ဲ ပဟီထၣ်(တဃီၤထၣ်)သုးကလၢၤႇ မိၣ်လိၣ်ကၠိ(ထံထၣ်), တဖံၣ်ခံ(၀ၣ်သိထၣ်),ဆၣ်လီၤကၠိႇမဲၢ်ရၤထၣ်ႇမဲၢ်တရံးထၣ်ႇသံမုၢ်ထၣ်ႇ မဲၢ်ပရံးဒိၣ်ႇလၢၢ်စ့ဒီခိၣ် (ကၠီၤထၣ်),စီၤဖိထၣ်ႇရံကၠၤထၣ်ႇထံထီၣ်ပၢၢ်ႇဃီၣ်ဒီခိၣ်ႇမဲၢ်ပီမုၢ်ထၣ်ႇပိာ်မုၣ်ကၠိႇသံရိၣ်ထၣ်ႇအူသူၣ်ထၣ်ႇ၀ီၢ်မုၢ်ႇမဲၤ၀့ၤႇ ဖါခဲးကၠိႇက့ၣ်ကီၣ်ႇမၠ့ၣ်နံၣ်ကိႇကၠူၣ်လူၢ်ႇလၢၢ်ကျ့ကၠိသုးကလၢၤသ့ၣ်တဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

သုးကလၢၤလၢ(သုးက့ ၅)အၦၤထီၣ်န့ၢ်၀ဲသ့ၣ်တဖၣ်အံၤမ့ၢ်အရ့ဒိၣ်လၢသုးကီၣ်ကးအဂီၢ်ထဲလဲၣ်ဒီးသုကလၢၤ သ့ၣ်တဖၣ်အံၤမ့ၢ်သုးကလၢၤဒ်လဲၣ်တကလုာ်လဲၣ်အဂ့ၢ်န့ၣ် (သုးက့ ၅) ၦၤဘၣ်မူဘၣ်ဒါတဂၤဃီ၀ဲန့ၣ် စံးအါထီၣ်၀ဲ ဒ်အံၤန့ၣ်လီၤႉ

အ၀ဲစံး၀ဲလၢ“သုးကလၢၤလၢၦၤထီၣ်န့ၢ်ခဲအံၤတဖၣ်န့ၣ်တမ့ၢ်သုးကလၢၤလၢၦၤထီၣ်န့ၢ်အီၤညီညီဘၣ်ႉ မ့ၢ်သုးကလၢၤ လၢတၢ်ထီၣ်န့ၢ်အီၤကီသုးကလၢၤတဖၣ်အံၤကဲ၀ဲဒၣ်(မ့န်)အကါဒိၣ်၀ဲဒၣ်လၢအ၀ဲသ့ၣ်အဂီၢ်ႉ အဒိဒ်သိးသီလဲၤထၣ်ႇ မဲၤခါထၣ်တၢ်လီၢ်အံၤန့ၣ်အကါဒိၣ်မးလၢထံဆၢကီၢ်ဆၢတၢ်ကူၣ်လဲၤမၤကၤမ့ၢ်ဂ့ၤႇတၢ်ဆှၢန့ၢ်ပယီၤသုးတၢ်အီၣ်တၢ်အီ ႇကျိချံၦာ်သၣ်တဖၣ်ဆူသုးကလၢၤဆံးဆံးဖိတဖၣ်အဂီၢ်ဒီးတၢ်လီၢ်သ့ၣ်တဖၣ်အံၤ အကဲ၀ဲဒၣ်ဒုးယၤ(ဗျူဟာ) အပတီၢ်မီၤနီၤ”အဂ့ၢ်န့ၣ် စံး၀ဲန့ၣ်လီၤႉ

