လါမးရှး ၂၉ သီႇ ၂၀၂၄ နံၣ်ႇ ခ့ၣ်အဲၣ်စံၣ်ႇ
ကီၢ်ကၠီၣ်တဲၣ်ကီၢ်ပဒိၣ်ဟ့ၣ်ခီ၀ဲတၢ်တိစၢၤမၤစၢၤဆူကညီကီၢ်စဲၣ်ပူၤလီၢ်အိၣ်ကမှံဖိအဂၤ(၂၀၀၀၀)အဂီၢ်အံၤအဖီခိၣ် အံၤခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဃ့ထီၣ်၀ဲထံကီၢ်လၢဟ့ၣ်တၢ်မၤစၢၤတဖၣ်ကကူၣ်လိာ်ထိၣ်ဃူလိာ်သးဒီး ဂံၢ်ထီၣ်ထံးကရူၢ်ကရၢ၀ံၤမးကဆိမိၣ်သကိးတၢ်တိစၢၤမၤစၢၤအဂ့ၢ်န့ၣ် ထုးထီၣ်ပာ်ဖျါ၀ဲလံာ်ဖဲမဟါလါမးရှး (၂၈)သီ အနံၤန့ၣ်လီၤႉ
ကၠီၣ်တဲၣ်ပဒိၣ်အတၢ်ဟ့ၣ်တၢ်တိစၢၤမၤစၢၤအကျိၤအကျဲအံၤခီဖျိတၢ်ဒုးသ့ၣ်ညါ၀ဲဂံၢ်ခီၣ်ထံးတၢ်ကရၢကရိ တအိၣ် နီတမံၤဘၣ်အဃိဆူမဲာ်ညါတၢ်မၤစၢၤဒ်အံၤမ့ၢ်အိၣ်န့ၣ်ဒ်သိးတၢ်တၢၣ်ပီၣ်တဲသကိးတၢ်ဒီးဂံၢ်ခီၣ်ထံးကရူၢ်ကရၢကအိၣ်ဖျိဖျိဖျါဖျါအဂီၢ်ခ့ၣ်အဲၣ်ယူၣ်ဘၣ်ထုးထီၣ်ပာ်ဖျါ၀ဲအတၢ်ပာ်သးဒ်အံၤလီၤအဂ့ၢ်န့ၣ် ခ့ၣ်အဲၣ်ယူၣ်ၦၤကတိၤတၢ်ပၢ ပဒိၣ်စီၤကျၢၤစ့ စံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“တၢ်ဟ့ၣ်တၢ်ဒိသူၣ်ဒိသးတၢ်မၤစၢၤအံၤန့ၣ်ခီဖျိတၢ်တၢၣ်ပီၣ်တၢၣ်ပီတအိၣ်ဘၣ်အဃိခါဆူညါဒ်သိး တၢ်ကဒုးသ့ၣ်ညါဆဲးကျိးဆဲးကျၢ၀ဲဂံၢ်ခီၣ်ထံးၦၤဘၣ်မူဘၣ်ဒါတဖၣ်အဂီၢ်(ခ့ၣ်အဲၣ်ယူၣ်)ထုးထီၣ်ပာ်ဖျါ၀ဲအတၢ်ပာ်သးတဖၣ်လီၤဒီးပတၢ်ပာ်သးန့ၣ်မ့ၢ်ဒ်သိးပကွဲးဖျါထီၣ်လၢလံာ်ပူၤ(၆)ထံၣ်အသိးလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်- ကညီတၢ်ကစီၣ်န့ၣ်လီၤႉ
လၢန့ၣ်အမဲာ်ညါကၠီၣ်တဲၣ်ပဒိၣ်တၢ်ဟ့ၣ်တၢ်တိစၢၤမၤစၢၤအံၤခီဖျိပညိၣ်မၤသကိး၀ဲတၢ်ဒီးသုးကီၣ်ကး(MRCS)ကရူၢ်ကရၢလၢအဟ့ၣ်ဂံၢ်ဟ့ၣ်ဘါ(SAC)ဒီးတကးဒံးဘၣ်တၢ်တၢၣ်ပီၣ်ဒီးဂံၢ်ခီၣ်ထံးတၢ်ကရၢကရိတအိၣ်ဘၣ်အဃိ တၢ်မၤစၢၤအံၤကဲထီၣ်က့ၤတၢ်လၢတလဲၤအသးဘၣ်ဘျီးဘၣ်ဒါဘၣ်အဂ့ၢ်န့ၣ် (CIDKP-Community for Internally Displace Karen People )ကညီၦၤလီၢ်အိၣ်ကမှံကမံတံာ်ၦၤဘၣ်မူဘၣ်ဒါ စီၤခဲလ့ၣ် စံးစ့ၢ်ကီး၀ဲဒ်အံၤန့ၣ်လီၤႉ
