ကဘီယူၤဟဲခးလီၤတၢ်လၢဘံလ့ကီၢ်ဆၣ်(ထံခၠံၣ်ဘီ)သ၀ီပူၤ၀ံၤလီၢ်ခံသ၀ီဖိဟးစံၣ်မံကိးမုၢ်နၤဒဲး

လါအ့ဖြ့ၣ် ၃၀ သီႇ ၂၀၂၄ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁) ဘံလ့ကီၢ်ဆၣ်အပူၤ ဖဲလါအ့ဖြ့ၣ် ၂၈ သီအနံၤ ကဘီယူၤဟဲခးလီၤတၢ်လၢထံခၠံၣ်ဘီသ၀ီပူၤ၀ံၤလီၢ်ခံ ၦၤသ၀ီဖိသ့ၣ်တဖၣ်မုၢ်နၤခီန့ၣ်အ၀ဲသ့ၣ်ဟးစံၣ်မံ ၀ဲဒၣ်ခဲလၢာ် ဃၣ်ဃၣ် အဂ့ၢ်န့ၣ် လီၢ်က၀ီၤကမျၢၢ်တဖၣ်စံး၀ဲအသိးသ့ၣ်ညါဘၣ်န့ၣ်လီၤႉ

လီၢ်က၀ီၤကမျၢၢ်တဂၤစံး၀ဲလၢ“မုၢ်ဟါခါန့ၣ်ၦၤစံၣ်မံကိးမုၢ်နၤဒဲးလီၤႉမုၢ်ဟါခါန့ၣ်ၦၤစံၣ်ခဲလၢာ်ၦၤတအိၣ်နီတဂၤ လၢၤဘၣ်ႉ တၢ်အိၣ်ဘှ့ၣ်ဘှီၣ်နဟးကိးၦၤကညီမးမ့ၣ်အူတကပီၤနီဂၤလၢၤဘၣ်ႉၦၤမုၢ်ၦၢ်ဒီးၦၤဖိဒံဖိသၣ်လဲၤမံလၢ စံာ်ပျီလၢၦၢ်ပူၤ” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤလါအ့ဖြ့ၣ် ၃၀ သီအနံၤန့ၣ်လီၤႉ

ဖဲလါအ့ဖြ့ၣ် ၂၈ သီ ဟါခီ ၁၁ နၣ်ရံၣ်ဘျဲၣ်အဆၢကတီၢ်န့ၣ် ခီဖျိပယီၤသုးကဘီယူၤဟဲတ့ၢ်လီၤ၀ဲဒၣ်မ့ၣ်ပိၢ်(၂)ဖျၢၣ် လီၤတဲာ်ပိၢ်ဖးထီၣ်၀ဲဒၣ်လၢထံခၠံၣ်ဘီသ၀ီ ကၠိကရၢၢ်ပူၤတဖျၢၣ်အဃိ ကီၢ်သူလ့ၤတီၤခၢၣ်သးကၠိတၢ်သူၣ်ထီၣ်ဟးဂီၤ ၀ဲဒၣ်(၂)ဖျၢၣ်ႇၦၤကမျၢၢ်တၢ်သူၣ်ထီၣ်ဟးဂီၤဃုာ်စ့ၢ်ကီး၀ဲဒၣ်(၄)ဖျၢၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ

ကဘီယူၤဟဲခးလီၤတၢ်၀ံၤလီၢ်ခံခီဖျိကမျၢၢ်တဖၣ်ဘၣ်ယိၣ်လၢကဘီယူၤကဟဲခးလီၤကဒီးတၢ်အဃိ ထံခၠံၣ်ဘီသ၀ီ ဖိဃုာ်ဒီးသ၀ီလၢအိၣ်ဘူးဖဲသ့ၣ်တဖၣ်မုၢ်နၤခီန့ၣ်အ၀ဲသ့ၣ်ဟးစံၣ်မံ၀ဲဒၣ်အဂ့ၢ်န့ၣ် ဒူသထူၣ်ကီၢ်ရ့ၣ် နဲၣ်ရွဲၣ် ပဒိၣ်စီၤအ့နဲၤ စံး၀ဲဒ်အံၤန့ၣ်လီၤႉ

