လါအ့ဖြ့ၣ် ၈ သီႇ ၂၀၂၄ နံၣ်ႇ ခ့ၣ်အဲးစံၣ်
ဖဲအပူၤကွံာ်လါအ့ဖြ့ၣ် ၄ သီအနံၤန့ၣ် လၢအမဲရကၤထံကီၢ်အပူၤ ဘီမုၢ်ဘံၣ်ဘၢကီၣ်ကးမၤ၀ဲတၢ်တၢၣ်ပီၣ်တဲသကိး ကီၢ်ပယီၤဂ့ၢ်၀ီဒီးလၢတၢ်တၢၣ်ပီၣ်တဲသကိးအပူၤန့ၣ် တၢ်ထီဒါ၀ဲတၢ်ဆါန့ၢ်ကဘီယူၤသိဆူသုးကီၣ်ကးအအိၣ်ဒီး လၢတၢ်အံၤအဖီခိၣ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢဒီးဒီကလုာ်တၢ်ဃူတၢ်ဖိးကီၣ်ကး(NUCC) တူၢ်လိာ်သဂၢၢ်၀ဲဒၣ် န့ၣ်လီၤႉ
(၂၀၂၁)သုးဟံးန့ၢ်တၢ်စိတၢ်ကမီၤ၀ံၤလီၢ်ခံအဆိကတၢၢ်တဘျီဖဲတၢ်မၤ၀ဲဒၣ်တၢ်တၢၣ်ပီၣ်တဲသကိးကီၢ်ပယီၤဂ့ၢ်၀ီ အခါန့ၣ် ဘံၣ်လၢကီၣ်ကးကရၢဖိထံကီၢ်(၄၇)ဘ့ၣ်တၢ်သးလီၤပလိာ်အိၣ်ထီၣ်၀ဲဒၣ်လၢကဒီၣ်တဲာ်ကွံာ် တၢ်ဆှၢန့ၢ်ကဘီယူၤသိဆူ သုးကီၣ်ကးအအိၣ်အံၤဒီးလၢတၢ်သ့ၣ်တဖၣ်အံၤအဖီခိၣ်န့ၣ်(KNU)ဒီး(NUCC)တူၢ်လိာ် သဂၢၢ်၀ဲဒၣ်န့ၣ်လီၤႉ
အပူၤကွံာ်တၢ်ဆါန့ၢ်ကဘီယူၤသိဆူသုးကီၣ်ကးအအိၣ်အံၤတဲ၀ဲလၢတမ့ၢ်တၢ်ဆါန့ၢ်ကျိချံၦာ်သၣ်ဘၣ်ဒီး ဘၣ်ဆၣ်ခဲအံၤ ဘံၣ်ဘၢကီၣ်ကးအနီၢ်ကစၢ်ဒၣ်၀ဲတတူၢ်လိာ်ထီဒါ၀ဲဒၣ်ဒီးတၢ်အံၤမ့ၢ်တၢ်လဲၤထီၣ်လဲၤထီလၢအဂ့ၤ အဂ့ၢ်န့ၣ် ခ့ၣ်အဲၣ်ယူၣ် ၦၤကတိၤတၢ်ပၢ ပဒိၣ်စီၤကျၢၤစ့ စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ
ပဒိၣ်စီၤကျၢၤစ့ စံး၀ဲလၢ“တၢ်တဘၣ်ဆါန့ၢ်သုးကီၣ်ကးအကဘီယူၤသိအံၤဘၣ်န့ၣ်မ့ၢ်တၢ်လၢအရ့ဒိၣ်တခါလီၤႉ ဘၣ်မနုၤအဃိလဲၣ်န့ၣ်သုးကီၣ်ကးအံၤပညိၣ်၀ဲဒၣ်ၦၤကမျၢၢ်ထံဖိကီၢ်ဖိလီၤႉအဃိလၢတၢ်သ့ၣ်တဖၣ်အံၤအဖီခိၣ်န့ၣ် အလီၢ်အိၣ်လၢထံဂုၤကီၢ်ဂၤတဖၣ်စ့ၢ်ကီးကဘၣ်တြီႇကဘၣ်ဟ့ၣ်၀ဲတၢ်ဆီၣ်သနံးလီၤႉဟီၣ်ခိၣ်ဒီဘ့ၣ်ဘီမုၢ်စၢဖှိၣ်ကရၢ အနီၢ်ကစၢ်ဒၣ်၀ဲထီဒါ၀ဲအံၤမ့ၢ်တၢ်လဲၤထီၣ်လဲၤထီလၢအဂ့ၤတခါလီၤ”အဂ့ၢ်န့ၣ် စံး၀ဲန့ၣ်လီၤႉ
