တၢ်ထီၣ်အီၣ်ဟုၣ်၀ဲသ့ၣ်ကါညံၤနီၤလီၢ်က၀ီၤဖိလၢအဃ့ၢ်ပဒ့ၣ်အသးတဖၣ်အဟံၣ်ဒီးကျးတဖၣ်အဂ့ၢ်

လါအ့ဖြ့ၣ် ၁၁သီႇ၂၀၂၄နံၣ်ႇခ့ၣ်အဲးစံၣ်ႇ

ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢႇရၤမတံ၀့ၢ်ႇသ့ၣ်ဃးလီၤတီၢ်(သ့ၣ်ကါညံၤနီၤ)ဟီၣ်က၀ီၤတၢ်လီၢ်အပူၤႇ(၀့ၢ်ပူၤလီၢ်က၀ီၤ)ၦၤအီၣ်ဟုၣ်တၢ်ဖိတဖၣ်ႇနုာ်လီၤအီၣ်ဟုၣ်၀ဲတၢ်လၢကမျၢၢ်လီၢ်က၀ီၤဖိလၢအဃ့ၢ်ပဒ့ၣ်အသးတဖၣ်အဟံၣ်ဒီးကျးတဖၣ်အပူၤအအိၣ်၀ဲအဂ့ၢ်လီၢ်က၀ီၤဖိတဖၣ်စံး၀ဲန့ၣ်လီၤႉ

အပူၤကွံာ်လါအ့ဖြ့ၣ်(၅)သီ(၆)သီအနံၤအပူၤႇတၢ်ပၢၢ်ဆၢသုးပာ်ဖှိၣ်ထီၣ်ဒုး၀ဲသုးကီၣ်ကး(သ့ၣ်ကါညံၤနီၤ)အဒုးယာ်သုးကလၢၤဒီးတၢ်ခးလိာ်သးဒိၣ်ဒိၣ်မုၢ်မုၢ်ကဲထီၣ်၀ဲအဃိ(သ့ၣ်ကါညံၤနီၤ)ကမျၢၢ်လီၢ်က၀ီၤဖိတဖၣ်ဃ့ၢ်ပဒ့ၣ်ကွံာ်၀ဲအသးဒီးဖဲကမျၢၢ်တဖၣ်ဃ့ၢ်ပဒ့ၣ်အသးအဆၢကတီၢ်ႇၦၤအီၣ်ဟုၣ်တၢ်ဖိတဖၣ်အံၤနုာ်လီၤအီၣ်ဟုၣ်၀ဲတၢ်လၢကမျၢၢ်ဟံၣ်ဃီဒီးကျးတဖၣ်အပူၤအဂ့ၢ်သ့ၣ်ကါညံၤနီၤလီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤစံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“ဖဲအံၤန့ၣ်သ့ၣ်ကါညံၤနီၤသ၀ီဒီတဖျၢၣ်အပူၤတၢ်အီၣ်ဟုၣ်တၢ်အိၣ်မီၤႉတၢ်ခးလိာ်သးကဲထီၣ်အဃိႇဟံၣ်ကစၢ်ဒီးကျးကစၢ်တဖၣ်စးထီၣ်လၢတချူးတၢ်ခးလိာ်သးအခါန့ၣ်ပာ်တ့ၢ်ကွံာ်အဟံၣ်အဃီအကျး၀ံၤစးဃ့ၢ်ထီၣ်ကွံာ်၀ဲလံမီၤနီၤႉဒီးလၢတၢ်ဘၢၣ်စၢၤန့ၣ်ပန့ၢ်တၢ်ဆၢကတီၢ်တစိၢ်ဖိအဃိပက့ၤနုာ်လီၤကွၢ်တၢ်လၢသ၀ီပူၤဒီးပထံၣ်၀ဲလၢဖဲကမျၢၢ်တဖၣ်ဃ့ၢ်ပဒ့ၣ်သးအဆၢကတီၢ်န့ၣ်ၦၤအီၣ်ဟုၣ်တၢ်တဖၣ်အံၤနုာ်လီၤအီၣ်ဟုၣ်၀ဲတၢ်ဒ်အသးဒၣ်၀ဲန့ၣ်လီၤႉဒီးၦၤအီၣ်ဟုၣ်တၢ်ဖိတဖၣ်အံၤန့ၣ်ႇပာ်ပနီၣ်ပညိၣ်အီၣ်အုၣ်၀ဲဟံၣ်ဒိၣ်ကျိၤသွါဒီးကျးလၢအဒိၣ်သ့ၣ်တဖၣ်လီၤ”အဂ့ၢ်စံး၀ဲန့ၣ်လီၤႉ