အ၀ဲစံး၀ဲလၢ “ဖဲ ၂၈ သီန့ၣ် ဟဲကွံာ်လီၤ၀ဲဒၣ်ခံ၀ီမီၤႉဖဲ ၁၁း၃၁ မံးနံးတဘျီႇ ဖဲ ၁၁း၃၆ မံးနံးတဘျီႉ ကွံာ်လီၤ၀ဲဒၣ် န့ၣ်လီၤ ၀ဲဒၣ်ဖဲကၠိကရၢၢ် ဘၣ်ဟးဂီၤ၀ဲဒၣ်ကၠိ(၂)ဖျၢၣ်ႉမ့မ့ၢ်လၢကမျၢၢ်အဟံၣ်ခီန့ၣ် ကျိဖးဒိၣ်အက့အခီဖျိးဘၣ်၀ဲဒၣ် အိၣ်(၂၁)ဖျၢၣ် တမ့ၢ်အဟးဂီၤအါအါဘၣ်အိၣ်ဒၣ်ကျိအက့အခီဖျိးဘၣ်ဒ်န့ၣ်လီၤႉတချုးကဘီယူၤဟဲကွံာ်တၢ်ဒံးဘၣ်န့ၣ်ကဘီယူၤဟဲဆှၣ်တၢ်တဘျုးနံၤလံႉအဃိထံခၠံၣ်ဘီႇဃီဖိပျဲၢ်ဒီးထံဖးဒိၣ်ထၣ်သ၀ီဖိတဖၣ်န့ၣ်ဃ့ၢ်ပလဲာ်ပာ်အသးလံႉ တနံၤညါအံၤကဘီယူၤ ဟဲခးလီၤတၢ်ဘျီအ၀ဲသ့ၣ်ဃ့ၢ်ပလဲာ်သးအါထီၣ်ႉပျံၤ၀ဲလၢကဘီယူၤကဟဲကွံာ်ကဒီးတၢ်မီၤနီၤႉလၢသ၀ီပူၤန့ၣ်ၦၤအိၣ်ဒံးတနီၤတၢ်မၢၤလၢဒံၣ်ဆံးဖိဆံးညါဟးပလဲာ်သး” အဂ့ၢ်န့ၣ် စံးဘၣ်ခ့ၣ်အဲးစံၣ်- ကညီတၢ်က စီၣ် ဖဲမဟါအနံၤန့ၣ်လီၤႉ

လၢန့ၣ်အမဲာ်ညါကဘီယူၤဟဲခးလီၤတၢ်ဘျီ၀ဲအံၤၦၤကမျၢၢ်သံဘၣ်ဒိဘၣ်ထံးတအိၣ်၀ဲဒၣ်ဘၣ်ဒီး ဒ်န့ၣ်အသိး ဒူသ၀ီတၢ်လီၢ်လၢကဘီယူၤဟဲတ့ၢ်လီၤမ့ၣ်ပိၢ်အံၤတၢ်ဒုးတၢ်ယၤကဲထီၣ်တအိၣ်၀ဲဘၣ်အဂ့ၢ်န့ၣ် ပဒိၣ်စီၤအ့နဲၤ စံးအါထီၣ်၀ဲန့ၣ်လီၤႉ

သုးဟံးန့ၢ်တၢ်စိတၢ်ကမီၤ၀ံၤလီၢ်ခံသုးကီၣ်ကးအံၤပညိၣ်ပာ်ပနီၣ်ကမျၢၢ်ထံဖိကီၢ်ဖိဒ်တၢ်ပာ်ပနီၣ်တခါအသိးဒီး တမ့ၢ်ထဲလၢ(ခ့ၣ်အဲၣ်ယူၣ်)ဟီၣ်က၀ီၤပူၤဘၣ်မ့မ့ၢ်တခီလၢကလုာ်ဒူၣ်အဟီၣ်ပူၤလၢအဂၤစ့ၢ်ကီးလဲၤလီၤ၀ဲတၢ်အိၣ် အဂ့ၢ်န့ၣ် ပဒိၣ်စီၤအ့နဲၤ စံး၀ဲန့ၣ်လီၤႉ