လၢဘံၣ်ဘၢကီၣ်ကးအတၢ်ထီဒါအံၤအဖီခိၣ်န့ၣ်ဘၣ်ဃးတၢ်ကဆါန့ၢ်ကဘီယူၤသိဆူသုးကီၣ်ကးအအိၣ်တၢ်ဂ့ၢ်အံၤ ထံဂုၤကီၢ်ဂၤပဒိၣ်တဖၣ်အတၢ်လူၤပိာ်မၤထွဲ၀ဲအိၣ်ႇတအိၣ်န့ၣ်တၢ်တယးကွၢ်၀ဲကီဒီးဒ်န့ၣ်အသိးထံကီၢ်လၢအကွၢ်တၢ်လၢအ၀ဲသ့ၣ်မုၢ်ကျိိၤ၀ဲၤကွာ်အဂီၢ်ဒီးထံကီၢ်လၢအဟံးဃာ်ပၢၤဃာ်ၦၤဂ့ၢ်၀ီခွဲးယာ်ႇတၢ်မုာ်တၢ်ခုၣ်သ့ၣ်တဖၣ်အံၤ အတၢ်ထံၣ် ကလီၤဆီလိာ်အသးသ့၀ဲအဂ့ၢ်န့ၣ် ခ့ၣ်အဲၣ်ယူၣ် ၦၤကတိၤတၢ်ပၢ ပဒိၣ်စီၤကျၢၤစ့ ပဲာ်ထံနီၤဖးစံး၀ဲန့ၣ်လီၤႉ
တၢ်တၢၣ်ပီၣ်တဲသကိးဘျီ၀ဲအံၤအပူၤန့ၣ်တၢ်တၢၣ်ပီၣ်တဲသကိး၀ဲကီၢ်ပယီၤပူၤကမျၢၢ်ထံဖိကီၢ်ဖိလၢအလိၣ်ဘၣ်တၢ်ဆီၣ်ထွဲမၤစၢၤတဖၣ်အတၢ်အိၣ်သးဃုာ်ဒီးခီဖျိသုးကီၣ်ကးထုးထီၣ်တၢ်ကဘၣ်ကဲသုးသဲစးအံၤအဃိကမျၢၢ်ထံဖိကီၢ်ဖိ သဂၢၢ်ဘၣ်ဒီးတၢ်ပျံၤတၢ်ဖုးႇတကးဒံးဘၣ်တၢ်တၢၣ်ပီၣ်တဲသကိးဃုာ်စ့ၢ်ကီး၀ဲထံလီၢ်ကီၢ်ပူၤဖီၣ်စုက၀ဲၤတၢ်ဘံၣ်သဘုၣ်ဒီးသုးကီၣ်ကးအတၢ်သူတၢ်စုဆူၣ်ခီၣ်တကးအဂ့ၢ်အကျိၤသ့ၣ်တဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
တကးဒံးဘၣ်တၢ်ကတြီ၀ဲတၢ်ဆါန့ၢ်သုးကီၣ်ကးအသုးကျိချံၦာ်သၣ်လၢအတဖိးသဲစးဘၣ်အံၤဒီး လၢန့ၣ်အမဲာ်ညါ လၢတၢ်အိၣ်ဖှိၣ် အပူၤတၢ်ပာ်ဖျါတၢၣ်ပီၣ်ဘၣ်ဃးတၢ်ကဟံထီၣ်ဖီၣ်ထီၣ်ဂ့ၢ်၀ီဆူသုးကီၣ်ကးလၢအမၤကမၣ်တၢ်အံၤဒီး ဘၣ်ဆၣ် မ့မ့ၢ်လၢတရူးဒီးရၢရှါထံကီၢ်ခီန့ၣ်ထီဒါ၀ဲဒၣ်တၢ်ကဟံးန့ၢ်သုးကီၣ်ကးဂ့ၢ်၀ီအံၤန့ၣ်လီၤႉ
၂၀၂၁-၂၀၂၃ အတီၢ်ပူၤ လၢကီၢ်ပယီၤဒီတဘ့ၣ်အပူၤန့ၣ် သုးကီၣ်ကးသူ၀ဲဒၣ်ကဘီယူၤဟးခးလီၤတၢ်အိၣ်၀ဲအဘျီ (၁၆၀၀)ဘျဲၣ်ညါဒီးဒ်န့ၣ်အသိးစးထီၣ်ဖဲလါမးရှး ၁၀ သီအနံၤန့ၣ် ကီၢ်ပူၤဂံၢ်ခီၣ်ထံးတၢ်ကရၢကရိတဖၣ် ပာ်ဖှိၣ်ထီၣ်သးဒီး ကမျၢၢ် မၤ၀ဲတၢ်ဟူးတၢ်ဂဲၤလၢဟီၣ်ခိၣ်ဒီတဘ့ၣ်အပူၤဒီးဃ့ထီၣ်၀ဲထံကီၢ်ဘၣ်ထွဲပဒိၣ်ဒီး ခီပနံၣ်တဖၣ် လၢကဒီၣ်တဲာ်ကွံာ် တၢ်ဆါန့ၢ်ကဘီယူၤသိဆူသုးကီၣ်ကးအအိၣ်အံၤန့ၣ်လီၤႉ