လၢန့ၣ်အမဲာ်ညါႇၦၤအီၣ်ဟုၣ်တၢ်ဖိတဖၣ်အံၤနုာ်လီၤအီၣ်ဟုၣ်၀ဲ(သ့ၣ်ကါညံၤနီၤ)သ၀ီပူၤဟံၣ်ဒီးကျးတဖၣ်တကးဘၣ်နုာ်လီၤအီၣ်ဟုၣ်စ့ၢ်ကီး၀ဲတၢ်လၢ(မၠိၣ်သ့ၣ်-၀့ၢ်သီ)ဒီး(သ၀ီသီ)တဖၣ်အပူၤအိၣ်၀ဲအဂ့ၢ်လီၢ်က၀ီၤဖိတဂၤလီၢ်လီၢ်အံၤစံးအါထီၣ်၀ဲဒၣ်န့ၣ်လီၤႉ

ဒ်န့ၣ်အသိးႇတၢ်ဒုးတၢ်ယၤအတီၢ်ပူၤကမျၢၢ်လီၢ်က၀ီၤဖိတဖၣ်ဃ့ၢ်ပဒ့ၣ်သးအဆၢကတီၢ်မ့ၢ်တၢ်ခွဲးတၢ်ယာ်ဂ့ၤလၢၦၤအီၣ်ဟုၣ်တၢ်ဖိတဖၣ်ကဟူးဂဲၤအဂီၢ်ဒီးခဲအံၤရၤမတံ၀့ၢ်ဒီတဖျၢၣ်ဃၣ်ဃၣ်တၢ်နုာ်လီၤအီၣ်ဟုၣ်တၢ်ကဲထီၣ်သးအိၣ်၀ဲအဂ့ၢ်က၀ီၤဒ့(၄)ရၤမတံ၀့ၢ်လီၢ်က၀ီၤဖိလၢတၢ်နုာ်လီၤအီၣ်ဟုၣ်တၢ်လၢအဟံၣ်ပူၤတဂၤစံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“အခဲအံၤရၤမတံ၀့ၢ်ပူၤဒုလၢၦၤအီၣ်ဟုၣ်တၢ်ဖိတဖၣ်အဂီၢ်မ့ၢ်တၢ်ခွဲးတၢ်ယာ်ဖးဒိၣ်လီၤႉဖဲတချူးတၢ်ဒုးတၢ်ယၤကဲထီၣ်အိၣ်ထီၣ်ဒံးဘၣ်အခါဒၣ်လဲၣ်န့ၣ်ၦၤအီၣ်ဟုၣ်တၢ်အိၣ်ဒီဒူူၣ်ညါလံမီၤႉအခဲအံၤဒုတလိၣ်တဲလၢအဂ့ၢ်လၢၤဘၣ်ႇဖဲမဟါန့ၣ်ၦၤနုာ်လီၤအီၣ်ဟုၣ်တၢ်လၢယနီၢ်ကစၢ်ဒၣ်ယဲယဟံၣ်ဒံးႇယဟံၣ်န့ၣ်ယတ့ထီၣ်မးတ၀ံၤဒံးဘၣ်အိၣ်ဖဲက၀ီၤဒ့-(၄)(အမၣ်-၄ယၣ်ကွဲၣ်)န့ၣ်ႇတၢ်နုာ်လီၤအီၣ်ဟုၣ်ယဟံၣ်အဆၢကတီၢ်န့ၣ်ပကစၢ်အိၣ်ဒီးခီဖျိၦၤထံၣ်ချူးအဃိကိညၣ်ဒံးတၢ်တပၣ်ဃုာ်နီတမံၤဘၣ်ႉတၢ်ဘျၣ်ကစၢ်န့ၣ်ၦၤထံၣ်ချူးဆိအီၤအဃိဟးစံၢ်ထီၣ်ကွံာ်၀ဲ”အဂ့ၢ်စံးဘၣ်ခ့ၣ်အဲးစံၣ်ကညီတၢ်ကစီၣ်န့ၣ်လီၤႉ