“သုးကီၣ်ကးအံၤစးထီၣ်လၢအ၀ဲသ့ၣ်ဟံးန့ၢ်ဆူၣ်တၢ်စိတၢ်ကမီၤ၀ံၤလီၢ်ခံန့ၣ်ကမျၢၢ်တဖၣ်ထီဒါအီၤဒီထံဒီကီၢ်အဃိ ခဲအံၤပထံၣ်ဘၣ်လၢအဂံၢ်အဘါဆံးလီၤစှၤလီၤႉပမ့ဘၣ်ကွၢ်န့ၣ်အ၀ဲသ့ၣ်ပာ်က့ၤကမျၢၢ်ဒ်သိးတၢ်ခးပနီၣ်တခါဒီး ခးလီၤ၀ဲဒၣ် တၢ်လၢဒူသ၀ီဘၣ်ဟးဂီၤ၀ဲဒၣ်ကၠိႇကမျၢၢ်အဟံၣ်အဃီအါအါဂီၢ်ဂီၢ်လီၤႉ

ပမ့ဘၣ်ကွၢ်န့ၣ်ကွံာ်လီၤ၀ဲဒၣ်ထဲ ပခ့ၣ်အဲၣ်ယူၣ် တၢ်ပၢတၢ်ပြးပူၤတကးဘၣ်လၢကလုာ်ဒူၣ်လၢအဂၤတဖၣ်နါက့ခးလီၤ၀ဲဒၣ်ကဘီယူၤဘၣ်ဟးဂီၤကမျၢၢ်အဟံၣ်အဃီႇကၠိ အိၣ်၀ဲဒၣ်အါအါဂီၢ်ဂီၢ်န့ၣ်ပသ့ၣ်ညါစ့ၢ်ကီးလီၤ”အဂ့ၢ်န့ၣ် စံး၀ဲန့ၣ်လီၤႉ

လၢတၢ်န့ၣ်အဃိဒ်သိးသုးမီၤစိရိၤတဒူၣ်အံၤကလီၤၦီၢ်ကွံာ်လၢအဆိအချ့အဂီၢ်န့ၣ်အလီၢ်အိၣ်လၢထံဂုၤကီၢ်ဂၤတဖၣ် ကဟ့ၣ် တၢ်ဆီၣ်သနံးလၢမုၢ်ကျိၤ၀ဲၤကွာ်မ့ၢ်ဂ့ၤႇလၢတၢ်ဆါန့ၢ်ကဘီယူၤသိမ့ၢ်ဂ့ၤဒီးတကးဒံးဘၣ်သုးကီၣ်ကးအတၢ်ခးပညိၣ်၀ဲဒၣ်ကၠိအံၤမ့ၢ်တၢ်လုၢ်သ့ၣ်ခါပတာ်မၤကမၣ်၀ဲဒၣ် ၦၤဂ့ၢ်၀ီခွဲးယာ်အဃိကြၢးလၢထံဂုၤကီၢ်ဂၤကဘၣ်ဟံးထီၣ်ဖီၣ် ထီၣ်အီၤလၢ (သုးကွီၢ်ဘျီၣ်)လံအဂ့ၢ်န့ၣ် ခ့ၣ်အဲၣ်ယူၣ် ၦၤဘၣ်မူဘၣ်ဒါတဖၣ် စံး၀ဲန့ၣ်လီၤႉ

ဒ်န့ၣ်အသိးဖဲအပူၤကွံာ်လါမးရှး(၂၃)အနံၤန့ၣ်စ့ၢ်ကီး ဃီဖိပျဲၢ်သ၀ီလၢအအိၣ်ဘူး၀ဲဒၣ်ဒီးထံခၠံၣ်ဘီသ၀ီအံၤစ့ၢ်ကီး ပယီၤသုးကဘီယူၤဟဲခးလီၤ၀ဲတၢ်ဒံးဒီးဖဲန့ၣ်ခီဖျိကဘီယူၤဟဲခးလီၤတၢ်အဃိ ကၠိတၢ်သူၣ်ထီၣ်ဟးဂီၤဒံး၀ဲဒၣ်(၃)ဖျၢၣ် သ့ၣ်ညါဘၣ်န့ၣ်လီၤႉ