လၢန့ၣ်အမဲာ်ညါတကီၢ်ခါခဲအံၤခီဖျိ(သုးက့ ၅)သုးပာ်ဖှိၣ်အၦၤမၤဆူၣ်ထီၣ်၀ဲဒုးယၤတၢ်ဟူးတၢ်ဂဲၤအဖီခိၣ် ပယီၤသုးအံၤ ဟးထီၣ်လၢသုးကလၢၤချၢတဘူၣ်လၢၤဘၣ်ဘၣ်ယိၣ်၀ဲလၢတၢ်ကလဲၤခးအ၀ဲသ့ၣ်အဃိ ဟးဒိးလီၤ၀ဲဒၣ် ဟီၣ်လာ်မ့ၣ်ပိၢ် လၢဒူသ၀ီဃၢၤႇက၀ီၤဒ့တဖၣ်အပူၤဒီးၦၤကမျၢၢ်လၢအိၣ်က၀ီၤဒ့ပူၤတဖၣ်ဘၣ်အိၣ်၀ဲလၢတၢ်ဘၣ်ယိၣ်ဘၣ်ဘှီပူၤအဂ့ၢ်န့ၣ် ဟီၣ်က၀ီၤဂံၢ်ခီၣ်ထံးၦၤဟ့ၣ်တၢ်ကစီၣ်ဖိစံး၀ဲအသိး သ့ၣ်ညါန့ၣ်လီၤႉ

ဒ်န့ၣ်အသိးဖဲမဟါလါမးရှး ၁၉ သီ ဂီၤခီဒီးဟါခီအဆၢကတီၢ်န့ၣ် ခီဖျိ(သုးက့ ၅)အၦၤ ဒြိကရူၢ် ထီၣ်ခး၀ဲ ဖၣ်ပူၣ်ပယီၤသုးကလၢၤသုးရ့ၣ်တၢ်လီၢ်သ့ၣ်တဖၣ်လၢဒြိအဃိ သုးကီၣ်ကးအၦၤသံ(၁)ဂၤဒီးဘၣ်ဒိ၀ဲဒၣ်(၅)ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ

တၢ်လဲၤထီၣ်ခးဖၣ်ပူၣ်ပယီၤသုးကလၢၤသုးရ့ၣ်တၢ်လီၢ်ဘျီ၀ဲအံၤအခါပယီၤသုးခးလီၤကဒါက့ၤဒြိလၢ ဒူသ၀ီ တၢ်ခိၣ်တၢ်ဃၢၤ ဖဲန့ၣ်အပူၤအိၣ်၀ဲဒီးဘၣ်ဆၣ်ကမျၢၢ်သံဘၣ်ဒိဘၣ်ထံးတအိၣ်၀ဲဘၣ်အဂ့ၢ်န့ၣ် (သုးက့ ၅) ၦၤဘၣ်မူဘၣ်ဒါ စံး၀ဲအသိးသ့ၣ် ညါဘၣ်န့ၣ်လီၤႉ

ဒ်န့ၣ်အသိးဖဲအပူၤကွံာ်လါမးရှး ၁၈ သီ ဂီၤခီအဆၢကတီၢ်စ့ၢ်ကီး ပယီၤသုးလၢအိၣ်ဖၣ်ပူၣ်သုးကလၢၤတဖၣ်အံၤ ခီဖျိအ၀ဲသ့ၣ်ခးလီၤ၀ဲဒၣ်ကျိဖးဒိၣ်ခံဖျၢၣ်ဆူ လူၤသီကီၢ်ဆၣ် ဘီသ့ၣ်ထၣ်ကရူၢ် ပၤလါသ၀ီပူၤအဃိ သ၀ီဖိအပနၢ်သံ၀ဲဒၣ် (၁)ဒုဒီး ဘၣ်ဒိ(၂)ဒုအဂ့ၢ်န့ၣ် မုၢ်တြီၢ်တၢ်ကစီၣ်ထုးထီၣ်ပာ်ဖျါ၀ဲဖဲမါဟါန့ၣ်လီၤႉ

ဒ်(သုးက့ ၅)ၦၤဘၣ်မူဘၣ်ဒါစံး၀ဲအသိး ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ် (သုးက့ ၅) ဟီၣ်က၀ီၤအပူၤန့ၣ် ပယီၤသုးအကလၢၤအိၣ်၀ဲဒၣ်ခဲလၢာ်(၈၀)ဖျၢၣ်ခိၣ်ဃၢၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