တကတီၢ်ဃီႇသ့ၣ်ကါညံၤနီၤ(၀့ၢ်သီ-မၠိၣ်သ့ၣ်)ဒီး(သ၀ီသီ-ယွၤသ့ၣ်)တၢ်လီၢ်တဖၣ်အပူၤတၢ်ထီၣ်နုာ်လီၤအီၣ်ဟုၣ်တၢ်အိၣ်၀ဲတကးဘၣ်ရၤမတံ၀့ၢ်ပူၤက၀ီၤဒ့အဂၤတဖၣ်အပူၤစ့ၢ်ကီးတၢ်နုာ်လီၤအီၣ်ဟုၣ်တၢ်အိၣ်၀ဲအဃိႇက၀ီၤဒ့(၁)(၂)(၃)(၄)တၢ်လီၢ်တဖၣ်အပူၤကမျၢၢ်တဖၣ်အဲၣ်ဒိးဃ့ၢ်ပဒ့ၣ်၀ဲအသးဘၣ်ဆၣ်တဃ့ၢ်ထီၣ်၀ဲဘၣ်အိၣ်ဒံး၀ဲဒီးတနီၤဃ့ၢ်ထီၣ်ကွံာ်၀ဲအိၣ်ဘၣ်ဆၣ်ဘၣ်ပာ်တ့ၢ်၀ဲၦၤလၢကအိၣ်ခိးအစှၤကတၢၢ်တဂၤအိၣ်၀ဲအဂ့ၢ်သ့ၣ်ညါဘၣ်ဒ်လီၢ်က၀ီၤဖိတဖၣ်စံး၀ဲအသိးန့ၣ်လီၤႉ

ဒ်န့ၣ်အသိးႇတကီၢ်ခါခဲအံၤႇရၤမတံ၀့ၢ်ဒီတဖျၢၣ်အပူၤခီဖျိတၢ်နုာ်လီၤအီၣ်ဟုၣ်တၢ်တဖၣ်အိၣ်၀ဲအါမးအဃိလီၢ်က၀ီၤဖိလၢအဃ့ၢ်ပဒ့ၣ်သးလၢကွၢ်ထွဲက့ၤဟံၣ်တချူးဘၣ်တဖၣ်ႇဘၣ်ကိၢ်ဘၣ်ဂီၤ၀ဲတၢ်လၢအဟံၣ်အဃီအကျးဒီးအတၢ်အိၣ်တၢ်ဆိးလီၢ်တဖၣ်အဂီၢ်အိၣ်၀ဲအါမးအသိးဘၣ်ကိၢ်ဘၣ်ဂီၤစ့ၢ်ကီး၀ဲလၢခါဆူညါတၢ်လုၢ်အီၣ်အသးသမူမုၢ်ကျိၤ၀ဲၤကွာ်တၢ်ဖံးတၢ်မၤအိၣ်၀ဲအဂ့ၢ်သ့ၣ်ညါဘၣ်ဒ်ၦၤဃ့ၢ်ပဒ့ၣ်သးတဖၣ်စံး၀ဲအသိးန့ၣ်လီၤႉ