အ၀ဲစံး၀ဲလၢ“တၢ်နီၢ်နီၢ်န့ၣ်တၢ်လၢတၢ်ဟ့ၣ်လီၤအနီၢ်ကီၢ်န့ၣ်ကဘၣ်မ့ၢ်၀ဲတၢ်မၤသကိးလၢၦၤကိးဂၤဒဲးထံၣ်ဃုာ်၀ဲတထံၣ်ဃုာ်၀ဲမီၤနီၤႉတၢ်ဂ့ၢ်ကီမတၤဒုအိၣ်လဲၣ်န့ၣ်ၦၤကိးဂၤဒဲးကဘၣ်သ့ၣ်ညါထွဲ၀ဲဒၣ်အစှၤကတၢၢ်ကဘၣ်သံကွၢ်၀ဲဒၣ်တၢ်တခါအံၤမ့ၢ်အလိၣ်ဧါတလိၣ်ဧါန့ၣ်ကဘၣ်တၢၣ်ပီမၤသကိး၀ဲမီၤနီၤႉခဲအံၤခီန့ၣ်တဲ၀ဲလၢမၤ၀ဲဒီး(CIDKP)လၢကီၢ်ရ့ၣ်ပူၤဘၣ်ဆၣ်ပ၀ဲပအိၣ်ဖဲအံၤန့ၣ်ပတသ့ၣ်ညါတၢ်ကစီၣ်ခဲလၢာ်ခဲဆ့ဘၣ်အဖီခိၣ်န့ၣ်လီၤဂာ်ဒ်သိးၦၤမၤ(Humanitarian)လီၤ တံၢ်လီၤဆဲးန့ၣ်တပၣ်ဃုာ်၀ဲဘၣ်ႇအ၀ဲသ့ၣ်န့ၣ်(Focus)၀ဲလၢသုးကီၣ်ကးအၦၤ(MRCS)ဒီးဃု၀ဲကျဲလၢအမၤ၀ဲန့ၢ်ညီ အဃိန့ၣ်လဲၤ၀ဲသးဒ်အံၤမီၤႉလၢတၢ်န့ၣ်အဃိတၢ်တၢၣ်ပီၣ်မ့တအိၣ်ဘၣ်ကၠါဒုတၢ်မၤစၢၤအံၤတမ့ၢ်တၢ်ကဲထီၣ်သး ဘၣ်ဘျီးဘၣ်ဒါဘၣ်ဒီးတမ့ၢ်တၢ်လၢၦၤအါဂၤထံၣ်ဃုာ်ပၣ်ဃုာ်မၤသကိးတၢ်ဘၣ်အသိးတမ့ၢ်တၢ်မၤစၢၤဒ်သိးပမၤညီနုၢ်ဘၣ်မီၤ”အဂ့ၢ်န့ၣ် စံး၀ဲန့ၣ်လီၤႉ
တကးဒံးဘၣ်ခါဆူညါတၢ်မၤစၢၤအံၤတၢ်တၢၣ်ပီၣ်တဲသကိးမ့တအိၣ်ဘၣ်မ့လဲၤအသးဒ်အလီၢ်လီၢ်န့ၣ် ကကဲထီၣ်၀ဲတၢ်ဖုၣ်ထံၣ်ဖုၣ်ထီလၢတၢ်ကရၢကရိအကျါသ့၀ဲအသိးကဲထီၣ်စ့ၢ်ကီးတၢ်ထံၣ်ကမၣ်လၢကမျၢၢ်အကျါ သ့၀ဲအဂ့ၢ်န့ၣ် စီၤခဲလ့ၣ် စံးအါထီၣ်၀ဲန့ၣ်လီၤႉ
အပူၤကွံာ်လါမးရှး(၂၅)သီအနံၤန့ၣ် ကၠီၣ်တဲၣ်တၢ်တိစၢၤမၤစၢၤတၢ်ဖိတၢ်လံၤတဖၣ် တၢ်စိာ်ခီ၀ဲဆူရၤမတံ၀့ၢ် သုးကီၣ်ကးဂာ်တဲာ်ဂီၤတဖၣ်အစုပူၤ၀ံၤသုးခိးကီၢ်ဆၢ(BGF)ဟံးန့ၢ်၀ဲမူဒါတီဆှၢဃီၤ၀ဲဆူကၢၢ်ဂီၤ-သ့ၣ်ကတ့ၣ်အကျဲ တဆီဆူတန့ခၠါဒီးဖဲန့ၣ်ခ့ၣ်အဲၣ်ယူၣ်ကီၢ်ရ့ၣ်ၦၤဘၣ်မူဘၣ်ဒါတူၢ်လိာ်က့ၤ၀ဲကၠီၣ်တဲၣ်အတၢ်ဘိၣ်တၢ်မၤစၢၤ(၃၈၇၄)ဘိၣ်အဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ
တကတီၢ်ဃီဖဲတၢ်ဟ့ၣ်နီၤလီၤတၢ်မၤစၢၤတၢ်ဖိတၢ်လံၤလၢတန့ခၠါကီၢ်ဆၣ်ပူၤအခါတၢ်အိၣ်သးလဲၤသးဘျ့ဘျ့ဆှီဆှီဘၣ်ဆၣ်ဖဲတၢ်လဲၤဟ့ၣ်လီၤက့ၤ၀ဲလၢတၢ်ကြဲၢ်ကီၢ်ဆၣ်ဒီးဒူယီၢ်ကီၢ်ဆၣ်(သၣ်မညၣ်)အပူၤအခါန့ၣ် လၢတၢ်တပာ်သူၣ် ပာ်သးအပူၤခီဖျိသုးကီၣ်ကးဒီးသုးကီၣ်ကးအဂာ်တဲာ်ဂီၤကရၢ(MRCS)ၦၤဘၣ်မူဘၣ်ဒါဟဲပၣ်ဃုာ်ပၣ်ဂီၢ်၀ဲဒၣ်အဃိ ခ့ၣ်အဲၣ်ယူၣ်ခိၣ်နၢ်တဖၣ်ဘၣ်ကၢၤက့ၤ၀ဲတၢ်အိၣ်သးဒီးဆဲးနီၤလီၤ၀ဲတၢ်မၤစၢၤတုၤလၢအ၀ံၤအဂ့ၢ်န့ၣ် ပာ်ဖျါ၀ဲန့ၣ်လီၤႉ
